Поморската трговија помеѓу Иран и Катар е обновена по речиси петмесечна пауза, изјави денеска иранскиот трговски аташе во Доха, Абас Абдолхани.

Тој истакна дека бродскиот транспорт помеѓу иранското пристаниште Дајер и катарското пристаниште Ал Рувеис е обновен по координацијата меѓу Амбасадата на Иран во Доха и катарските власти.

Претходно, Министерството за транспорт на Катар објави дека земјата ги обновува сите поморски активности со непосреден ефект.

Со тоа се укинува привременото ограничување воведено на 29 јуни, со кое беа суспендирани едриличарските и рибарските бродови до понатамошно известување. Забраната не влијаеше на комерцијалниот транспорт.

Катарското Министерство за транспорт ги повика сите оператори и бродови да ги почитуваат важечките поморски правила и упатства за да се обезбеди безбедноста и сигурноста на морскиот сообраќај.

Катар не го образложи ограничувањата воведени кон крајот на јуни, но беше воведено еден ден откако властите соопштија дека катарски државјанин починал од повреди од шрапнели здобиени за време на „воените операции во регионот“.

The post Иран и Катар ја обновуваат поморската трговија по речиси петмесечна пауза appeared first on telma.com.mk.

Американскиот потпретседател, Џ.Д. Венс, изјави дека Велика Британија „долго време е разочарана од своето лидерство“, додавајќи дека се надева дека следниот премиер на земјата ќе може да ги спроведе структурните промени што ги бараа гласачите по години политички превирања.

Во интервју за весникот „Сандеј тајмс“, Венс рече дека честите промени на владата укажуваат на подлабоки проблеми во британската политика. Премиерот Кир Стармер минатиот месец објави дека ќе се повлече по две години на функцијата, отворајќи го патот за седмиот премиер на Велика Британија за една деценија.

Пратеникот Енди Бернам се очекува да го наследи Стармер, откако се појави како единствен кандидат што ќе го замени лидерот во заминување.

„Она што го гледам се шест премиери во последните неколку години“, изјави Венс за весникот. „Тоа ми кажува дека многу нешто не е во ред со британската политика и дека луѓето навистина бараат значајни структурни промени“. „Се надевам дека Енди Барнам – а ако не Енди Барнам, некој друг – ќе може да го спроведе тоа“, рече американскиот потпретседател, додавајќи дека „кој и да е премиер, нека смисли како да ја врати Британија на вистинскиот пат“.

Венс, чија сопруга Уша студирала на Универзитетот во Кембриџ и кој често зборувал за својата наклонетост кон Велика Британија, ја опишал земјата како „неверојатно место“ со „најневеројатните луѓе во светот“ надвор од САД, пишуваат британските медиуми.

Неговите коментари доаѓаат по понекогаш немирниот, но претежно функционален однос меѓу Стармер и американскиот претседател Доналд Трамп. Двајцата лидери постојано ја нагласуваат важноста на „специјалниот однос“ меѓу САД и Велика Британија и покрај несогласувањата околу прашањата поврзани со Иран, Газа и Украина, додека обезбедуваат трговски и инвестициски договори меѓу двата сојузници.

Реагирајќи на оставката на Стармер минатиот месец, Трамп го опиша како „прекрасен човек“ и „некаков мој пријател“, но рече дека не успеал во политиката за имиграција и енергетика.

Во интервју за „Сандеј тајмс“, Венс рече дека не знае многу за Бернам, но додаде дека Велика Британија останува еден од најблиските сојузници на Вашингтон.

„Кој и да е премиер, ние ќе соработуваме со него што е можно поуспешно“, рече тој.

The post Венс: Британците ги разочара водството, на земјата и се потребни големи промени appeared first on telma.com.mk.

Унгарскиот премиер Петер Маѓар вчера предложи пратениците да имаат ограничен мандат од максимум 12 години како дел од поширокиот пакет уставни реформи.

Маѓар оваа идеја ја објави на Фејсбук, велејќи дека е дел од амандман што го доставил до парламентот.

Во средината на јуни, партијата Тиса на премиерот Маѓар, која има двотретинско мнозинство во парламентот, одобри уставен амандман со кој се ограничува мандатот на премиерот на два четиригодишни мандати. Таа промена го спречува десничарскиот премиер Виктор Орбан, кој на изборите во април ја изгуби премиерската функција, да се врати на власт.

