Водата за пиење во Гостивар е забранета за употреба, а пумпи поставени во корито за отпадни води во Вруток и мешање со водата за пиење најверојатно е причината поради која над 1.000 гостиварци завршија во болница со здравствени проблеми. Од гостиварскиот „Водовод и комуналец“ велат дека е шпекулација и дека луѓето се затруле од храна.

Гостиварци сведочат за симптомите со кои се соочиле тие и нивните блиски. Според последните официјални податоци од гостиварската болница епидемијата почнала пред 72 часа.

„Ве известуваме дека поголем број на пациентите се со исти симптоми како повраќање, дијареја, болки во желудникот, температура, омалаксаност, итн. Најголем број на пациентите со овие симптоми има во Инфектологија, Детско одделение и во Ургентна Единица. За овие денови со овие симптоми се пријавени околу 1.000 -1.200 пациенти“, велат од ЈЗУ Општа Болница „Д-р Ферид Мурад’’во  Гостивар.

Полициски екипи, вчера попладне ги откриле пумпите поставени во корито за отпадни води во селото Вруток. Засега нема приведени лица, истрагата се однесува на кривичниот дело „загадување на вода за пиење“ по член 219 од КЗ.

„Постојат основи на сомневање дека Јавното претпријатие „Водовод“, во соработка со Општина Гостивар, поставило три пумпи во корито на истечни отпадни води преку кои се вбризгувала вода директно во главниот цевковод што го напојува градот. Оваа активност најверојатно била преземена со цел да се зголеми притисокот во мрежата поради недостиг на питка вода. Се работи за води кои протекуваат од дождови од разни изворчиња, кои се собираат во една линија и таа вода често се користи во канал за наводнување на земјоделието и во базени, односно во рибници“, рече Фатмир Реџепи, портпарол на СВР.

Директорката на гостиварски „Комуналец“ вели дека станува збор за шпекулации и пропаганда и дека луѓето се затруле од храна. Потврди дека се правел испуст на водата од мрежата, но тврди дека ниту капка вода од каналот не влегла во системот за водоснабдување.

„Пред некое време се направи една симулација дали ќе биде функционална новата линија што ја пуштаме, односно што ќе ја пуштаме од изворот Вруток. Значи таа вода не беше користена, во првиот испуст се празнеше линијата и после нормално се пушташе пак истата вода што беше од извор. Ние сме во контакт со Општа болница Гостивар, информациите кои што ги добиваме од таму, дека е од јадење и од високите температури. Има граѓани што викаат дека не ја користат водата за пиење купуваат вода и истите се со овој вирус“, вели Артана Асани, директорка на ЈП „Комуналец“ во Гостивар“.

Обвинителството отвори предмет и издава насоки на МВР, но и на другите агенции кои се вклучени како ИЈЗ и АХВ. Обвинителот Савевски сè уште чека на првичните официјални информации за да може да се квалификува делото.

По наредба на Обвинителството, ИЈЗ синоќа подигнало мостри од водата за пиење од четири локации.

„Екипата е вратена во раните утрински часови во Институтот каде што ги чекаше друга приправна екипа од Институтот која што добиените мостри ги постави за анализа. Во моментот тече микробиолошката анализа на примероците и тече физичко хемиската анализа на примероците. Во однос на првичните резултати за микробиолошките анализи очекуцваме дека првичните резултати ќе бидат наредните 48 часа согласно протоколите“, изјави директорката на ИЈЗ, Марија Андоновска.

Агенцијата за храна и ветеринарство (АХВ) забрани да се користи водата од чешмите.

„Со надзорот утврдено е дека во главниот цевковод на водоводната мрежа, на диво, без одобрение поставена е пумпа која директно вбризгува вода од реката Вардар во овој водоснабдителен систем“, известија од АXB.

Засега единствен без реакција или официјална информација е градоначалникот на Гостивар, Ваљбон Лимани.

Огнен Чанчаревиќ

The post Пумпи во корито за отпадни води во Вруток можна причина за над 1.000 гостиварци да завршат во болница appeared first on telma.com.mk.

Откако Стојна Димитровска најави на социјалните мрежи дека ќе наплаќа по 5 евра за секој што сака да влезе на локалитетот Камени кукли, денеска обвинителството побара притвор за нејзиниот сопруг. На објавата од вчера на Фејсбук дека ќе издава и фискални сметки, локалитетот го посетиле инспектори на УЈП. Но нејзиниот сопруг кој е британски државјанин фрлал камења врз нив и нивното возило.

