Победникот на Светското фудбалско првенство првпат во историјата, покрај трофејот и златните медали, ќе добие и специјални шампионски прстени. ФИФА одлучи во фудбалот да воведе уште една препознатлива традиција од американскиот спорт. 

Светската фудбалска федерација ќе изработи ограничена серија од вкупно 2.026 прстени, во чест на годината во која се одржува турнирот. Триесет од нив ќе им припаднат на членовите на репрезентацијата што ќе победи во финалето меѓу Шпанија и Аргентина, додека преостанатите 1.996 ќе бидат пуштени во продажба како официјален производ на ФИФА.

¡Al mejor estilo NBA!

La FIFA le ENTREGARÁ ANILLOS a los campeones del #Mundial2026, además del trofeo y las medallas.

Se harán 2026 unidades: 30 para los campeones y los restantes 1996 se venderán como piezas de colecciónpic.twitter.com/OrKIZBli2Y

— Histoporte (@histoporte_) July 16, 2026

На едната страна од прстенот ќе биде прикажан трофејот на Светското првенство, а другата ќе биде приспособена на идентитетот на новиот шампион. Секој прстен ќе биде посебно нумериран и изработен според мерките на сопственикот, а со него ќе се добива и сертификат за автентичност. Капитенот и селекторот веднаш по финалето ќе добијат привремени прстени, додека персонализираните примероци подоцна ќе им бидат врачени на сите 30 членови на победничкиот тим.

Финалето ќе има уште еден силен белег на американската спортска култура. За првпат на едно Светско првенство ќе се одржи музичко шоу на полувремето, по примерот на Супербоул, на кое ќе настапат Мадона, Шакира, БТС и Џастин Бибер. 

На финалето ќе присуствува и американскиот претседател Доналд Трамп, кој заедно со првиот човек на ФИФА, Џани Инфантино, се очекува да му го врачи трофејот на победникот. Трамп не присуствуваше на ниту еден од претходните 102 натпревари на Мундијалот, а минатото лето беше на истиот стадион за финалето на Светското клупско првенство.

The post Мундијалот во американски стил: Шампионите ќе добијат специјални прстени (ВИДЕО) appeared first on telma.com.mk.

Еурофарм Пелистер ги доби противниците во групната фаза од Европската лига на ЕХФ. Македонскиот вицепрвак ќе игра против екипи од три големи ракометни земји – Германија, Шпанија и Полска.

По три последователни сезони во Лигата на шампионите, битолчани претстојната сезона ќе настапуваат во второто по ранг европско клупско натпреварување.

Најсериозен и веројатно најтежок ривал на Еурофарм Пелистер во групата Г ќе биде германскиот Гумерсбах. Во истата група се најдоа и шпанскиот состав Логроњо Ла Риоха и полскиот Гдањск.

Групната фаза почнува на 29 и 30 септември, а шестото и последно коло ќе се одигра на 1 и 2 декември. Првопласираните две екипи од сите осум групи ќе продолжат во плејофот, каде што ќе им се приклучат тимовите што ќе завршат на третото и четвртото место во групите од Лигата на шампионите.

The post Еурофарм Пелистер против екипи од три големи ракометни земји во Европската лига appeared first on telma.com.mk.

Словенечкиот судија Славко Винчиќ ќе ја дели правдата на финалето на Светското фудбалско првенство помеѓу Шпанија и Аргентина, кое ќе се одигра в недела на стадионот во Њу Џерси.

Четириесет и шестгодишниот Винчиќ ќе стане првиот Словенец што судел финале на еден Мундијал, а вкупно 23-ти судија во историјата кому му била доверена оваа задача. За своето назначување бил информиран од првиот човек на Судиската комисија на ФИФА, Пјерлуиџи Колина.

Винчиќ досега судеше на три натпревари на Светското првенство – дуелите Бразил – Мароко и Јордан – Алжир во групната фаза, како и пресметката помеѓу Мексико и Еквадор во шеснаесетинафиналето.

Словенецот има големо искуство од најважните натпревари во европскиот фудбал. Тој го судеше финалето во Лигата на Европа во 2022 година помеѓу Ајнтрахт Франкфурт и Ренџерс, како и финалето во Лигата на шампионите во 2024 година, во кое Реал Мадрид ја совлада Борусија Дортмунд. Беше главен судија и на полуфиналето меѓу Шпанија и Франција на Европското првенство во 2024 година.

Помошници на Винчиќ ќе му бидат сонародниците Томаж Кланчник и Андраж Ковачич, додека Германецот Бастијан Данкерт ќе биде главен во ВАР-собата. Финалето меѓу Шпанија и Аргентина се игра на 19 јули со почеток во 21 часот по македонско време.

The post  Славко Винчиќ ќе го суди финалето на Светското првенство 2026 appeared first on telma.com.mk.

