Македонскиот вицепрвак Алкалоид утре му гостува на Бјерингбро-Силкеборг во рамки на 4.коло во Европската лига на ЕХФ. На првата средба во Скопје минатата недела, Данците славеа победа, но од таборот на нашиот состав сега се надеваат на подобра претстава на гости.
Силкеборг во Скопје го потврди својот фаворитски статус во групата Ф со победата од 23-31. Алкалоид иако имаше свои добри моменти на натпреварот, сепак потфрли во реализацијата. Тренерот Кирил Лазаров се надева дека токму овој елемент во играта ќе се подобри на утрешниот натпревар.
„Се надевам дека ќе имаме подобра реализација и на реваншот ќе покажеме поголема борбеност и поголема мотивираност“, изјави предводникот на Алкалоид.
Во досегашниот тек од Европската лига, нашиот тим има освоено еден бод од три натпревари. Загуби два пати дома од Војводина и Силкеборг, но стигна до големо реми на гостувањето кај шпанска Ла Риоха.
Натпреварот утре почнува во 20:45 часот.