На 16 јули, на локалитетот “Камени Кукли” во селото Куклица, Кратово, осомничениот 41-годишен британски државјанин го спречил постапувањето на двајца даночни контролори кои вршеле службени дејствија на контрола во однос на претходно поставени обележја за привремена забрана за вршење дејност, 

Сопругот на Димитровска е приведен, осомничен за Спречување службено лице во вршење службено дејствие и за него Основниот суд во Куманово одреди осум дена притвор.  Стојна Димитровска Боотх пак има судска забрана да се доближува до локалитетот Куклица, но и таа повторно беше затекната таму изминатиот викенд. Полицијата ја затекна по пријава од посетители.

Ве известуваме дека од страна на Основниот суд Кратово против С.Д.Б. донесено е решение со кое се определуваат мерки на претпазливост, во рамки на кои е и забрана за посетување на локалитетот Куклица, но С.Д.Б. на 11.07.2026 била затекната на локалитетот. По целосно документирање на случајот ќе биде поднесена соодветна пријава, велат од МВР.

Куклица е природно богатство од јавен интерес, но до него се стигнува преку пат што минува низ приватни имоти. Еден од нив е и имотот на луѓе кои им го дале на користење на семеството Димитровски. Телма веќе објаваи дека тие подолго време наплаќале по 150 денари на посетителите бидејќи токму таму се наоѓа влезот на локалитетот. Во јавност излегоа и видео материјали кои покаќуваа дека таа наплаќа и за паркинг. Во меѓувреме се уштетрае спорот меѓу Општина Кратово и здружението Извор за тоа кој да стопанисува со Куклице.

Билјана Николова

The post Притвор за сопругот на Димитровска која наплаќаше за Куклица, фрлал камења кон инспектори на УЈП appeared first on telma.com.mk.

Ослободителната пресуда на Груевски е последица на законските измени во Кривичниот законик (КЗ) донесени од претходната влада на СДСМ и ДУИ и како резултат на тие законски измени имаше и ќе следат многу политички амнестии, рече премиерот Христијан Мицкоски кој ја коментираше пресудата за „Талир 2“, предмет во кој првообвинет беше експретседателот на ВМРО-ДПМНЕ, Никола Груевски за незаконска изградба на „Белата палата“.

„За другиот дел од пресудата и лицето кое што е опфатено со другиот дел од пресудата, од она кое што можев да го прочитам од одговорот на Кривичниот совет од Основниот суд, можам да заклучам дека станува збор за последица од законските измени во Кривичниот законик донесени од претходната влада на СДСМ и ДУИ. И како резултат на тие законски измени, ние кажавме, во минатото имаше многу политички амнестии, но многу политички амнестии ќе следат. За жал, кога еднаш ќе направите грешка, таа грешка потоа станува правило и ве следи. А што се однесува до најголемата политичка партија во државата, ВМРО-ДПМНЕ, можам да кажам дека конечно правдата е задоволена“, рече Мицкоски.

Мицкоски вели дека со случаи како „Талир 1“ и „Талир 2“, ВМРО-ДПМНЕ била предмет на политички прогон и ги нарече измислени случаи. За делот на пресудата со кој се одби барањето на Обвинителството за конфискација на партискиот имот, Мицкоски оцени дека е донесена „пресуда која е во согалсност со правдата и очекувањата на граѓаните“.

„Мојот став е многу јасен. ВМРО-ДПМНЕ во тој период кога беше предмет на политички прогон и би рекол еден вид на агресија од страна на претходната Влада, измислија случаи кој не постојат, како што е „Талир 1“ и „Талир 2“. Вчера, конечно, судот што се однесува до политичката партија ВМРО-ДПМНЕ донесе пресуда која што е пресуда во согласност на правдата и сето она кое што претставува очекување на граѓаните“, рече Мицкоски.

По 8 години судење, судот вчера донесе ослободителна пресуда за Груевски и го одби барањето на обвинителството за конфискација на партискиот имот.

Измените во КЗ го ослободија Груевски од „Талир 2“ – одбиена конфискацијата на партискиот имот

The post Пресудата за Груевски е резултат на измените на КЗ што ги донесоа СДСМ и ДУИ поради кои имаше многу политички амнестии, а многу и ќе следат, рече Мицкоски appeared first on telma.com.mk.

The post Го користел владиниот лирџет за приватни посети, сe возел со рент-а-кар платен со државни пари – екс директорот на СОЗР е обвинет за злоупотреба на 130 000 евра appeared first on telma.com.mk.

The post Претставничкиот дом на САД гласаше за укинување на летно и зимско сметање на времето appeared first on telma.com.mk.

