По поразот на гостувањето во Нови Сад, ракометарите на Еурофарм Пелистер, утре во Нашице против Нексе ќе го одиграат вториот натпревар во новата сезона од СЕХА лигата.
Тренерот на битолскиот состав Ларс Валтер и покрај проблемите со составувањето на тимот верува дека на мечот против Нексе Еурофарм Пелистер ќе игра далеку подобро и ќе се обиде да стигне до првата победа.
“Нексе е одличен тим, но видовме дека ја направија истата грешка, како и ние против Војводина. Среде подготовки сме, оставивме неколку ракометари дома за да ги заштедиме, и затоа не изгледавме добро во Нови Сад. Но, сега имаме два дена за подготовка и ќе бидеме подобри. Проблем ни е што немаме многу ракометари тука во Нашице, дојдовме само со четири бека за да покријат шеесет минути, што не е многу. Најголемиот проблем за поразот против Војводина беа техничките грешки кои ги направивме. Ги имавме дури деветнаесет, што не е нормално. Тоа ни се случи бидејќи сме во подготвителен период. Физичките тестови минатата недела беа добри, па сега работиме само на ракомет и треба да се подобриме. Имаме добри шанси да играме израмнет натпревар против Нексе и ќе бидеме подготвени за тој дуел”, изјави тренерот на Еурофарм Пелистер.
ФОТО: РК Еурофарм Пелистер
