Македонскиот репрезентативен голман Столе Димитриевски од денеска и официјално е член на еден од најголемите шпански фудбалски клубови Валенсија. По шест години минати во Рајо Валјекано, нашиот интернационалец реши да побара нов предизвик во Ла Лига.
Димитриевски потпиша двегодишен договор со славниот клуб од „Месталја“, односно до јуни 2026 година. Македонскиот репрезентативец изминативе две сезони блескаше на голот на Рајо и се промовираше како еден од најдобрите голмани во шпанската елита.
Изминатата сезона бранеше на 37 натпревари, прими 47 голови, а на дури 13 натпревари не прими гол. Пред да брани за Рајо, Димитриевски беше член и на Гимнастик, Гранада и Кадиз во Шпанија, а претходно беше член и на италијански Удинезе, додека во Македонија го чуваше голот на Работнички.