Орбан беше премиер од 1998 до 2002 година и повторно од 2010 година до неговиот изборен пораз. Според новите правила, реизборот на Маѓар, исто така, би бил ограничен.

Маѓар првпат ги откри плановите за ограничување на парламентарниот мандат на 12 години пред две недели. За разлика од ограничувањето на мандатот на премиерот, мерката не е дел од неговиот изборен манифест и привлече критики од некои делови од општеството.

Премиерот, сепак, рече дека предлогот наишол на силна поддршка, при што десетици луѓе излегле со коментари и предлози преку интернет. Според него, новите ограничувања на парламентарната должност ќе стапат во сила по следните парламентарни избори во 2030 година, што значи дека мерката нема да влијае на сегашниот состав на парламентот.

Уставниот пакет, што би можел да биде одобрен од парламентот во наредните недели, предвидува и разрешување на претседателот Томас Суљок, кој беше назначен за време на владеењето на Орбан. Дополнително, ограничувањата за возраста и мандатот за уставните судии и членовите на Врховниот суд треба да го подмладат и деполитизираат судството, за кое критичарите тврдат дека е исполнето со лојални луѓе на Орбан.

The post Унгарскиот премиер Маѓар предлага ограничување на мандатите на пратениците на 12 години appeared first on telma.com.mk.

Портпаролот на Кремљ, Дмитриј Песков, денеска изјави дека Русија планира да воспостави безбедносна или тампон зона долж  границата со Украина, наведувајќи дека овој потег е условен, како што рече, од „агресивната природа на киевскиот режим“.

Почнувајќи од агресивната природа на киевскиот режим, за да ја гарантираме безбедноста на нашите граѓани, ќе мора да воспоставиме безбедносна или тампон зона. Таа се формира според планот. Нашите сили веќе постигнаа значителен напредок и никој не треба да се сомнева дека оваа зона ќе биде воспоставена до степен потребен за да се обезбеди нашата безбедност, изјави Песков за телевизијата „Вести“.

Тој додаде дека руските сили продолжуваат да напредуваат и дека резултатите од тој процес, како што изјави, се видливи на терен.

Песков го наведе „ослободувањето на Констјантинивка“ како еден од примерите, оценувајќи дека тоа е „многу значајна линија“ и важен чекор кон преземање контрола врз, како што рече, утврдената област Краматорск и Славјанск.

The post Песков: Русија ќе воспостави тампон зона долж границата со Украина appeared first on telma.com.mk.

Моментот на вистината за лидерката на француската крајнодесничарска партија Национален фронт, Марин Ле Пен е на дофат, по неколку годишните судски процеси, конечната одлука, дали ќе може да се кандидира на претседателските избори до година, таа ќе ја дознае во вторник.

Апелациониот суд, по завршните зборови во февруари и четиримесечното разгледување, конечно ќе ја соопшти својата пресуда, дали Ле Пен е виновна за проневера на средства од Европскиот парламент за сметка на нејзината партија.

Клучниот елемент овде е дека оваа исклучителна одлука на првостепениот суд, оригиналната пресуда, која во основа и забрани да се кандидира на избори во следните пет години, потсетува Виктор Малет, новинар на Financial Times и автор на книгата „Десничарска Франција“.

Ова би бил нејзиниот четврти обид да се искачи на најмоќната извршна функција во Франција, откако потроши две децении ребрендирајќи ја партијата основана од нејзиниот татко, во тој процес трансформирајќи го Националниот фронт од маргинална партија, обвинувана за пропагирање фашизам, во најголемата мејнстрим политичка сила во Франција.

Мислам дека тоа е од огромно значење, затоа што таа долг период е еден од водечките кандидати на француските претседателски избори следната година. Ако ѝ дозволат да се кандидира постои голема веројатност дека ќе победи на тие избори. Значи тоа е неверојатно значително, смета малет.

Но, додека ја очекуваа пресудата Ле Пен и партијата не седеа со скрстени раце, охрабрени од историскиот резултат на парламентарните избори пред две години, и постојано високата поддршка во анкетите од тогаш наваму, Националниот фронт претседателските избори следната година ги гледа како досега најдобрата шанса да ја освои власта во Франција.

