По утринските метежи и долгите колони возила на граничниот премин „Богородица“, каде што дел од патниците чекаа и до три часа за влез во Грција, попладнево состојбата е поинаква.

Во моментов нема поголеми задржувања на македонската страна од границата, а сообраќајот се одвива непречено. Колони и натаму има пред грчките гранични контроли, но преминувањето се одвива релативно брзо.

Според информациите од терен, грчките власти вршат само пасошка контрола, без дополнителните биометриски проверки кои предвидуваат фотографирање и земање отпечатоци од прсти, поради што времето на чекање е значително намалено во споредба со утринските часови.

Иако редици возила сè уште се забележуваат на влезот во Грција, попладнево нема знаци на поголеми застои како оние од утрото, кога колоните се протегаа со километри, а чекањето достигнуваше и до три часа.

The post Утрово на грчката граница се чекало и до три часа appeared first on telma.com.mk.

Сообраќајните незгоди се повторно во фокусот на јавноста. Неколку во кои животот го загубија повеќе млади луѓе не одат во корист на статистиката на безбеден град која ја промовираше МВР за првите три месеци. Во меѓувреме во судот се водат повеќе спорови за незгоди со жртви каква што е онаа од лани во која загина бизнисменот Јорго Ќука.

На обвинителна клупа е Харис Качапор кој пак во јавноста е познат по признанието на вина во Синџир, негови камиони беа фатени во Горно Лисиче како истураат градежен шут на дива депонија, а во полициски билтен се поврзува и со друга сообраќајна несреќа.

The post Телма сторија – Отворени истраги и активни судења за сообраќајни незгоди appeared first on telma.com.mk.

Изгореното светлосно тело и распуканите плочки околу ормарите за струја се уште стојат и сведочат за пожарот што вчера во утринските часови избувна во населбата Кисела Вода. Во непосредна близина има и новоизградени станбени згради во кои веќе живеат жители, како и градилиште на кое се градат нови згради.

Од Електродистрибуција ги замениле оштетените ормари за струја, но над нив, на металната конструкција, и понатаму виси оштетеното светлосно тело кое не е отстрането. Веднаш под него се наоѓа детска игротека каде секојдневно се најмалите. Граѓаните велат дека не се чуствуваат безбедни и бараат построги мерки и поголема контрола за да се спречат вакви инциденти.

„Тоа беше страшно и недозволиво. Треба да се поработи на многу работи. Кога се прави некој објект прво треба да се загради околу него, а потоа кога ќе се заврши со тој објект да се почне изградба на друг. Овде на ова место ние веќе три години голтаме прашини. Еве и самите може да забелележите ако дувне ветар каква прашина се крева. Општо треба да има поголема безбедност за сите околу градилиштата“, вели анкетирана.

„Дали е безбедно навистина не знам бидејќи знаеме како се прават објекти, а особено новите згради-се тоа е фушерајски. Имам стан тука, но не бев за време на пожарот. Видов за случката на интернет. Сметам дека ако продолжи ова вака навистина не е безбедно. За жал, треба да се случи нешто вакво за надлежните да средат да биде како што треба“, изјави анкетиран.

И професорот на Градежниот факултет, Горан Марковски, предупредува дека градилиштата често создаваат сериозни проблеми за околните жители, почнувајќи од бучава и прашина, па се до нарушување на безбедноста и нормалното функционирање на јавниот простор.

„Голема бучава, работа и во неработни денови, нехигиена при поставување на тоалети на јавни површини, заградување на тротоарите, oневозможување на нормално одвивање на сообраќајот, загадување на воздухот со прав и други нечистотии“, Горан Марковски, професор на Градежен факултет.

Вчера, нешто пред шест часот наутро, жителите од околните згради на булеварот „Борис Трајковски“ слушнале силно тропање, по што забележале чад и детонација. Во текот на денот екипите на ЕВН го санирале дефектот, а жителите повторно добиле електрична енергија во вечерните часови.

Но, ова не е единствен случај. Неодамна на градилиште на булеварот „Теодосиј Гологанов“, во близина на Католичката црква, се случи свлечиште при ископ на нова станбена зграда. Беа оштетени тротоарот, коловозот и дел од инфраструктурата, по што инспекциските служби извршија увид и најавија мерки против инвеститорот.

Месец дена претходно, во Кисела Вода, при ископ на темели за нова зграда дојде до уривање на земјиште при што беа затрупани четворица градежни работници. Еден од нив го загуби животот. Сите овие инциденти го отвараат прашањето дали безбедносните стандарди на градилиштата се почитуваат доволно и дали надзорот е на потребното ниво.

Тамара Марковска

The post Од пожар до свлечиште: Колку се безбедни градилиштата во Скопје? appeared first on telma.com.mk.

Над 13 милиони евра приходи оствариле лани приватните лица кои издаваат сместување за краток престој, покажуваат пресметките на Управата за јавни приходи. Станува збор за издавање или реиздавање на станови, куќи и соби од страна на физички лица за краток престој независно од тоа дали се издаваат преку платформи како „Букинг“, „Ербиенби“, „Трип Адвајзор“ или на други начини.