Аргентина ќе ја брани титулата во големото финале на Светското првенство во 2026 година, откако вечерва со драматичен пресврт ја елиминираше Англија со 2-1. „Гаучосите“ во недела ќе се соочат со Шпанија во битката за титулата на стадионот во Њу Џерси.

По слабото прво полувреме, во кое немаше ниту една изгледна шанса и ниту еден удар во рамките на голот, вторите 45 минути донесоа далеку подобар фудбал.

Ентони Гордон ја доведе Англија во водство во 55. минута, по одличната асистенција на Морган Роџерс. Селекторот на „Гордиот Албион“, Томас Тухел, потоа се реши за целосно дефанзивен пристап, а неговиот тим скапо ја плати таквата тактика.

Аргентина тргна со сите сили во напад, а Лионел Меси беше асистент при двата гола. Најпрво Енцо Фернандез со прекрасен удар од далечина израмни на 1-1 во 85. минута, а во втората минута од судиското продолжение Лаутаро Мартинез со глава го матираше Џордан Пикфорд за конечни 2-1.

Аргентина сега има можност да стане првата репрезентација по Бразил во 1962 година што ја одбранила светската титула. Во големото финале во недела, од 21 часот во Њу Џерси, актуелниот шампион ќе се соочи со Шпанија, која синоќа ја совлада Франција со 2-0.

The post Шампионите не се предаваат: Аргентина со пресврт го урна англискиот бедем за пласман во финалето appeared first on telma.com.mk.

Фудбалски класик со огромен историски товар вечерва ќе го даде вториот финалист на Светското првенство во 2026 година. Во Атланта, од 21 часот, Англија ќе го предизвика актуелниот светски шампион Аргентина, а победникот во недела ќе игра против Шпанија.

Ова ќе биде првата пресметка меѓу двете селекции по пауза од 21 година. Нивното големо ривалство го одбележаа „Божјата рака“ и антологискиот погодок на Диего Марадона во четвртфиналето во 1986 година, црвениот картон на Дејвид Бекам и аргентинската победа на пенали во 1998, како и англискиот реванш четири години подоцна. Ова ќе биде нивна вкупно шеста пресметка на Мундијалите. Англија е поуспешна со три победи, додека Аргентина славела двапати, еднаш по изведувањето пенали.

Аргентина сонува за второ финале по ред и за можноста да стане првата репрезентација по Бразил во 1962 година што ја одбранила светската титула. Англија, пак, го игра своето четврто мундијалско полуфинале и атакува на првото финале по триумфот во 1966 година на домашен терен.

Во центарот на вниманието повторно ќе биде Лионел Меси, кој постигна осум гола на турнирот. На спротивната страна најголема опасност се Џуд Белингам и Хари Кејн, автори на 12 од 13-те англиски погодоци. Белингам особено се истакна во нокаут-фазата, бидејќи постигна по два гола против Мексико и Норвешка и беше најзаслужен за пласманот на Англија во полуфиналето.

Томас Тухел нема да смета на повредениот Џордан Хендерсон и суспендираниот Џарел Кванса, додека Деклан Рајс е подготвен да стартува. Двете селекции во нокаут-фазата преживеаја тешки натпревари и пресврти, па во Атланта се очекува уште една драматична битка за место во големото финале.

*Фотографијата е креирана со помош на вештачка интелегенција. 

The post Аргентина ја брани круната, Англија го брка првото финале по 1966 година appeared first on telma.com.mk.

Шпанија се пласираше во финалето на Светското првенство во 2026 година, откако во полуфиналето ја совлада Франција со 2-0 во Арлингтон, Тексас.

Микел Ојаразабал го отвори резултатот од пенал во 22. минута, откако Лукас Дињ го фаулираше Ламин Јамал во шеснаесетникот. Конечните 2-0 ги постави Педро Поро во 58. минута, по одлична комбинација со Дани Олмо.

За Шпанија ова е трета последователна победа над Франција во полуфинален дуел. „Црвената фурија“ славеше со 5-4 во Лигата на нации во 2025 година, а беше подобра и со 2-1 во полуфиналето на Европското првенство во 2024 година.

Шпанците изборија второ финале на светските првенства. Во првото, во 2010 година, ја освоија светската титула. Противникот ќе биде познат утре по полуфиналниот дуел меѓу Аргентина и Англија.

The post Франција повторно падна во полуфинале против Шпанија appeared first on telma.com.mk.

Вардар славеше со 3-2 против КуПС на гостински терен, но не успеа да се пласира во второто квалификациско коло во Лигата на шампионите. „Црвено-црните“ по продолженијата беа елиминирани со вкупни 4-3.