Еден час гори  пожарот во атарот на с. Бајково, општина Ново Село, на падините на планината Огражден.

Поради зголемена опасност од ширење на пожарот и опасност по црквата Св. Петар и Павле, во секој момент ќе полетаат два ер трактори на ДЗС – најави Стојанче Ангелов од Дирекцијата за заштита и спасување.

Пожарот изби во 16:30 часот а го гаснат струмичките пожарникари и доброволците од ДПД Рис, како и неколку граѓани кои помагаат во заштита на црквата.

The post Граѓани го гаснат огнот што се доближува до црквата во Бајково – се чека помош од ер тракторите appeared first on telma.com.mk.

На месец и пол пред да застари предметот екс премиерот Никола Груевски доби ослободителна пресуда за предметот Талир 2. Судијката Даниела Алексовска Стојановска ја одби и конфискацијата на партиското седиште на ВМРО ДПМНЕ. Повеке од еден час објаснуваше зошто во 2022 пресудила 6 години затвор за екс премиерот а сега ослободителна. Како главна причина ги наведе измените на КЗ од 2023 поради кои обвинителството и го преквалификуваше делото.

„Ваквата ослободителна пресуда е исклучиво резултат на донесувањето на Законот за изменување и дополнување на Кривичниот законик во 2023 година, а како директна последица на кој што беше и укинувањето на првостепената пресуда во овој предмет, како што тоа го констатира и Апелациониот суд Скопје во својата одлука.

Судот ќе истакне дека и покрај тоа што оваа пресуда е сосема различна од претходно донесената во конкретниов предмет, сепак анализата и оценката на доказите, утврдените факти и заклучоците изведени од страна на судот останаа непроменети, така што при постоење на истите докази, врз основа на кои судот претходно утврди дека е сторено предметното кривично дело со искористување на службената положба и овластување, цени дека при постоење на истите тие докази, не се докажа надвор од разумно сомнение дека делото е сторено со друг вид на дејствија, односно со пречекорување на овластувањата и со неизвршување на службената должност“, рече судијката Даниела Алексовска Стојановска

Според обвинението договорот со Бетон за изградба на партиското седиште на ВМРО ДПМНЕ бил направен спротивно на законите за Финансирање на политички партии и за Облигациони односи  а партијата стекнала над 507 милиони денари.( над  8 милиони евра)

Со денешната пресуда  покрај тоа што падна и конфискацијата, државата ќе треба да ги надомести и трошоците за судењето кое почна во 2018 година, а Апелација ја укина осудителната пресуда пред две години. Првично беше обвинет и екс генералниот секреатр на партијата Кирил Божиновски кој првично доби условна казна, а по законските измени му застаре делото. Пред крајот на судењето дојде и до промена на обвинителот. Ленче Ристоска си поднесе оставка откако  државниот обвинител ги повлече овластувањата на обвинителите кои судеа предмети од обвинителства кои не им се матични и остана без предметите Талир 1 и 2, а претходно и Советот на јавни обивнители не утврди дека премиерот ја нарушил нејзината самоостојност.

Обивнителството е на потег дали ќе се жали  но делото застарува на 31 август годинава.

Судијката Алексовска Стојановска лани беше на мета на критики од владеачката ВМРО ДПМНЕ  кои бараа Судскиот совет да ја разреши по пресудата за Јованов на кој му определила поправен дом, а тој подоцна ја прегази Фросина Кулакова. Држеа и прес конференции со обвинување дека во нејзиот семеен дом во Ранковци бил сместен штабот на СДСМ.

Елена Ивановска

The post Измените во КЗ го ослободија Груевски од „Талир 2“ – одбиена конфискацијата на партискиот имот appeared first on telma.com.mk.

Со ова партнерство, НЛБ Банка ја продолжува својата заложба за поддршка на културата, музиката и настаните што создаваат вредни искуства за заедницата, со посебен фокус на младата популација и на корисниците на NLB Next пакетот за млади.

На прес-конференцијата како специјални гости присуствуваа Дупер и Слаткаристика, две големи домашни музички имиња, чии концерти се дел од програмата наменета за младата публика. По официјалниот дел беше организирано дружење на артистите со младите посетители, кои си заминаа со бесплатниот NLB Next пакет за млади и влезници за концертите.

Концертна сезона за различни генерации публика Летната концертна сезона е осмислена како музичка програма што ги поврзува различните генерации публика, од младите кои живеат динамично, дигитално и во чекор со своите интереси, до клиентите кои уживаат во музика блиска до нивниот вкус, навики и очекувања.