Една од интересните работи за Националниот фронт, крајнодесничарската партија која таа ја претставува и води многу години, е тоа што имаат двајца кандидати кои може да се кандидираат за претседател. Значи, ако таа е спречена, ако судот пресуди дека таа не може да се кандидира, тогаш тие го имаат нејзиното младо протеже, Жордан Бардела, кој може да се кандидира место неа. Всушност, тој е дури и попопуларен од неа во анкетите, вели малет.

Без разлика какава ќе биде пресудата, крајот на оваа француска политичка сага има и еден позитивен фактор, а тоа е што Националниот фронт конечно ќе се ослободи од овој процес кој последниве две години како облак виси над партијата.

Каков и да биде исходот, самиот крај ќе ѝ дозволи на партијата сама да го диктира јавниот наратив околу неа, и да го насочи кон темите кои досега и донесоа голем успех, миграцијата, безбедноста и високите трошоци на живот.

Игор Трајков

The post Ле Пен во вторник ќе дознае дали ќе може да се кандидира на избори appeared first on telma.com.mk.

Турските власти приведоа неколку лица, вклучувајќи новинари, академици и членови на левичарски групи, во рации низ неколку провинции, објавија денеска локалните медиуми и синдикати, додека владата ги засилува безбедносните операции пред самитот на НАТО што оваа недела ќе се одржи во Анкара, јавува ДПА.

Рациите во Анкара, Истанбул и неколку други провинции беа насочени кон левичарските и социјалистичките партии, синдикатите и групите на граѓанското општество, објавија опозициската телевизија Халк ТВ и весникот Џумхуриет (Република).

Меѓу приведените се двајца уредници од новинските портали Т24 и Ода ТВ, кои се критички настроени кон владата.

Турското здружение на новинари (TGC) и Здружението на прогресивни адвокати (CHD) побараа на Икс ослободување на приведените, велејќи дека апсењата ја нарушуваат слободата на печатот и нарекувајќи ги рациите обид за заплашување на опозициските гласови пред состанокот на НАТО.

Државната агенција Анадолија денеска објави дека полицијата привела 39 осомничени лица во рации низ осум провинции, насочени кон младинското крило на забранетата левичарска група THKP/C-DEV YOL.

Во посебна операција во западната провинција Коџаели, полицијата привела 28 осомничени лица за кои се тврди дека се поврзани со екстремисти на Исламска држава и левичарски милитантни групи, објави Анадолија. Властите во рациите заплениле муниција и забранети дигитални материјали, се додава во извештајот.

Рациите следеа по неколку други апсења во текот на изминатата недела, потсетува ДПА.

Критичарите наведуваат дека операциите имаат за цел да спречат протести и да го потиснат несогласувањето пред самитот на НАТО, додека властите ги опишуваат како дел од истрагите за борба против тероризмот.

The post Турција продолжува со апсења низ земјата пред самитот на НАТО appeared first on telma.com.mk.

Соединетите Американски Држави се дом на слободата и „крунисување на човечката историја“, изјави претседателот Доналд Трамп синоќа во Вашингтон за време на прославата на 250-годишнината од американската независност, поточно 250 години од потпишувањето на Декларацијата за независност во Филаделфија, што го означи прекинувањето на врските на Тринаесетте колонии со британската круна.

Во говорот што беше одложен за неколку часа поради бурите над главниот град на САД, Трамп рече дека нацијата никогаш не била посилна.

Сега сме подобри од кога било. Ниту една нација не направила повеќе добро, не покажала поголема храброст, не постигнала поголем напредок, не исправила повеќе неправди или не постигнала поголем успех од вас, американскиот народ. САД 250 години беа надежта, ветувањето, светлината и славата меѓу сите народи во светот. Никој не може да биде како нас. И со Божја помош, секогаш ќе бидеме вакви или дури и подобри, рече Трамп.

Големата прослава на 250-годишнината од американската независност не помина непречено. Прво интензивен топлотен бран, а потоа и грмотевици на источниот брег на САД, ги принудија организаторите да ги променат или откажат настаните во голем број градови, вклучувајќи ги Вашингтон, Њујорк и Филаделфија.

Неколку часа пред закажаниот говор на американскиот претседател, беше издадена наредба за евакуација на огромната површина на Националниот мол (Национална променада) во самиот центар на американската престолнина, бидејќи се закануваше силна бура.

