Македонската женска ракометна репрезентација по точно една деценија пауза повторно се враќа на големата сцена. Нашата селекција е дел од Европското првенство кое покрај во Македонија се одржува во Црна Гора и Словенија.
Прв противник на подмладената репрезентација е селекцијата на Франција која е актуелен олимписки шампион и е еден од кандидатите за освојување на златото.
“Ова е најдобрата репрезентација на Франција досега. Имаат спој на искусни и млади играчи што е нешто фантастично. Се надевам дека како што игравме со Норвешка ќе успееме да одиграме и со Франција да парарираме што подолго. Сите ракометарки што ќе бидат во тимот се класа. Наша цел е да покажеме карактер и да покажеме дека сме во нагорна линија со формирање на оваа репрезентација која е спој на кадети/јуниори и сениори кои се во странските клубови. Се надевам дека ќе направиме чекор напред, пресрет квалификациите за Светско првенство и ќе имаме поволна жрепка. Ако бевте присутни на кадетското првенство немаше голем интерес. Нашиот народ е научен да има тим кој се бори за шампионска титула. Можеби овој период од десет години го направи женската репрезентација која беше во зимски сон и веројатно затоа е тоа така. Богатството на оваа репрезентација е младоста”, изјави селекторот на националниот тим Љубомир Савевски.
Репрезентацијата на Македонија немаше многу среќа при жрепката за првата фаза. Во овој сегмент од натпреварувањето противнички ни се селекции од самиот европски и светски врв во женскиот ракомет. Покрај Франција во следниве денови ќе се соочиме уште со Холандија и Романија.
“а мене е важно да покажат карактер и добра игра, бидејќи Франција е репрезентација која може да победи секого колку разлика сака, нешто слично ќе биде и со Холандија. Имаме многу тешка група и се надевам дека ќе ја надминеме нервозата и девојките ќе покажат и повеќе од тоа што го знаат во моментов”, заврши Савевски.
Мечот против Франција почнува во 18 часот и ќе се игра во А1 арената Борис Трајковски.
ФОТО: Игор Паневски