На голема радост на италијанските тифози, Карлос Сајнц од Ферари стигна до пол-позицијата за утрешната трка за Големата награда на Италија што се вози на легендарната патека „Монца“.
Во возбудлив финиш на квалификациите кога водството се менуваше три пати во последните секунди, Карлос Сајнц на крајот имаше најбрзо време со 1 минута, 20 секунди и 294 стотинки. Зад Шпанецот, кој ја запиша правата пол-позиција сезонава на утрешната трка ќе стартува Макс Ферстапен од Ред Бул. Трето најдобро време денеска имаше Шарл Леклер од Ферари, а четврти ќе тргне Џорџ Расел од Мерцедес.
Најдобрите 10 во квалификациите ги комплетираат Серхио Перез, Александер Албон, Оскар Пиастри, Луис Хамилтон, Ландо Норис и Фернандо Алонсо.
Трката за Големата награда на Италија утре стартува во 15 часот.