Температурите во Вашингтон, вчера, додека Трамп се подготвуваше за говор, се искачија над 37 степени Целзиусови, проследени со екстремна врелина. До синоќа, 20 часот, службите за итни случаи во Вашингтон интервенираа кај 51 лице поради проблеми поврзани со топлината, а 12 беа однесени во болница. Меѓутоа, откако првите посетители влегоа во просторот наменет за прославата, времето почна да се менува, а поради заканата од грмотевици, тие беа принудени да се евакуираат, што траеше повеќе од два часа, по што следеа дожд и грмотевици.

Властите ги принудија посетителите да побараат засолниште, особено во околните музеи и федерални згради, кои беа повторно отворени за таа пригода.

Говорот на Трамп беше одржан за неколку часа, а тој на својата платформа Truth Social изјави дека ќе го одржи „без разлика што ќе се случи“.

Трамп зборуваше пред спектакуларен огномет со 850.000 ракети што ќе бидат испукани за 40 минути.

Кога конечно се појави на сцената во 23:15 часот, претседателот се осврна на голем број од неговите омилени теми, од ветување за ново „златно доба на Америка“ до повторување на неосновани обвинувања за изборни измами од страна на неговите политички противници.

Тој вети дека ќе го донесе Законот SAVE America – што ќе бара доказ за државјанство и лична карта за гласање и ќе забрани гласање по пошта, освен во случаи на болест, воено распоредување или други исклучителни околности. Во својот говор, тој постојано ја споменуваше заканата од „комунизмот“, споредувајќи ја со рак што мора да се отстрани.

Околу местото на говорот на Трамп, во подножјето на споменикот на Вашингтон, беше спроведено високо ниво на безбедносен периметар. Илјадници членови на Националната гарда беа распоредени низ градот.

The post Оваа земја е домот на слободата, порача Трамп во говорот за одбележување на 250 годишнината од основањето на САД appeared first on telma.com.mk.

Во текот на изминатото деноноќие на територијата на државата се регистрирани вкупно 17 пожари на отворен простор, од кои еден е ставен под контрола, а 16 се целосно изгаснати, соопшти Центарот за управување со кризи (ЦУК).

Според информациите на ЦУК, под контрола е пожарот во Општина Македонски Брод, во атарот на селото Белица, каде што биле зафатени борова шума и ниска вегетација.

Изгаснати се пожарите во Општина Ѓорче Петров кај селото Кучково, во Велес кај селото Црквино, во Неготино кај селото Црвени Брегови и во Богданци кај селото Стојаково, каде горела претежно ниска и деградирана вегетација.

Пожари се изгаснати и во Струмица кај селото Добрејци, во Босилово кај селото Босилово, како и во Општина Василево, на потегот меѓу селата Чанаклија и Ѓечерлија, каде биле зафатени депонија и ниска вегетација.

ЦУК информира дека локализирани и изгаснати се и пожарите кај манастирот „Св. Јоаким Осоговски“ во Крива Паланка, кај прилепското село Царевиќ, во селото Нов Караорман во Општина Карбинци, како и во штипската населба Баби до месноста Мирјанина Црква.

Меѓу изгаснатите се и пожарите во Берово кај селото Смојмирово, во Бутел на Љуботенски Пат, во Куманово на улицата „11 Ноември“, во Општина Брвеница кај селото Милетино и во Општина Кривогаштани кај селото Воѓани, каде гореле депонија и ниска вегетација.

Од Центарот за управување со кризи посочуваат дека состојбата со пожарите континуирано се следи и апелираат до граѓаните на внимателно однесување на отворен простор со цел спречување на појава на нови пожари.

The post ЦУК: Во изминатото деноноќие регистрирани 17 пожари на отворено, еден е под контрола appeared first on telma.com.mk.

Во Тирана синоќа беше одржан најмасовниот протест во историјата на земјата, со учество на неколку стотици илјади учесници, меѓу нив и голем број Албанци од дијаспората, кои пристигнаа во метрополата од неколку европски земји, но и Албанци од соседните земји, објавија медиумите.

Протестот почна во 19 часот, од плоштадот „Скендер бег“, до плоштадот „Народни херои“ и пред владата каде се обратија повеќе говорници  повторувајќи ги веќе познатите барања за оставка на премиерот Еди Рама и формирање „непартиска влада со едногодишен мандат“. Потоа продолжија со марш низ градот.

