Уставни измени со одложено дејство се тешко изводливи, а Македонија мора да го задржи евроатлантскиот курс.

Ова е ставот на Симонида Кацарска од Институтот за европска политика, откако Албанија доби зелено светло да продолжи по евроинтегративниот пат, а Македонија остана да „тапка во место“, условена со уставните измени за внес на Бугарите.

Од невладините пристигна порака дека треба да се обезбеди вклученост на опозицијата, но и на пошироката јавност во евроинтегративниот процес.

Треба да има многу поголема комуникација со граѓаните во однос на причините и дискусија во однос на надворешната политика и како таа може да влијае дома. Секако дека со одвојувањето Албанија ќе биде формално чекор пред нас во процесот на преговори. Тоа ќе влијае врз домашната политичка ситуација. Меѓутоа исто така зависи колку Владата ќе може да испорача на многу други прашања коишто се врзани со реформската агенда поврзана со ЕУ за да може да овозможи одредени услови кои коишто Албанија секако ќе ги има пред нас, вели Симонида Кацарска, директорка на Институтот за европска политика – Скопје.

Новата Влада мора да креира партнерства вклучително и со Бугарија, во ситуација кога Македонија и Албанија и формално се одвојуваат на евроинтегративниот пат, вели директорката на Институтот за европска политика.

Претседателот на опозициската СДСМ, Филипче, пред неколку дена побара да се одржи затворена седница за да се утврдат државните позиции во однос на Унијата, а претставниците на Владата не покажаа ентузијазам и расположение за такво нешто.

Според Кацарска од ЕПИ, во моментов е потребна силна дипломатска акција и лобирање кај државите членки на Унијата, пред сѐ западноевропските.

Парнтерството со Унгарија може да се гледа од различни аспекти, но едно е јасно – мора да се балансира во тие односи.

Мислам дека лобирањето кај државите членки е нешто што мораме да го направиме. Значи ние секако мораме да работиме со Германија пред сѐ како клучниот партнер, со Франција колку што постои можност. За жал мислам дека делумно и на дипломатско ниво не сме доволно зајакнати особено во овие две држави членки. Партнерството со Унгарија можеме да го гледаме од различни аспекти. Унгарија е членка на ЕУ. Меѓутоа, во моментот е релативно изолирана членка на ЕУ којашто, пак, го има претседателството. Така што, јасно е дека тука ќе мора секоја Влада, па и претходната мораше да балансира во односите со Унгарија. Тоа мора да го прави секоја држава која пристапува од регионот, е ставот на Кацарска од ЕПИ.

Кога станува збор за реформската агенда, меѓу првите предизвици со коишто се соочува државата е борбата против корупцијата. Сепак, напредокот на евроинтегративниот пат е врзан со уставните измени како главен услов за такво нешто. Тоа е став на Унијата.

Премиерот Мицкоски порачува – „диктати не се прифатливи“, вели дека ќе се обрати до институциите на ЕУ и ќе инсистира на достоинствено решение за Македонија.

Од официјална Софија одговараат дека европската интеграција се заснова на сопствените заслуги и не дозволува посредување меѓу ЕУ и земја-кандидат.

Во меѓувреме, анкетата спроведена од страна на Институтот за европска поилтика, на примерок од 1000 испитаници, покажа дека 56% од граѓаните целосно ја поддржуваат интеграцијата во ЕУ.

11 отсто од граѓаните рекле дека воопшто не ги поддржуваат европските интеграции.

Петар Догов

The post Кацарска: Уставни измени со одложено дејство се тешко изводливи, Македонија мора да го задржи евроатлантскиот курс appeared first on telma.com.mk.

На јубилејниот 20. Скопски маратон партиципираа рекордни 13.400 натпреварувачи од 55 земји.
Во маратонската трка најуспешни беа тркачите од Кенија, Хилари Чемвоно и Ирина Џеруто, а место на подиумот обезбедија и нашите најдобри маратонци Дарио Ивановски кој беше трет во машка конкуренција додека кај дамите Адријана Поп Арсова го освои второто место.

ФОТО: Игор Паневски

The post ФОТО галерија: Рекорден број учесници на јубилејниот Скопски маратон appeared first on telma.com.mk.

