Македонската кошаркарска репрезентација вчера со 77-56 ја победи Ирска и се квалификуваше во главните квалификации за Европското првенство во 2029 година. За нашиот тим тоа беше петта победа на исто толку натпревари, а претквалификациите ги завршуваме со гостување кај Луксембург во недела.

Нашите кошаркари очекувано беа задоволни од резултатот и секако постигнатата цел да се пласираме во главната фаза.

„Не очекувавме убедлива победа затоа што Ирска е тврд противник, играше доста физички. Дојдоа во подмладен состав со шест кошаркари од колеџ, што малку нè изненади, но ние влеговме подготвени. Знаевме дека ова е меч кој мора да се добие за следна фаза. Среќни сме и задоволни што успеавме во целта. Сега ни следи Луксембург, против кого исто така одиме на победа и покрај тоа што сме веќе во следната фаза. По нас, Луксембург е најдобра селекција во групата, доста подобра на домашен терен. Ние немаме повеќе што да загубиме, па ќе влеземе максимално и во тој меч“, порача Стојан Ѓуроски.

„Ова беше убедлива победа за нас, ја заслуживме и неа и пласманот во наредниот циклус. Сакаме да победиме и на следниот меч со Луксембург затоа што сакаме перфектен циклус. Не припаѓаме во овие претквалификации, нам ни е местото на повисоко ниво, но чекор по чекор, мислам дека ќе дојдеме до нашата цел“, изјави нашиот најдобар кошаркар Андреј Јакимовски.

Вториот дел од квалификациите за Евробаскетот стартува кон крајот на месец август, а претходно Македонија ќе ги дознае и ривалите во групата. Ќе бидат формирани четири групи со по три репрезентации, а само победниците ќе се пласираат во главната фаза од квалификациите.

The post Јакимовски: Не припаѓаме во овие претквалификации, местото ни е на повисоко ниво appeared first on telma.com.mk.

Македонскиот кошаркарски репрезентативец Андреј Јакимовски и официјално е нов играч на Наполи. Италијанскиот клуб денеска го потврди потписот на двегодишен договор со 24-годишниот крилен кошаркар од Крива Паланка.

Јакимовски минатата сезона настапуваше за Тренто, каде остави одличен впечаток и во италијанскиот шампионат и во Еврокупот. Во лигата имаше просек од 9,3 поени и 4,6 скока, додека во Еврокупот бележеше 10,8 поени и 6,1 скок по натпревар. Најдобриот настап го имаше на гостувањето кај Бурж, кога постигна 30 поени против подоцнежниот освојувач на натпреварувањето.

Наполи го претстави Јакимовски како трето летно засилување во амбициозниот проект за следната сезона. Претходно клубот ги ангажираше Марко Спису и Зек Селјас, а со новиот тим ќе настапува и во Еврокупот.

Македонецот во италијанскиот шампионат ќе има статус на домашен играч, бидејќи поседува италијанско државјанство и дел од младинските денови ги мина во Италија. Тој беше дел од младинскиот тим на Рејер Венеција, а сениорското деби во италијанската кошарка го имаше во Торино во сезоната 2019/2020.

Од 2020 до 2025 година Јакимовски настапуваше во колеџ лигата во САД, најпрво за Вашингтон Стејт, а потоа и за Колорадо. Тој е еден од носителите на македонската репрезентација, а трансферот во Наполи треба да биде уште еден важен чекор напред во неговата кариера.

The post Јакимовски останува во Италија: Потпиша двегодишен договор со Наполи appeared first on telma.com.mk.

Македонската кошаркарска репрезентација загуби убедливо на гостувањето кај Бугарија на пријателскиот натпревар во Самоков. Нашиот тим е во завршна фаза од подготовките за последните два натпревари од претквалификациите за Евробаскетот во 2029 година.

Македонија настапи со подмладен состав, без капитенот Војдан Стојановски, без Андреј Јакимовски, но и без натурализиран кошаркар. Бугарија ја искористи ситуацијата и славеше со убедливи 97-68.

Виктор Ефремовски беше најефикасен во нашата селекција со 13 поени, Виктор Ташовски постигна 12, додека Тома Стојаноски го заврши натпреварот со девет поени.

Репрезентацијата ќе ги продолжи подготовките во Скопје под водство на селекторот Жозеп Марија Берокал. На 2 јули Македонија ќе ја пречека Република Ирска во рамки на претпоследното коло од претквалификациите, а три дена подоцна ќе гостува кај Луксембург, најголемиот ривал за првото место во групата.

Нашата кошаркарска репрезентација моментално е во одлична позиција и има максимален ефект по четири одиграни натпревари. Првопласираните селекции од сите три претквалификациски групи ќе се пласираат во главните квалификации, како и најдобрата второпласирана репрезентација.

