Ракометарите на Вардар утре ќе ги дознаат противниците во групната фаза од Лигата на шампиони на ЕХФ. Поранешниот двократен европски првак се враќа во елитното натпреварување по четири години пауза, откако изминатата сезона ја освои шампионската титула во домашната Суперлига.

Новата сезона носи и нов формат во Лигата на шампиони. Во машка конкуренција ќе учествуваат 24 екипи, поделени во шест групи по четири тима. Првите две екипи од секоја група ќе продолжат во главната фаза, каде 12-те квалификувани тимови ќе бидат поделени во две групи. Третопласираните и четвртопласираните екипи од групната фаза ќе се преселат во Европската лига.

Вардар пред ждрепката е сместен во четвртиот барабан заедно со Архус, Целје, Партизан, Криенс-Луцерн и Кристијанштад. Од третиот барабан можни противници на македонскиот шампион се Загреб, ГОГ, Колстад, Висла Плоцк, Порто и Динамо Букурешт.

Во вториот барабан се Монпелје, Пари Сен Жермен, Фуксе Берлин, Мелсунген, Пик Сегед и Кјелце, додека најсилниот барабан го сочинуваат Алборг, Барселона, Нант, Магдебург, Веспрем и Спортинг.

Ждрепката ќе се одржи утре во 11 часот во Виена.

The post Вардар ги чека ривалите во Лигата на шампиони: Гигантите демнат од првиот барабан appeared first on telma.com.mk.

Ракометниот клуб Еурофарм Пелистер денеска го објави името на деветтото засилување за следната сезона. Повремениот српски репрезентативец Алекса Колаковиќ потпиша договор со битолскиот клуб.

Колаковиќ има 28 години и игра на позицијата среден бек. Во Македонија доаѓа по шест сезони минати во француското првенство. Четири сезони настапуваше за Сан Рафаел, а последните две за Шартр. Во досегашната кариера има и шест настапи за репрезентацијата на Србија.

Со Еурофарм Пелистер потпиша едногодишен договор, со можност соработката да биде продолжена на уште една сезона.

За новиот тренер Лино Червар, Колаковиќ е вкупно деветто засилување по Серафимов, Котар, Мехмедовиќ, Џелетовиќ, Татар, Белистојаноски, Басанесе и Џелиловиќ.

Еден од најважните потези за „пелистерци“ во пресрет на новата сезона е и останувањето на капитенот Филип Кузмановски, кој го продолжи договорот со клубот.

Фото: РК Еурофарм Пелистер/Фејсбук

The post Еурофарм Пелистер се засили со српскиот бек Алекса Колаковиќ appeared first on telma.com.mk.

Ракометарите на Охрид го освоија ЕХФ Европскиот куп, откако вечерва во салата „Билјанини Извори“ ја победија Татабања со 31-25 во реванш-финалниот натпревар. Охриѓани до првиот трофеј во својата историја, и тоа европски, стигнаа со двојна победа, бидејќи славеа и на првата средба во Унгарија со 29-28.

Македонскиот тим доминираше пред домашните навивачи, иако на полувремето имаше минимална предност од само 12-11. Најголем „виновник“ за тоа беше гостинскиот голман Ариан Андо, кој имаше дури 11 интервенции во првите 30 минути.

Во второто полувреме момците на тренерот Борис Ројевиќ беа многу посигурни во нападот. Охрид во неколку наврати имаше водство од пет голови, а Татабања најмногу се доближи на само два гола негатива. Домашниот тим покажа квалитет и искуство во финишот и мирно го затвори натпреварот за конечни 31-25.

Косуке Јасухира беше најефикасен во тимот на Охрид со девет голови и одлично го замени најдобриот стрелец Анте Иванковиќ, кој заработи директен црвен картон уште во 20-тата минута. Тилен Стрмљан постигна шест голови, Томислав Јагуриновски реализираше четири, а Кристијан Пилиповиќ на голот имаше 13 интервенции.

Охрид го наследи Алкалоид на тронот во ЕХФ Европскиот куп, откако скопскиот клуб лани го освои ова натпреварување. Европскиот пехар останува во Македонија.

The post „Билјана кајче веслаше“ ќе ечи крај езерото: Охрид го освои ЕХФ Купот appeared first on telma.com.mk.

Ракометниот клуб Охрид го делат уште 60 минути од освојување на Европскиот куп на ЕХФ. Тимот од крај езерото има шанса да го задржи пехарот во Македонија, откако ова натпреварување лани го освои Алкалоид.

Момците на тренерот Борис Ројевиќ имаат позитивен резултат од првата средба во Татабања, односно победа од 29-28, па сè освен пораз вечерва ќе го промовира Охрид во европски шампион.

Реванш-финалниот натпревар се игра вечерва од 20 часот во салата „Билјанини Извори“, која беше распродадена веднаш откако билетите беа пуштени во продажба.