Македонскиот првак одигра многу подобро отколку во Скопје, каде загуби со 2-0, и по 90 минути успеа да ја надомести негативата. Саволаинен си постигна автогол во 59. минута, а Горан Закариќ реализираше пенал во судиското надополнување за 0-2.

Првото продолжение донесе голема драма. Боб Арма намали за КуПС во 100. минута, но Иан Пулеио веднаш ја врати предноста од два гола за Вардар. Домаќините потоа добија пенал, кој Пјотр Паршек го претвори во гол за конечни 2-3.

Вардар со победа се прости од квалификациите за Лигата на шампионите, но европската сезона ќе ја продолжи во второто квалификациско коло во Конференциската лига.

Фото: Јохана Пелтари

The post Вардар победи против Купс, но по продолженија испадна од Лигата на шампионите appeared first on telma.com.mk.

Младата македонска кошаркарска репрезентација до 20 години загуби убедливо од Шведска во третото коло од Европското првенство Б-дивизија, кое се одржува во Братислава.

Шведска ја наметна својата игра уште во првата четвртина, која ја доби со 23-16. Во продолжението само ја зголемуваше предноста, а Македонија немаше соодветна противигра. На полувремето Швеѓаните водеа со 45-32.

Во третиот период негативата драстично се зголеми. Шведска брзо дојде до предност од 20, а потоа и од 30 поени. Нашите младинци во последната четвртина успеаја само да ја намалат разликата за конечни 64-86.

Во македонскиот состав само еден кошаркар имаше двоцифрен учинок. Марко Луканоски запиша дабл-дабл со 15 поени и 13 скока.

За Македонија ова беше втор пораз на турнирот, по оној од Република Ирска. Единствената победа ја оствари на првиот натпревар против домаќинот Словачка. Утре од 21 часот Македонија игра против Азербејџан во последното, петто коло од групата А.

The post Шведска пресилна за младите македонски кошаркари на ЕП Б-дивизија appeared first on telma.com.mk.

Македонската машка ракометна репрезентација до 20 години ја запиша првата победа на Европското првенство во Романија. Во разигрувањето за пласман, нашите младинци ја совладаа Летонија со 35-31.

Мики Лазов беше најефикасен во македонскиот состав со девет гола од исто толку удари. Лука Ѓорѓиевски постигна осум погодоци, а голманот Ѓорѓи Николовски запиша десет одбрани.

Кај Летонија се истакна Валдис Калнинш, кој одигра одличен натпревар и постигна дури 17 гола од 25 удари.

За македонската селекција ова беше премиерна победа на турнирот. Во групната фаза запиша три порази од Данска, Хрватска и Норвешка, а во првиот натпревар од разигрувањето за пласман загуби и од Австрија.

Македонија настапот на Европското првенство ќе го продолжи во разигрувањето за пласман од 17. до 24. место.

The post Лазов перфектен, Македонија ја совлада Летонија за прва победа на ЕП appeared first on telma.com.mk.

Македонските ракометни клубови денеска ги добија своите ривали во Европската лига во женска конкуренција, како и во првото коло од ЕХФ Европскиот куп кај мажите и жените.

Ракометарките на Ѓорче Петров во второто квалификациско коло од Европската лига ќе играат против чешкиот Бањик Мост. Македонскиот шампион ќе биде домаќин на првиот натпревар, кој е закажан за 3 или 4 октомври, а реваншот во Чешка ќе се игра седум дена подоцна.

Победникот од двомечот ќе се пласира во третото квалификациско коло, каде што ќе се приклучат уште осум екипи. Во групната фаза, која почнува на 9 јануари 2027 година, ќе се пласираат 12-те победници од третото коло, заедно со четирите директно пласирани тима.

Во ЕХФ Европскиот куп кај мажите, Тиквеш ќе игра против Еш од Луксембург. Првиот натпревар ќе се игра во Кавадарци на 12 или 13 септември, а реваншот во Луксембург е закажан за 19 или 20 септември.

Македонскиот ракомет ќе има уште три претставници во ова натпреварување. Актуелниот бранител на трофејот Охрид, освојувачот на Купот во 2025 година Алкалоид и Бутел Скопје се директно пласирани во второто коло. Нивните натпревари ќе се играат на 17/18 и 24/25 октомври, додека датумот за ждрепката сè уште не е потврден.

Во женскиот ЕХФ Европски куп, Вардар ќе игра против италијанскиот Бриксен Судтирол. „Вардарки“ првиот натпревар го играат на гостински терен на 3 или 4 октомври, а реваншот во Скопје е седум дена подоцна.

Чаир Скопје, пак, е директно пласиран во третото коло од ЕХФ Европскиот куп и противник ќе добие во октомври.

The post ЖРК Ѓорче Петров со Бањик Мост во Европската лига, Тиквеш и ЖРK Вардар ги добија ривалите во ЕХФ Купот appeared first on telma.com.mk.