ФОТО: КФСМ

The post Подмладената Македонија убедливо поразена од Бугарија во Самоков appeared first on telma.com.mk.

Жељко Обрадовиќ и официјално се враќа на клупата на Панатинаикос. Трофејниот српски стратег потпиша тригодишен договор со грчкиот гигант и по 14 години повторно ќе го предводи клубот со кој ги оствари најголемите успеси во кариерата.

Обрадовиќ го предводеше Панатинаикос од 1999 до 2012 година и во тој период создаде вистинска европска династија. Со „зелените“ освои пет титули во Евролигата, 11 шампионски титули во Грција и седум Купови на Грција.

Српскиот тренер е најтрофејниот стратег во историјата на европската кошарка со вкупно девет титули во Евролигата. Покрај петте со Панатинаикос, европски шампион беше и со Партизан, Хувентуд, Реал Мадрид и Фенербахче.

Обрадовиќ доаѓа на местото на Ергин Атаман, кој си замина по неуспешната сезона за Панатинаикос. Клубот од Атина сега повторно му ја доверува клупата на својата најголема тренерска легенда, со цел да се врати на врвот на европската кошарка.

Според медиумските шпекулации, Обрадовиќ ќе го има и најскапиот тренерски договор во историјата на Евролигата. Наводно, српскиот стратег за трите сезони во Панатинаикос ќе заработи 12 милиони евра, односно по четири милиони евра годишно.

The post Официјално: Обрадовиќ се враќа во Панатинаикос по 14 години appeared first on telma.com.mk.

Анадолу Ефес официјално го потврди враќањето на Дарио Шариќ, кој потпиша договор на две години со можност соработката да биде продолжена за уште една сезона.

Хрватскиот кошаркар се враќа во турскиот гигант по една деценија мината во НБА-лигата. Шариќ претходно го носеше дресот на Ефес во сезоните 2014/15 и 2015/16, пред да замине во најсилната кошаркарска лига во светот.

Триесет и двегодишниот крилен центар беше избран како 12-ти пик на НБА-драфтот во 2014 година. Во НБА настапуваше за Филаделфија, Минесота, Феникс, Оклахома, Голден Стејт, Денвер, Сакраменто и Детроит.

Шариќ во Евролигата досега има одиграно 55 натпревари, со просек од 10,1 поен, 6 скока и 1,8 асистенции. Со неговото враќање, Ефес добива големо засилување под кошевите и важен играч во ротацијата на тренерот Пабло Ласо.

Хрватот е и стандарден репрезентативец на својата земја, со која настапуваше на европски и светски првенства, како и на Олимписките игри во Рио де Жанеиро во 2016 година.

The post Дарио Шариќ се врати во Анадолу Ефес по една деценија во НБА appeared first on telma.com.mk.

Ергин Атаман повеќе не е тренер на Панатинаикос, потврди денеска грчкиот кошаркарски гигант.

Турскиот стратег ја напушта клупата на „зелените“ по три сезони, во кои освои една титула во Евролигата и двапати го одведе тимот на фајнал-фор турнирот. Неговото заминување означува крај на еден успешен период за атинскиот клуб, кој под негово водство повторно се врати во европскиот врв.

Атаман пристигна во Панатинаикос во летото 2023 година, во момент кога клубот се наоѓаше во тешка ситуација и претходната сезона ја заврши дури на 17-тото место во Евролигата. Турскиот тренер дојде со големо искуство и реноме, откако претходно со Анадолу Ефес освои две последователни титули во најелитното европско натпреварување.

Уште во првата сезона во Атина, Атаман направи голем пресврт. Панатинаикос го предводеше до седмата евролигашка титула во клупската историја, а истата сезона го освои и грчкото првенство. Со тоа, тој за кратко време успеа да го врати клубот меѓу најдобрите европски екипи.

Сепак, последната сезона беше неуспешна за Панатинаикос. Тимот остана без титулата во грчкото првенство и не успеа да обезбеди пласман на фајнал-фор турнирот во Евролигата, а единствениот трофеј што го освои беше Купот на Грција.

Панатинаикос сега ќе треба да бара нов тренер, кој ќе го наследи Атаман и ќе се обиде да го продолжи проектот што турскиот стратег го изгради во изминатите три години.

The post Атаман си замина од Панатинаикос по три сезони и една евролигашка титула appeared first on telma.com.mk.

Македонската кошаркарска репрезентација денеска ги почна подготовките за последните два натпревари од претквалификациите за Европското првенство во 2029 година. Селекторот Жозеп Марија Берокал на стартот нема да ги има на располагање сите повикани кошаркари, но во следниот период се очекува комплетирање на ростерот.