Македонскиот одбојкарски шампион Струмица направи тим-репрезентација. Капитенот на националниот тим Никола Ѓорѓиев по фантастичната интернационална кариера се враќа дома, а крај него за тимот потпишаа и неговиот брат Ѓорѓи Ѓорѓиев и Александар Љафтов.

Струмичани создаваат фантастичен тим, кој во следната сезона исклучително лесно ќе ја одбрани титулата во домашното првенство, но ова е состав кој треба да биде конкурентен и на меѓународната сцена. Летово на Струмица и се приклучија репрезентативците Дарко Ангеловски, Филип Маџунков и Филип Лепидовски, но тоа не беше доволно за ЦЕВ Лигата на шампиони, бидејќи нашиот првак испадна од Олимпијакос во првото коло без освоен сет.

Сега со доаѓањето на браќата Ѓорѓиеви и Љафтов, Струмица ќе се соочи со тимот на Капошвар во првата рунда од ЦЕВ Купот. Првиот натпревар од двомечот се игра во салата „Парк“ на 8.октомври.

The post Најдобриот македонски одбојкар Никола Ѓорѓиев се врати дома appeared first on telma.com.mk.

На јубилејното 20-то издание на Скопскиот маратон што ќе се одржи во недела на 6.октомври ќе учествуваат рекорден број на натпреварувачи.

Се очекуваат над 13 илјади луѓе низ улиците на главниот град и тоа од 55 држави од светот. Традиционално како и секоја година ќе се одржат четири трки, маратонот на 42.километри, полумаратонот на 21.километар, потоа штафетниот маратон и рекреативната трка на 5.километри.

„По 20-ти пат се одржува Виз Ер Скопскиот маратон, најмасовниот спортски настан кај нас, кој што Скопје и Македонија ги става на светската тркачка мапа. Овој настан не би можел да биде одржан без помош на Министерството за внатрешни работи, на Министеството за спорт, кое што покажа исклучително разбирање, Министерство за одбрана, Црвениот крст на град Скопје, Службата за итна медицинска помош и спонзорите. Оваа година има рекорден број учесници.“ изјави Зоран Стојановиќ, Претседател на Сојуз на спортови на Скопје.

„Од името на министерството можам да изразам едно задоволство што оваа година ќе бидеме дел од Скопскиот маратон. Не знам како било во минатото, но можам да кажам дека овој маратон ќе ја има поддршката, бидејќи гради исти вредности што ние сакаме да ги вметнеме во нашата држава. Иако се работи за рекреативен настан, она што нас како министерство ни е од интерес е што врзувате многу луѓе и има многу учесници. Негуваме исти вредности по кои сака да се води и Министерствто за спорт и да бидеме пример во општеството и можам јавно да кажам дека маратонот ја има нашата целосна поддршка. Се надевам дека и годинашниот маратон ќе биде успешен како и сите досегашни и стоиме на располагање за сѐ она што можеме да го помогнеме.“ изјави Министерот за спорт, Борко Ристовски.

Дали ќе се срушат нови рекорди оваа година на Виз Ер Скопскиот маратон, ќе открие неделното утро.

„Оваа година имаме рекорден број на учесници 13.440 од 55 земји, со што е надминат бројот од 2019 година кога имавме 12.450. Ова е многу поголем број учесници во споредба со минатата година, кога учествуваа 11.400 учесници и нѐ радува што интересот е огромен, како кај нашите тркачи, така и кај странските. Во сите четири трки, рекреативната трка од 5 км, маратонот, полумаратојот и штафетниот маратон е зголемен бројот на учесници во однос на минатите изданија. Можам да најавам дека ќе учествуваат неколку елитни натпреварувачи од Кенија и се надевам дека ќе бидат срушени рекордите на патеките. Оваа година имаме мала измена на патеките во однос на минатите години, но стартот останува на исто место, пред Собранието на Република Македонија. Тркачите на маратонот, полумаратонот и штафетниот маратон ќе трчаат накај населбата Хром, по улицата Теодосиј Гологанов, по што кај Хром ќе свртат полукружно, се враќаат назад во центарот на градот, каде продолжуваат покрај Тутунски комбинат, на Трета македонска бригада, по што ќе свртат лево, по улицата Васко Карангелевски, кај Мајчин Дом, па потоа по Булевар Србија десно, тука вртат полукружно, по што се враќаат на Тобако 2 и по Булеварот Јане Сандански, се враќаат повторно на Трета македонска бригада и завршуваат на Порта Македонија, на плоштадот во Скопје. Ова е првиот круг за полумаратонот, додека маратонците уште еднаш ќе го свртат истиот круг. Додека патеката за трката на 5 км, стартот е исто пред Собранието, по што натпреварувачите трчаат во правец на населбата Аеродром, односно кај Тутунски комбинат вртат лево, по Трета македонска бригада и кај Супермаркетот Тинекс свртуваат полукружно и се враќаат повторно назад на плоштад Македонија, каде што е целта.“ изјави Кире Синадиновски, спортски директор на Виз Ер Скопски маратон.