На синоќешниот протест најголемо внимание привлече симболиката избрана за роденденот на премиерот, кој вчера го славеше 62 роденден. Демонстрантите првично донесоа бетонска торта со натпис „уште 100 години затвор“, украсена со фламинга, кои станаа симбол на протестите, првично започнати против изградбата на луксузно одморалиште во Зврнец.

Демонстрантите вееја албански и американски знамиња, извикуваа „Нова Албанија“, „Рама оди си“, „Рама во затвор“, „Бериша во затвор“. Траеше шест часа, а заврши пред Полицискиот комесаријат број 3 каде во притвор се 21 лице, приведени по насилниот протест во четвртокот пред албанскиот Парламент. Тука тие бараа нивно ослободување, фрлаа тврди предмети врз објектот кршејќи прозорци, поради што полицијата употреби водени топови.

Демонстрантите најавија протест денеска пред судот во Тирана каде треба да им се изрече безбедносна мерка на приведените.

Организаторот Едисон Лика  порача дека протест ќе има и вечерва и секој ден  со се поголема масовност продолжуваат до заминување на Рама.

The post Масовен протест во Тирана, стотици илјади демонстранти маршираа низ албанската престолнина appeared first on telma.com.mk.

Европската комисија по неколку месечно инсистирање дека новиот дигитален систем за регистрација на влез и излез од ЕУ, озлогласениот ЕЕС предизвикува проблеми на аеродромите и граничните премини ширум земјите членки на унијата. Вчера претседателката на комисијата, Урсула фон дер Лајен, по церемонијата за преземањето на претседателството од страна на Ирска, призна дека системот се соочува со одредени технички проблеми, побивајќи го претходното тврдење на пресцентарот на комисијата дека вообичаеното задржување за регистрација не е подолго од 70 секунди.

Вон дер Лајен конечно попушти по жестоките и повеќе месечни критики од страна на авиокомпаниите и операторите на аеродромите низ земјите членки, кои обвинуваа дека системот предизвикува неколку часовни задржувања, предизвикувајќи сериозни загуби и штета за авиопревозниците и аеродромите.

Овој систем, чија имплементација беше повеќе пати одложувана, ја разгневи авиоиндустријата. Три посебни авио организации во заедничко отворено писмо ѝ порачаа на комисијата дека по воведувањето на ЕЕС времето на чекање на аеродромите во периодот на шпицот достигнува и до пет часа. Поради тоа, тие ја повикаа комисијата да воведе механизми за суспендирање на системот кога нарушувањата ќе станат пресериозни, барем во најфреквентните летни месеци, јули и август.

Овие задржувања влијаат врз милиони патници кои влегуваат во Шенген зоната. Во исто време, аеродромите и авиокомпаниите се подложени на нарушувања на нивната оперативност, вклучувајќи одложување на летови, пропуштање на летови и зголемен притисок врз персоналот на шалтерите, предупредија лоби групата Совет на меѓународни аеродроми на Европа, Асоцијацијата за меѓународен воздушен транспорт и асоцијацијата на 16-е најголеми европски авиокомпании.

Според ЕЕС, секој граѓанин на трета земја при влезот во земја членка на ЕУ мора да се регистрира со отисок од прст и фотографија, но дел од земјите веќе го модификуваа редоследот на земање податоци. Неговата цел беше, пред сѐ, да се спречи недозволено задржување во земјата домаќин, а потоа да се неутрализира употребата на фалсификувани патни исправи.

Беше предвидено регистрирањето да се забрза преку инсталирање на киосци за само-регистрирање и преку телефонска апликација, но кога системот стапи во сила на 1 април службениците на аеродромите и граничните премини рачно ги внесуваа податоците, додека пак од тогаш до сега само Шведска и Португалија ја интегрираа употребата на мобилната апликација.

ЕЕС не беше воведен за да ја измени законската рамка околу правилата за влез и излез од ЕУ, инсистираше вон дер Лајен, додавајќи дека придобивките во смисла на гарантирање на безбедноста на граѓаните на земјите членки се далеку поголеми од одредената неудобност која системот ја предизвикува на аеродромите.

Игор Трајков

The post Европската комисија признава дека ЕЕС предизвикува проблеми, но инсистира дека придобивките од него се далеку поголеми appeared first on telma.com.mk.