Дел од концертите се наменети за NLB Next генерацијата, за која музиката, дружењата, патувањата и новите искуства се природен дел од секојдневието, додека другите настани носат содржина за останатите клиенти на Банката и пошироката публика. На овој начин, партнерството меѓу НЛБ Банка и Прагма продукција создава платформа што ги обединува младешката енергија и музичките вкусови на повеќе генерации.

За младите, NLB Next се надоврзува на нивниот животен стил, современ, мобилен и исполнет со избори, додека за останатите генерации е подготвена внимателно избрана музичка содржина, која носи квалитетно концертно искуство и дополнителна вредност.

Со ваквиот пристап, НЛБ Банка го зајакнува присуството во сегментот на младите, но истовремено ја потврдува посветеноста кон сите останати, нудејќи им музички доживувања што се блиски до нивните интереси и начинот на кој сакаат да го поминат летото. „Со NLB Next сакаме да бидеме онаму каде што се младите, во нивниот ритам, нивните интереси и нивните искуства.

Музиката е еден од најсилните начини за поврзување со младата генерација, а ова партнерство ни овозможува да им понудиме повеќе од банкарство, можност за нови доживувања, забава и привилегии што се дел од нивното секојдневие. NLB Next е креиран како современо, дигитално и бесплатно банкарско решение за млади од 18 до 25 години, но и како платформа која ги следи нивните NEXT чекори, од прва сметка и прва плата, до први големи музички искуства“. – изјави Ивона Галиќ Петков, Самостоен советник за односи со јавност во НЛБ Банка.

„Летната концертна сезона 2026 ја подготвуваме како програма што ќе понуди разновидни музички доживувања, од големи регионални до домашни артисти кои имаат силна врска со младата публика. Со НЛБ Банка како партнер, оваа сезона добива дополнителна вредност бидејќи преку музиката се поврзуваме со различни генерации публика и создаваме искуства што се паметат. Веруваме дека заедно ќе реализираме лето исполнето со квалитетна музика, добра енергија и концерти блиски до вкусот на секој посетител“. – изјави Кристијан Стефановски од Прагма продукција.

Како артисти кои имаат силна врска со младата публика и чија музика е дел од нивното секојдневие, Дупер и Слаткаристика ги најавија своите настапи како дел од концертната програма за младите. Дупер е еден од најпрепознатливите современи македонски бендови, познат по свеж звук, позитивна енергија и песни што лесно се поврзуваат со младата генерација.

Слаткаристика, пак, е едно од највлијателните имиња на домашната хип-хоп сцена, артист со препознатлив стил, силна концертна енергија и публика која го следи со години.

 „Многу сме задоволни од соработката и целата организација, ова е една од ретките можности млади музичари од Македонија да соработуваат со идоли од нивната генерацијa. Соработуваме со Слаткар кој што сме го гледале на телевизија, ќе му бидеме гости и на концертот. За добра соработка треба да има и добра дружба и ние тоа го имаме. Мислам дека ова ќе биде навистина успешна соработка“, изјавија членовите на Дупер.

The post НЛБ Банка и Прагма продукција ја најавија големата летна концертна сезона 2026 appeared first on telma.com.mk.

Никола Груевски е ослободен од обвинението за „Талир 2“ за изградба на партиското седиште во центарот на Скопје, а одбиено е и барањето на Обвинителството за одземање на партискиот имот.

Судот дополнително ќе одлучи дали ќе го поништи одредениот притвор на обвинетиот Никола Груевски за овој предмет.

Според судијката, „Обвинителството не докажа дека обвинетиот Никола Груевски надвор од разумно сомневање го сторил делото“. Во образложението на пресудата, судијката објаснуваше зошто сегашната пресуда е ослободителна, за разлика од првичната пресуда донесена од истиот Суд кога Никола Груевски и поранешниот генерален секретар на партијата, Кирил Божиновски, беа осудени на 6 години затвор и на условна казна затвор и рече дека пресудата е последица на измените на Кривичниот законик кои беа донесени во 2023 година.

Судијката елаборираше  дека  измените на кривичниот законик го принудија Обвинителството да го преквалификува делото од злоупотреба на службената положба преку „искористување на службените дејствија“  koe  беше декриминализирано,  и во изменетиот обвинителен акт да го обвини Груевски дека инкриминирачките дела ги сторил со пречекорување на овластувања и неизвршување на службената должност”

Но, иако кривичното дело беше променето, Обвинителството останало да го докажува делото со истите докази – забележа судијката, која споредувајќи ги двете дела според кривичната терминологија, заклучи дека „не може да се тврди дека некој ги пречекорил овластувањата кога воопшто немал такви овластувања“.