Голема помош на целосната организација даваат и сите пријавени 600 волонтери. Организаторите уште еднаш ги повикуваат сите во недела да ги бодрат тркачите и да ја споделат позитивната енергија на јубилејното издание на можеби омилениот спортски настан во државата. Главен покровител на Виз Ер Скопски маратон 2024 е Министерството за спорт, а покровители се Град Скопје и Делегацијата на ЕУ во Скопје.

The post Рекорден број учесници на 20-тото јубилејно издание на Скопски маратон appeared first on telma.com.mk.

Коко Гоф протв Паула Бадоса е првата полуфинална двојка на мастерс тенискиот турнир во Пекинг. Преостанатите две четвртфинални пресметки се играат утре.

Четвртата фаворитка Гоф со пресврт ја елиминираше 115-тата тенисерка на светот Јулија Стародупцева од Украина. Американката го загуби првиот сет со 2-6, но потоа ги доби следните два со 6-2 и 6-2 за место во полуфиналето, каде ќе се соочи со Паула Бадоса. Шпанката ја победи Кинезинката Шуаи Жанг со 6-1 и 7-6.

Последните четвртфинални пресметки се играат утре, а ќе се соочат, Арина Сабаленка против Каролина Мухова и Чинвен Женг против Мира Андреева.

The post Гоф со пресврт стигна до полуфиналето во Пекинг appeared first on telma.com.mk.

ЗСФ на Фатмир Етеми узурпира туѓ имот за да ја гради спорната зграда во Карпош.

Инвеститорите на спорната зграда кај Воена Болница го узурпираа пристапниот пат до бензинската „Макпетрол“ на Партизанска. Без дозвола, на приватниот имот на компанијата е поставена градежна механизација на ЗСФ Ком на Фатмир Етеми и Делта 2015 Констракшн ДООЕЛ формирана од „Орка Холдинг“ на Орце Камчев.

Со часови узурпиран пристапниот пат до бензинската на Макпетрол кој е всушност приватен имот. Со часови граѓаните беа спречени да дојдат на бензинската затоа што камиони и кранови за градба неовластено се поставиле.

Од „Макпетрол“ на булевар Партизански одреди, информираа дека во текот на целиот ден се соочуваат со проблеми со фирмата која изведува градежни работи на локацијата зад бензинската и во близина на ГОБ „Осми Септември“ – Скопје.

Сѐ започнало во попладневните часови кога вработените на бензинската забележале градежна машина дека се поставува на пристапната улица што води кон објектот, каде што е узурпиран дел од улицата и отежнато движењето на возилата

Во попладневните часови забележавме дека се поставува градежна машина на пристапната улица што води кон објектот каде што е узурпиран дел од улицата, односно е отежнато движењето на возилата. На сето тоа, како одговорно лице отидов со другото одговорно лице од градилиштето за да разговарам и да им посочам дека не може да се постави без претходна најава. На сето тоа, со непристоен однос од нивна страна тие си продолжија со поставувањето на градежната машина и со активностите околу градилиштето, вели Дарко Павковски, одговорно лице на објектот на Бензинска станица „Макпетрол“ – Партизански одреди.

Телма побара став од инвеститорот ЗСФ Ком Дооел. Рече дека тој не е изведувач на работите на оваа градба.

„Ние сме инвеститори, а не изведувачи на работите и не го блокириме пристапот кон бензинската“, одговорија за Телма од фирмата ЗСФ Ком во сопственост на Фатмир Етеми. Вториот инвеститор е фирмата Делта 2015 Констракшн ДООЕЛ  која своевремено била формирана од „Орка Холдинг“.

