Најстарото фудбалско натпреварување на светот англискиот ФА Куп од следната сезона најверојатно ќе се игра според нови правила.
Во моментов се водат преговори меѓу Националната фудбалска асоцијација и Премиер лигата и се очекува да се постигне договор за одредени измени.
Главната измена е преземањето на Премиер лигата продажбата на ТВ правата надвор од Англија и за таа цел елитното натпреварување во земјата предлага во иднина да се укинат повторените натпревари кои сега се играат доколку во првиот меч нема победник.
Токму ова правило многу го отежнува одредувањето на календарот на натпреварите во текот на сезоната и со оваа измена ќе се отвори простор за нови термини.
Патем, Премиер лигата инсистира мечевите во ФА Купот да се играат во текот на неделата, а не во викендите со што повторно би се отвориле дополнителни термини за играње на мечеви во националното првенство.
На крајот Премиер лигата инсистира финалето да се игра во завршницата на сезоната, а не на самиот крај.
Предлозите на Премиер лигата за овие измени се поради фактот дека од 2024 година, Лигата на шампионите ќе се игра по нов формат и во фазата по групи наместо шест ќе се играат 10 натпревари и поради тоа потребно е да се ослободат дополнителни термини во текот на сезоната.
ФОТО: Игор Паневски