Денеска од 18 часот во салата „Јане Сандански“ во Скопје започнува финалната плеј-оф серијата во Првата кошаркарска лига помеѓу МЗТ Скопје и Пелистер. „Аеродромци“ ја бранат титулата, додека битолчани ја бркаат својата прва круна во историјата.
МЗТ и Пелистер имаат десет дена одмор за добро да се подготват за финалната серија, која започнуа денеска. Се игра до три победи, односно по системот 2-2-1. Тоа значи дека Скопјани се домаќините на првите два натпревари, а следните два се играат во Битола. Доколку резултатот биде 2-2 во победи, решавашкиот петти дуел ќе се игра во „Јане Сандански“ во Скопје, бидејќи МЗТ беше прв во регуларниот дел од сезоната.
„Металците“ во плејофот немаат пораз, односно Кожув и Работнички ги совладаа со по 2-0. Пелистер пак од друга страна загуби само еднаш и тоа во четвртфиналето од Феникс, а потоа го мина ТФТ Скопје со 2-0.
Тренерот на МЗТ, Васко Атанасов очекува неизвесна серија со големиот ривал.
„Домашниот терен носи значајна предност, а улогата бранител на титулата е обврска да се даде сѐ од себе. Очекувам голема поддршка од трибините и победнички старт на финалната серија, со што ќе го најавиме освојувањето на јубилејната десетта титула“, вели Атанасов, кој сезонава е третиот тренер на шампионот по Александар Петровиќ и Дараган Николиќ.
Сезонава на двата меѓусебни натпревари во регуларниот дел од првенството два пати славеше МЗТ, а во ланската финална серија скопјани славеа со 3-1 во победи.