Од Општина Карпош велат дека градежните работи смее да се одвиваат само со дозвола на сообраќајната полиција, но никако не смеат да го загрозат движењето на жителите и фирмите во околина. Но, општината не испрати комунални инспектори да реагираат.

Може да гради секој оној којшто има дозвола за тоа, но нема право да ги загрозува граѓаните и фирмите во околината каде гради. Не смеат да се поставуваат тешки камиони на јавна површина во градот, а особено не на сообраќајни улици. Сообраќајната полиција во ваков случај мора да интервенира и да ги спречи, велат од Општина Карпош во одговор за Телма.

Членот 14 од Законот за безбедност на сообраќајот на патиштата е јасен. Во него се вели дека дека правните и физички лица кои изведуваат работи на јавен пат се должни да го обезбедат местото на изведување на работите, а правните и физички лица пред започнување на работите се должни да обезбедат одобрение за времена измена на режимот на сообраќајот од надлежен орган.

Правните и физичките лица се должни најмалку 24 часа пред започнување со времена измена на режимот на сообраќај да го известат МВР и правното лице надлежно за одржување на јавниот пат, а потоа по завршување на работите да ги отстранат од јавниот пат средствата за работа, остатоците од материјалот, сообраќајните знаци, браниците и другите предмети кои се наоѓаат на патот.

На правното лицe од ставот (1) на овој член, кое постапува спротивно на одредбите од ставовите (1), (3), (7) и (8) на овој член ќе им се изрече глоба во износ од 3.000 евра во денарска противвредност,  се вели во член 14, став 9 од Законот за безбедност на сообраќајот на патиштата.

Со оглед дека се работи и за пристапен пат во приватен имот на Макпетрол тогаш правото на сопственост е загарантирано и не смее да биде узурпирано.

По неколку часа откако камионите ја завршија работата интервенираше полицијата. Според МВР правното и одговорното лице добиле пријава согласно законот. Оваа градба со месеци е во фокусот на активистите и граѓаните.

Пред еден месец, една од членките на невладината организација „О2 Иницијатива“, добила телефонска закана да престане да реагира против изградбата на зградата кај „Воена болница“, информираа тогаш од невладината.

Активистите бараат итно поништување на издаденото одобрение за градење за т.н. 17 катница, односно комплексот на згради.

Од Иницијативата О2 потсетуваат дека незаконски било добиено позитивно конзерваторско мислење за одобрение за градење на зградата која се гради во заштитното подрачје кај „Воена болница“.

Од оваа невладина организација пред повеќе од триесет дена побарале од министерот за транспорт Николоски, согласно неговите надлежности да ја стопира градбата на овој спорен објект затоа што претходно и самиот министер тврдел дека во Карпош повеќе нема да се гради.

Иако е поминат законскиот рок, министерство сѐ уште не се изјаснило дали ќе ја стопира градбата, а О2 побарале и од Управниот инспекторат да постапи во однос на нивното барање.

Петар Догов

The post ЗСФ на Фатмир Етеми го узурпирала пристапниот пат до бензинската „Макпетрол“ на Партизанска за да ја гради спорната зграда кај Воена Болница appeared first on telma.com.mk.

Социјалдемократите предвидуваат промени во владината коалиција, а од власта негираат.

Координаторот на пратеничката група на СДСМ во Собранието, Оливер Спасовски, во интервју за Радио Слободна Европа вели дека очекува Демократската унија за интеграција набрзо да стане дел од Владата.

За опозицијата, евидентно е дека ВМРО-ДПМНЕ и ДУИ соработуваат и дека тоа се покажало на дело со поддршката за одредени законски решенија кои се носат со двотретинско мнозинство во законодавниот дом.

Таков е Законот за организација на органите на државната управа, а последен пример е Законот за локална самоуправа.

„Ние само ги гледаме потезите коишто се влечат во Собранието во овој период. Коалицијата помеѓу ВМРО-ДПМНЕ и ДУИ е поставена на сериозно добри односи сега. И мене нема да ме изненади и за очекување ми е дека во наредниот период ДУИ би била сигурно дел од Владата“, вели Оливер Спасовски, координатор на пратеничката група на СДСМ.

