Нема да дозволиме МОТ да престане да постои , ќе го има, кажа програмскиот раководител во МКЦ, на синоќешното отворање на фестивалот кој ги афирмира новите светски театарски тенденции и форми. Неговата изјава доаѓа откако МОТ за годинашното 47 издание, од Министерството за култура и од Град Скопје доби скратен буџет за 60% во однос на претходните години, во висина од нешто над 56 илјади евра. Затоа на ова издание нема големи светски театарски продукции, а во програмата доминираат домашните претстави.
„Ви благодарам на сите што ни дадовте пред сè морална подршка во сите овие месеци додека одлучувавме што и како понатаму со фестивалот. МОТ ќе го има. МОТ ќе мора да го има . Она што ми е посебно драго, оваа година одлучивме во слава и чест на Биш да направиме селекција на претстави за кои што поканивме меѓународно жири“, рече Русе Арсов, програмски раководител во МКЦ.
А, во чест на починатиот програмски директор и селектор на МОТ, Љубиша Никодиновски – Биш, кој со години на отворањата на фестивалот фрлаше рози на сцената, беше оставен буќет од исти цвеќиња на едно столче. Натпреварувачкиот дел од програмата од 8 домашни претстави започна со „Кислород“- копродукциски проект меѓу Центарот за култура и театарот од Битола. Потребата од кислород овдека не е првенствено од еколошки причини, туку е метафора за потребата на современиот човек слободно да дише, обременет од низа други актуелни проблеми.
„Основната приказна е за еден маж и за една жена. Го третира машко- женскиот принцип.Принципот на љубовта, тероризмот, на стравовите, сексуалноста, на религијата.Сè што практично го мачи современиот човек. Има еден многу интерес пристап. Вирипаев го пишуваше текстот во еден тежок период од неговиот живот“, рече Иван Јерчиќ, режисер на претставата.
МОТ вечерва продолжува со претстава, базирана на играта со предмети, во продукција на Битеф театарот од Белград.Фестивалот ќе трае до 19 ноемри.
Сотир Трајков