„Кога започна Европскиот куп, Татабања беше апсолутен фаворит. Кога размислувавме за ждрепката, се молевме само да ја добиеме Татабања што е можно подоцна, бидејќи беше апсолутен фаворит.

Меѓутоа, ние имаме добар резултат од Татабања. Сметам дека требаше да биде и подобар, но да не се навраќам наназад што сè се случуваше. Во таа ситуација ќе ни беше полесно.

Го имаме резултатот што го имаме. Зад себе ќе го имаме целиот град Охрид, а тоа го чувствуваме низ сите овие денови. Тензијата малку расте и сите едвај чекаме натпреварот да почне што побрзо“, изјави тренерот Ројевиќ во пресрет на вечерашниот натпревар.

The post Охрид пред историска ноќ: Градот го чека европскиот пехар appeared first on telma.com.mk.

Охрид го делат уште 60 минути од трофејот во ЕХФ Европскиот куп, откако денеска славеше минимална победа од 29-28 на гостувањето кај Татабања во првиот финален натпревар.

Нашиот претставник може да жали што не дојде и до поубедлива победа, бидејќи водеше во најголем дел од натпреварот. Охрид имаше највисоки плус седум во првото полувреме, а во вториот дел и предност од шест голови.

Охриѓани наметнаа темпо уште од самиот старт, а по серијата од 4-0 дојдоа до водство од 12-5. Татабања имаше период од осум минути без постигнат гол, бидејќи одбраната на нашиот тим беше на висина на задачата, предводена од расположениот голман Кристијан Пилиповиќ. На полувремето резултатот беше 13-8 за Охрид.

Момците на Борис Ројевиќ не застанаа ниту во второто полувреме, па Охрид продолжи да доминира на теренот. По нова серија од 3-0, нашиот тим поведе со 25-19. Сепак, следуваше криза во нападот, а Татабања направи серија од 5-0 и ја искористи играта со играч повеќе по двете брзи исклучувања кај Охрид. Впрочем, Охрид дури една третина од натпреварот играше со играч помалку, бидејќи доби 10 исклучувања.

Унгарците дури се заканија дека можат да слават во финишот, бидејќи првото водство на натпреварот го имаа во последната минута, кога поведоа со 28-27. Сепак, најпрво Анте Иванковиќ израмни, a победничкиот гол за Охрид го постигна Дарко Ѓукиќ на само шест секунди до крајот. Татабања не реализираше во последниот напад, па Охрид славеше со 29-28.

Иванковиќ и Ѓукиќ со по седум голови беа најдобри кај Охрид во нападот. Кај Татабања, Бенедек Елес постигна девет голови, додека македонскиот интернационалец Филип Талески двапати се запиша во листата на стрелците.

Реваншот се игра за седум дена во Охрид, во салата „Билјанини Извори“. За потсетување, ЕХФ Европскиот куп минатата сезона го освои Алкалоид, па ако тоа му успее и на Охрид, пехарот ќе остане во Македонија втора година по ред.

ФОТО: ГРК Охрид

The post Охрид на чекор до европски трофеј: Минимална победа кај Татабања во првото финале appeared first on telma.com.mk.

Ракометарите на Еурофарм Пелистер славеа на гостувањето кај Охрид во дербито на 9. коло од плеј-офот и направија голем чекор кон обезбедување на второто место на табелата. Сепак, работата не е целосно завршена за битолчани, кои во последното коло на домашен терен мораат да го победат и Алкалоид.

Еурофарм Пелистер го одигра најдобриот натпревар во последните месеци и дојде до победа од 25-22 на гостувањето кај Охрид. Битолчани го контролираа резултатот од почеток до крај, а првото полувреме го добија со убедливи 16-10.

Пелистер поведе и со највисоки плус осум, но Охрид одговори со серија од 5-1 и намали на 21-17. Домашниот тим силно притискаше во финишот, но гостите покажаа искуство и квалитет за да ја задржат предноста и да стигнат до конечен триумф од 25-22.

Никола Митревски блескаше на голот на битолчани со 16 интервенции, а Богдан Радивојевиќ беше најефикасен со осум голови. Кај Охрид, Косуке Хасухира постигна пет голови, а Кристијан Пилиповиќ на голот запиша 11 одбрани.

Сега двата тима се израмнети на втората позиција на табелата со по 50 бодови, но битолчани имаат подобар меѓусебен скор, односно подобра гол-разлика во директните дуели. Во последното коло, Охрид гостува кај Тиквеш, а Еурофарм Пелистер го пречекува Алкалоид.

The post Пелистер славеше во Охрид и направи голем чекор кон второто место appeared first on telma.com.mk.

Денеска во Подгорица беше потпишан договорот за формирање регионални ракометни лиги во машка и женска конкуренција. Проектот е на иницијатива на ракометните федерации на Македонија, Србија и Црна Гора, а натпреварите официјално треба да почнат од сезоната 2027/28.