Репрезентативците утринава го одработија првиот тренинг во салата „Лазар Лечиќ“ во Скопје. Берокал ќе има нешто повеќе од две недели да го подготви тимот за дуелите со Република Ирска и Луксембург, а во текот на подготовките стручниот штаб ќе треба да одлучи и кој од натурализираните играчи ќе се приклучи на составот.

На списокот е и нашиот најдобар кошаркар Ненад Димитријевиќ, кој сè уште има клупски обврски со Баерн Минхен во германското првенство. Покрај стандардните репрезентативци, Берокал повика и неколку млади играчи, кои ќе добијат можност да се наметнат и да се изборат за место во конечниот список.

Македонија е лидер во групата А со максимални четири победи од исто толку натпревари. На 2 јули во Скопје ја пречекуваме Република Ирска, а три дена подоцна во последното коло гостуваме кај Луксембург.

Во главната фаза од квалификациите ќе се пласираат победниците од трите претквалификациски групи, како и најдобрата второпласирана селекција.

The post Кошаркарите ги почнаа подготовките за решавачките претквалификациски дуели appeared first on telma.com.mk.

Њујорк победнички ја отвори финалната серија во НБА-лигата и славеше на гостувањето кај Сан Антонио. Никс ја продолжија фантастичната победничка низа во плеј-офот сезонава.

Њујорк имаше одличен финиш на натпреварот утринава и со серија од 11-0 дојде до триумф од 105-95 на гостувањето кај Сан Антонио. Џејлен Брансон ги предводеше гостите со 30 поени, Карл-Ентони Таунс имаше 18 поени и 12 скока, додека ОЏ Ануноби го заврши натпреварот со 17 поени.

Кај Спарс, Виктор Вембањама постигна 26 поени и додаде 12 скока, а Стефон Касл имаше 17 поени.

За Никс ова е 12-та победа по ред во плеј-офот сезонава, откако единствените два пораза ги претрпеа во првата рунда против Атланта. Потоа со по 4-0 ги елиминираа Филаделфија и Кливленд.

Интересно е тоа што Њујорк стана првиот тим во историјата што го победил Сан Антонио во првиот натпревар од една финална серија. Спарс се домаќини и на вториот натпревар, кој е закажан за в сабота во 2:30 часот наутро по македонско време.

The post Никс направија „брејк“ против Сан Антонио на стартот на финалето (ВИДЕО) appeared first on telma.com.mk.

Денеска, 3 јуни, ненадејно почина еден од најдобрите спортски коментатори на Балканот, Един Авдиќ, во 47. година од животот.

Авдиќ беше еден од најпрепознатливите гласови на малите екрани, бидејќи со неверојатна пасија, енергија и знаење ги пренесуваше натпреварите од кошаркарските терени.

Роден е на 19 јуни 1979 година во Сараево, Босна и Херцеговина. Ги мина сите младински категории на кошаркарскиот клуб Босна, но никогаш не стана професионален кошаркар.

Дипломирал новинарство на Факултетот за политички науки во Сараево. Во својата новинарска кариера работеше во Федерална телевизија и ОБН, а најголемата регионална препознатливост ја стекна на Арена Спорт, каде долги години ги коментираше најголемите кошаркарски натпревари.

Во последните месеци имаше свој поткаст, во кој му гостуваа големи кошаркарски имиња од Балканот и пошироко.

The post Почина легендарниот кошаркарски коментатор Един Авдиќ appeared first on telma.com.mk.

Сан Антонио ја симна Оклахома од тронот во НБА-лигата. Спарс ја добија „мајсторката“ на гостински терен и се пласираа во големото финале против Њујорк.

Сан Антонио славеше со 111-103 во Оклахома во седмиот решавачки натпревар од финалето на Западната конференција. НБА-лигата ќе добие нов шампион, бидејќи одбраната на титулата за Тандер заврши утринава.

Виктор Вембањама ги предводеше гостите со 22 поени и седум скокови, а голема помош имаше од Џулијан Шампени, кој постигна 20 поени. Кај Оклахома, двократниот МВП Шеи Гилџеус-Александер го заврши натпреварот со 35 поени и девет асистенции.

Сан Антонио во големото финале ќе се соочи со Њујорк, во реприза на пресметката од 1999 година, кога Спарс ја освоија својата прва шампионска титула. Предводени од легендарниот тренер Грег Попович, Сан Антонио потоа освои уште четири титули, а последната во 2014 година. Никс, пак, немаат шампионски пехар уште од 1973 година.

Финалната серија почнува во четврток наутро во 2:30 часот, а домаќин на првиот натпревар е Сан Антонио.

The post Сан Антонио ја детронизираше Оклахома во НБА-лигата (ВИДЕО) appeared first on telma.com.mk.