По победата од 3:1 во дуелот против САД, репрезентацијата на Холандија е првиот четвртфиналист на Светскиот шампионат.
Холанѓаните без поголеми проблеми обезбедија место меѓу осумте најдобри на првенството, а најзаслужен за триумфот е Дензел Дамфрис кој покрај што успеа да го совлада противничкиот голман беше асистент при постигнувањето на првите два погодоци.
Холандија по првиот дел имаше предност од 2:0, а головите беа дело на Мемфис Депај во десеттата и Дани Блинд во првата минута од судиското надополнување.
Во 76-тата Хаџи Рајт среќно успеа да го совлада голманот на Холандија и да намали на 2:1, а на девет минути пред крајот на мечот Дамфрис по додавање на Блинд се запиша во листата на стрелците и го потврди триумфот.
Холанѓаните во чевртфиналето ќе се соочат со победникот од вечерашниот дуел меѓу Аргентина и Австралија.
ФОТО: Игор Паневски