Додека опозицијата будно ги следи потезите на власта, оние кои се дел од владината коалиција веќе ги прославуваат првите сто дена на власт.

Од ВМРО-ДПМНЕ им порачаа на СДСМ дека тие заедно со ДУИ од опозиција ќе гледаат како Македонија оди напред.

„Да не се грижи Спасовски и СДС, ДУИ не им го земаме. Допрва следува ситнење во СДС заради нивните лоши политики во изминатите 7 години и никакво растурање на пердуви нема да им помогне да го спречат тоа“, рагираат од ВМРО-ДПМНЕ преку соопштение.

Од Коалицијата Вреди оценуваат дека опозицијата е деструктивна и со се што прават досега само се обидуваат да се спасат од одговорност.

Тие денеска организираа прослава за 100 дена од Владата, со наслов „преминуваме на дела“.

Се пофалија со досега сработеното, но ги избегнаа прашањата на новинарите.

Изет Меџити, пред камерите испрати порака до своите поранешни сопартијци. Но, пред да ги слушне другите прашања на медиумите, тој и другите лидери на Вреди влегоа во салата со образложение дека „ова е прослава“.

„Секојдневно гледаме дека се соочуваме со една деструктивна опозиција која секојдневно критикуваше без аргументи, беспредметно и сето тоа во функција на дестабилизација и дефокус. Не во интерес на граѓаните, туку како да се спасат од одговорност. Додека одат по паметот на господинот Груби со неговите смешни кампањи, не им се пишува добро“, кажа денеска Изет Меџити од Коалицијата Вреди.

За само 100 дена власт, Вреди и Владата ја оддалечија државата од Европа и Америка и создадоа непријателства со Грција, Бугарија, Косово и Албанија.

Ова се вели во соопштението на интегративците на Ахмети.

„ДУИ останува цврсто определена да продолжи да биде гардиан на нашето евро-американско партнерство и по ниедна цена нема да дозволи промена на западниот курс на државата“, се вели во дел од соопштението на ДУИ.

Првите сто дена од новата Влада предводена од Христијан Мицкоски ги одбележаа најавите за длабоки реформи на сите нивоа и предупредувањата за обиди за дестабилизација на државата.

Во сите изјави на владините претставници постојано провејуваат заложбите за бескомпромисна борба против криминалот и корупцијата.

Петар Догов

The post СДСМ очекува ДУИ наскоро да влезе во Влада – власта ги исмејува ваквите изјави од страна на опозицијата appeared first on telma.com.mk.

Фудбалската федерација на Македонија по повод нападот на претседателот Муамед Сејдини објави соопштение во кое се осудува настанот и го пренесуваме во целост.

“Фудбалската федерација на Македонија најостро го осудува кукавичкиот и срамен напад врз нашиот претседател Муамед Сејдини, кој синоќа физички беше нападнат на паркингот од скопски ресторан.

Овој чин на насилство е неприфатлив и претставува директен удар врз вредностите на фудбалот, спортот и демократијата, воопшто.

Јасно и недвосмислено истакнуваме дека Фудбалската федерација на Македонија нема да дозволи насилството да стане средство за влијание или решавање на кој било предизвик. Изборот на раководни лица во ФФМ се одвива исклучиво преку легални и демократски процедури, со гласови на делегатите, а не со закани и насилство. Оние што се обидуваат да го нарушат овој процес преку сила треба да бидат свесни дека нивните постапки се веќе идентификувани и дека соработуваме со институциите на правдата за целосно расветлување на овој инцидент.

Го повикуваме Министерството за внатрешни работи, како и сите надлежни органи, да преземат итни мерки и да го истражат случајот до крај, со цел сторителите да бидат изведени пред лицето на правдата.

За овој инцидент го информиравме и раководството на УЕФА и ФИФА.

Претседателот на ФФМ останува непоколеблив пред ваквите закани и притисоци. Тие не ја ослабнуваат неговата решителност, туку напротив ја зајакнуваат неговата посветеност кон интегритетот и транспарентноста во спортот.

Муамед Сејдини на оваа позиција е избран на легален начин, преку гласовите на делегатите и само на ист начин ќе го заврши или продолжи својот мандат. Насилството никогаш нема да биде средство кое ќе го одреди неговото присуство или заминување.