Регионалната машка лига ќе брои десет клубови — по четири од Србија и Македонија, како и два од Црна Гора. Женската лига исто така ќе има десет екипи, но од пет земји од регионот: Црна Гора, Србија, Македонија, Хрватска и Словенија, со по два претставници од секоја држава.

„Денешниот ден претставува почеток на едно ново и амбициозно поглавје во регионалниот ракомет, со јасна цел — создавање модерно, стабилно и квалитетно регионално натпреварување кое ќе биде гордост за сите учесници и за целиот европски ракомет“, се вели во дел од соопштението објавено од Ракометната федерација на Македонија.

Од сезоната 2027/28 регионалните лиги треба да се играат во полн формат и во двете конкуренции. Системот на натпреварување ќе биде двокружен, со 18 кола, по што ќе следува завршен турнир за титулата.

Како преодно решение, договорено е во сезоната 2026/27 да се организира натпреварување во скратен формат, односно да се одиграат три турнири, на кои домаќини ќе бидат Скопје, Белград и Подгорица.

Ова е нов обид за создавање силно регионално ракометно натпреварување по СЕХА-лигата, која стартуваше во 2011 година и официјално траеше до 2023 година.

The post Официјално: Потпишан договорот за старт на регионалните ракометни лиги appeared first on telma.com.mk.

Македонската ракометна репрезентација оствари рутинска победа од 31-24 на гостувањето кај Словачка во првиот бараж-натпревар за пласман на Светското првенство во 2027 година. Реваншот во Скопје треба само да го потврди нашето десетто учество на Мундијалите во историјата, односно осмо по ред.

Во првото полувреме Македонија го контролираше резултатот, но имаше проблеми целосно да го скрши отпорот на Словаците. Нашите ракометари промашија неколку зицери, а во три наврати ја погодија и рамката од голот на домашната селекција. Сепак, во последните десет минути од првиот дел избраниците на селекторот направија солидна предност, а со „бомбата“ на Филип Кузмановски со звукот на сирената заминаа на пауза со највисоки 18-13.

Токму капитенот беше фантастичен во првото полувреме со седум голови од осум обиди, додека Милан Лазаревски беше перфектен со пет погодоци од исто толку шутеви.

Македонија не попушти ниту во вториот дел и не ѝ дозволи на Словачка да се понадева на пресврт. Нашиот тим постојано одржуваше водство од шест до седум голови разлика, а имаше и највисоки плус осум. Квалитетот и, пред сè, искуството во вакви натпревари беа пресудни, па Македонија на крајот славеше убедливо со 31-24.

Кузмановски беше лидер во нападот со 10 погодоци, а Лазаревски остана перфектен со седум голови од седум обиди. Мартин Томовски на голот собра 13 интервенции. Кај Словачка, Јурај Бриатка и Шимон Махач постигнаа по четири голови.

Реванш-натпреварот се игра в недела од 19 часот во арената „Борис Трајковски“ во Скопје.

The post Македонија рутински во Словачка, на чекор до Светското првенство 2027 appeared first on telma.com.mk.

Македонската ракометна репрезентација вечерва од 19 часот гостува кај Словачка во рамки на првиот натпревар од баражот за пласман на Светското првенство 2027 година.

Селекторот Кирил Лазаров очекува тврд натпревар во Прешов, но неговите избраници се подготвени за предизвикот.

За Телма од Словачка известува Јана Серафимова.

The post Лазаров: Влогот е голем, очекувам тврд и физички исцрпувачки натпревар, но тимот е подготвен (ВИДЕО) appeared first on telma.com.mk.

Поранешниот ракометар на ПСЖ, Адама Кеита, е петтото засилување на Охрид за следната сезона. Францускиот левокрилен ракометар потпиша едногодишен договор, со можност соработката да биде продолжена за уште една сезона. Тој доаѓа од редовите на АЕК Атина, каде што настапуваше во изминатите две години, а претходно дури осум сезони го носеше дресот на ПСЖ.

„Започнува ново поглавје за мене. Горд сум што му се приклучувам на ГРК Охрид и што ја почнувам оваа нова авантура во Македонија. Му благодарам на клубот за довербата што ми ја укажа. Доаѓам со голема желба, амбиција и волја да го дадам максимумот на теренот за боите на клубот. Со нетрпение очекувам да почнам и да се запознаам со нашите навивачи“, изјави Кеита.

Охрид и следната сезона ќе има исклучително силен состав, откако претходно ги ангажираше и Србинот Никола Зечевиќ од Партизан, Унгарецот Доминик Мате, хрватскиот голман Дино Славиќ и македонскиот интернационалец Мартин Карапалевски.

Со ваков ростер, Охрид уште отсега најавува дека и следната сезона ќе биде еден од најсериозните предизвикувачи на домашната сцена.

The post Поранешен ракометар на ПСЖ е најновото засилување за ГРК Охрид appeared first on telma.com.mk.