„Со изменетиот опис на обвинението и на фактите, Судот, оценувајќи го секој доказ, заклучи дека Обвинителството не докажа надвор од разумно сомневање дека го сторил кривичното дело пречекорување на службените овластувања“ – наведе судијката.

Груевски беше обвинет дека спротивно на најмалку два закони – за финансирање на партии и за облигациони односи – избрал и склучил договор со инвеститор за изградба на партиско седиште, иако знаел дека тоа е незаконски и дека партиите не смеат да остваруваат имотна корист преку договори со приватни инвеститори кои економски зависат од партијата на власт. Воден од материјален интерес, Груевски склучил договор за изградба на партиско седиште според неговите желби, притоа не водејќи сметка ниту за цената на чинење, ниту за размерот на седиштето, а партијата стекнала над 500 милиони денари.

За да прикријат дека веќе е избрана фирма за градење на седиштето, Груевски и Божиновски – кој тогаш бил генерален секретар – договориле да се претстави избор на најповолен понудувач, при што Божиновски лично го организирал и го контролирал јавниот повик.

„Занемарувајќи ја состојбата на зависност на правната фирма која 70 проценти од приходите ги остварувала со склучени договори со државни органи, јавни установи и претпријатија, пред да биде спроведена постапката договориле да го изградат новото партиско седиште кое отстапувало и од условите и од површината на парцелата според ДУП-от“.

Обвинителството има право да ја обжали денешната пресуда, но предметот застарува
на 31 август.

The post Судот го ослободи Никола Груевски за „Талир 2“ и го одби барањето на Обвинителството за конфискација на партискиот имот appeared first on telma.com.mk.

Никогаш не сум помислувал дека ќе газам врз книги во кои е вложено толку многу љубов, посветеност, ноќи непроспиени во кои тие ја имаа сета мудрост во таа „битка со ветерници“, вели Душко Крстевски професор по македонски јазик и книжевности истакнат преведувач  кој дојде да им помогне на своите пријатели и колеги во книгоиздателството Антолог. Во поплавата во магацинот на оваа издавачка куќа во Кисела Вода се уништени над 50.000 книги на домашни и странски автори.

„Ова е една голема загуба. На некои од овие книги сме им биле и кумови, сме ги промовирале по фестивали, сум правел поткасти и никогаш не сум помислил дека еден ден ќе морам буквално да ги собирам како трупови“, вели Душко Крстевски, професор по македонски јазик и книжевност и преведувач.

Книжевни светови ничкосани за само половина час, класици, современи автори, литература за деца кои треба да отворат нови хоризонти на различни генерации сега низ тишина се складираат на камионите за отпад.

„Целиот магацин е поплавен околу едно метро од земја. Оштетено е се во тој еден метар, а и над него, бидејќи водата особено кога станува збор за хартија ја допира и полека се шири. И вие не можете толку артикли во еден момент да ги спасите“, рече Жарко Кујунџиски, книгоиздателство „Антолог“.

27 години вложен труд кој во континуитет пркосеше на минливоста, сивилото, и конзумеризмот на кој сведочиме. Се уште сум во шок и покрај тоа што надлежните институции помогнаа, семејството и луѓето од фелата веднаш дојдоа да помогнат, вели Кујунџиски. Финансиската штета е огромна и таа тек ќе се проценува, но емотивната нема цена.

„Ова е непроценливо лично за сите нас, за аворите. Тука има мои книги, книги за деца сликовници, книги за возрасни што сум ги објавил. Ги фаќам ги ставам тука треба да се изнесат надвор. Тоа е многу тешко за еден автор. Имаме преку 100 македонски автори со кои соработуваме, странски автори , Толстој, Достоевски, какви било други книги. Навистина 27 години, јас навистина не сум знаел дека ова може да се случи, па да ги ставам доле . Кога да ставам доле себеси, друг да ставам доле, македонец, странец, класик, некласик“, изјави Жарко Кујунџиски, книгоиздателство „Антолог“.

Голем број писатели, проследувачи на книжевноста и издавачки куќи потсетија дека во вакви моменти е важна солидарноста на надлежните институции, книгоиздателствата, печатниците,  но и читателите кои ќе помогнат во надминување на оваа состојба, секој на свој начин.

Нина Стефанова

The post Над 50.000 книги уништени во поплавата во магацинот на “Антолог“ appeared first on telma.com.mk.