Фудбалската федерација на Македонија останува цврсто посветена на промовирање на спортските вредности, фер игра и почитување на институциите”

The post ФФМ го осуди нападот врз Сејдини appeared first on telma.com.mk.

Труење со епидемиски размери се случило во основното училиште „Ѓорѓија Пулевски“, во скопски Аеродром. Сомнежите се дека симптомите се појавиле кај основци, по училишниот оброк.

Санитарна и здравствена инспекција веќе беше во училишната кујна кога пристигнаа и медиумите.

Зеле примероци за анализа, за да ги утврдуваат причините за масовното труење.

Децата од прво до трето одделение во целодневна настава, според информациите ручале мусака, а добиле и десерт по ручекот.

Потоа, слични симптоми пројавиле 140 ученици од вкупно 360 коишто се дел од целодневна.

Случајот е пријавен во сите надлежни институци.

„Во раните утрински часови одреден број од наставниците пријавија зголемен број на отсутни ученици со исти симптоми. Ние како училиште веднаш ја затворивме кујната и го спречивме делењето на топлиот оброк. Дел од учениците од целодневна настава беа испратени дома бидејќи не можат децата да останат без топол оброк долго време“, вели директорот на ООУ „Ѓорѓија Пулевски“, Александар Филипчев.

Од Државниот санитарен и здравствен инспекторат известуваат дека извршиле вонреден надзор при што се земени 5 примероци од храна, 4 бриса од работни површини, брисеви од раце и од нос на вработените во кујната.

Земените примероци се доставени за анализа во лабораториите ЦЈЗ – Скопје и Институтот за јавно здравје.

„Санитарно-хигиенската состојба во кујната со која стопанисува фирма со која училиштето има договор за подготвување и послужување појадок, ручек и ужина задоволува. Доставени се на увид санитарни книшки за извршени здравствено–хигиенски прегледи на вработените во законски рок. Дезинфекција, дезинсекција и дератизација е извршена од овластена установа во законски рок. Се користат и средства за дезинфекција за работните површини и опремата. ДСЗИ ја затвори кујната записнички, со службена лента и ќe се издаде решение за забрана за работа до спроведување на санитарно-хигиенски и противепидемиски и мерки“, се вели во дел од соопштението на ДСЗИ.

Според информациите, ниту едно дете не е донесено на Инфективна, а едно дете е донесено на инфузија во амбулантата на Клиниката за детски болести.

Од ДСЗИ велат дека до завршување на вонредниот инспекциски надзор добиени се пријави за заразно заболување од лекар педијатар за 7 деца – ученици во училиштето.

Но, родители на затруени ученици коишто се јавија во редакцијата на Телма информираат дека бројот на деца донесени на лекар за да добијат медицинска помош, е многу поголем.

Петар Догов

The post Ручале мусака и јаделе десерт пред да добијат симптоми – сомнеж за труење со храна на 140 ученици од ООУ „Ѓорѓија Пулевски“ appeared first on telma.com.mk.

Извршниот комитет на УЕФА му ја одзема организацијата на финалето во Лигата на шампиони на стадионот „Сан Сиро“ во Милано поради тоа што градските власти не можат да гарантираат дека домот на Милан и Интер ќе биде реконструиран.

„Сан Сиро“ можеби важи за култен стадион во светот на фудбалот, но моментално е далеку од модерните арени и не ги исполнува сите строги барања на УЕФА за организација на финалето во Лигата на шампиони во 2027 година.

Поради фактот што плановите за реконструкција на стадионот се ставени во мирување, УЕФА реши да ја поништи апликацијата на миланскиот стадион и повторно да го објави конкурсот за организација на големото финале што треба да се одигра за три години. Се очекува новиот домаќин да биде објавен во мај или јуни 2025 година.

„Сан Сиро“ претходно четири пати беше домаќин на финалните натпревари во 1965 и 1970 година додека натпреварувањето се викаше Европски Куп, а во новиот формат во рамки на Лигата на шампиони се играа финалиња во 2001 и 2016 година.

Финалето оваа сезона ќе се одржи на „Алијанц арената“ во Минхен, а во 2026 година домаќин ќе биде „Пушкаш арената“ во Будимпешта.

The post УЕФА донесе одлука: „Сан Сиро“ нема да биде домаќин на финалето во ЛШ во 2027 година appeared first on telma.com.mk.