Пелистер за малку од готово, вересија, Маслинко донесе победа
Малку недостасуваше кошаркарите на Пелистер и покрај водството од 19 поени, на крајот да доживеат пораз во дуелот против Сутјеска.
Сепак на крајот благодарение на Андреј Маслинко кој на три секунди пред крајот на натпреварот реализираше две слободни фрлања и Битолчани славеа со 77:75.
Пелистер водеше во текот на целиот натпревар, имаше во еден момент и плус 19, а во завршните 100 секунди од натпреварот влезе со водство од 11 поени. Во финишот Сутјеска успеа и да стигне до израмнување, а последниот напад го имаа Битолчани кои на крајот успеаа да стигнат до победа со која ги задржаа шансите за пласман во разигрувањето за влез во елитното друштво од регионалното натпреварување.
Во пресрет на многу значајниот дуел со Златибор, кој се игра за два дена, Пелистер е шести со учинок од 6 победи и три порази колку што има и следниот противник, кој е директен конкурент и за влез меѓу четирите најдобри.
Најефикасен во составот на Пелистер со 25 поени беше Кенет Карпентер, Димитар Караџовски додаде 16, а 14 поени постигна Донтеј Карутерс.
ФОТО: Игор Паневски