Женската ракометна репрезентација на Македонија со пораз го отвори настапот на Европско првенство што се одржува во Скопје.
Нашата селекција е поразена од олимпискиот шампион Франција со 24:14. Сепак и покрај убедливиот пораз на моменти избраничките на селекторот Љубомир Савевски пружија силен отпор на фаворизираниот противник.
“Тешко беше за нас против Франција. Имавме многу проблеми во нападот, 27 промашени напади и десетина технички грешки. Добро е што одигравме еден дел од натпреварот позитивно. Имавме проблем со нападот, тешко е против ваков тим да постигнете гол од девет-десет метри. Задоволен сум од борбеноста, залагањето и менталниот склоп. Се обидовме да ротираме, но повеќе девојки од клупата се млади и не може да одговорат во фаза кога се „крши“ резултатот. Така веднаш од пет доаѓаме до осум разлика. Франција има многу моќна одбрана и сигурен сум дека се меѓу најдобрите селекции на шампионатот. Сепак, јас сум оптимист, ние сме на самиот почеток на циклусот. Ова Европско првенство е многу силно, ние не го изборивме пласманот, туку играме како домаќини. Имаме една мала надеж дека можеме да го промениме она што се случуваше во последните десет години”, истакна предводникот на националниот тим Савевски.
ФОТО: Игор Паневски