Според податоците што Телма ги доби од УЈП, за 2025 година по овој основ поднесени се скоро 7.000 пресметки од физички лица, при што вкупниот данок надминува 1 милион евра.

„Кога изнајмувањето на недвижности се врши од страна на правни лица, приходот кој го остваруваат по овој основ претставува дел од нивниот вкупен приход остварен во текот на годината и се пријавува во годишната сметка за односната година“, посочуваат од УЈП.  

Издавањето стан, куќа или соба за краток престој претставува вршење угостителска дејност и е регулирано со закони од тој сектор.

Ако некој издава сместување за краток престој не само што е должен приходите да ги пријави во УЈП и за нив да плати данок, туку има и други законски обврски.

Прво, сопственикот или носителот на правото на користење на имотот поднесува барање за упис во регистарот до Град Скопје, односно до градоначалникот на општината во чие подрачје се издава. За да се добие дозволата неопходно е да се исполнат определените минимално-технички услови, како и условите за категоризација, а добиената категорија потоа треба да биде истакната на видно место на влезот на објектот.

Од Министерството за економија појаснуваат дека доколку физичкото лице издава стан, куќа или соба преку агенција, должно е да издаде фискална сметка за услугата, а доколку тоа го прави преку некоја од платформите, тогаш за секој прилив на трансакциска сметка должен е да плати 10% персонален данок.

„Согласно Законот за таксата за привремен престој, физичкото лице води две книги (за домашни и за странски гости) и е должен да уплати 40 денари по лице од ноќевање“, информираат од Министерството за економија.  

Казните за вршење ваква угостителска дејност без да се поседува решение за категоризација се од 100 до 250 евра.

Со цел да се зголеми контролата во секторот и да се намали нелегалното работење, ЕУ неодамна воведе нови правила за дигиталните платформи за краткорочното изнајмување апартмани.

Секоја земја членка ќе мора да воспостави единствен дигитален систем за регистрација на домаќините, а платформите ќе имаат обврска редовно да доставуваат податоци до надлежните институции за бројот на ноќевања, гостите и активностите на домаќините.

Мирјана Јовеска

The post Над 13 милиони евра заработка од приватно сместување – УЈП наплатила повеќе од милион евра данок appeared first on telma.com.mk.

За Законот за правична застапеност во понеделник ќе дебатираат и експертите. Во Собранието е закажана јавна расправа на која се очекува да се чујат повеќе аргументи од сите аспекти пред да почне расправата на седница. Повеќето политички аналитичари го оценуваат како подобро решение од таканаречениот Балансер кој продуцираше бројни злоупотреби.

„Со новиот закон обврската да има балансиран прием во јавната администрација останува, но се менуваат условите под кои тоа може да се изведе во административна процедура. Во таа смисла, тој е подобро законско решение затоа што ја става меритократијата пред етничката балансираност. Во овој случај, кога би биле блиску со бодови, стручноста доаѓа прва“, вели Петар Арсовски, политички аналитичар.

Партиите на Албанците во опозиција се против законот, особено против одлуката, тој да се носи со мало Бадентерово мнозинство, односно, со мнозинство од присутните пратеници од заедниците на седница. И за Арсовски поголемото мнозинство е подобра варијанта, но и одбраниот начин не е спорен.

„Политичкиот театар околу законот повеќе се сведува околу политичка поддршка или не. Најдобро ќе беше законот да се донесе со големо Бадентерово мнозинство, но и вака е подобро решение од претходното“, вели Арсовски.

Законот го помина и правниот филтер на Венцијанската комисија. Во него е наведено дека, „квалификациите, стручноста и компетентноста претставуваат примарен критериум, а припадноста кон подзастапена заедница може да се земе предвид само како секундарен критериум во случај на еднакви квалификации и компетентност на кандидатите“.

Повеќе нема да важи самоизјаснувањето, туку ќе се вршат детални проверки на личните податоци за да се спречат измамите со идентитетот поради конкурсите.За лажно етничко изјаснување се предвидени и санкции. Покрај кандидатите, законска одговорност ќе сносат и раководителите на институциите. Доколку директорите не го спроведуваат законот, ќе се соочат со политичка одговорност,

Спроведувањето на законот во пракса ќе го мониторира и гарантира Координативно тело. Балансерот беше укинат со одлука на Уставниот суд откако беше утврдено дека со него се нарушува начелото на стручност и компетентност и се повредува  уставно загарантираното право на работа и слободен избор на вработување.

Далиборка Демјанска Цветановска

The post Законот за правична застапеност на јавна расправа – за аналитичарите подобар од балансерот appeared first on telma.com.mk.

Покана за во затвор добил, пресуда не. Вака денеска осудениот поранешен градоначалник на Карпош Стевче Јакимовски се пожали дека му се одолговлекува времето за жалба до Врховниот суд. Смета дека и тоа што судот се уште не му ја врачил пресудата е под притисок на актуелната власт на чело со премиерот Христијан Мицкоски.

Упатниот акт е издаден за втори јули односно до тој датум Јакимовски треба да се јави на издржување на казната во затворот Скопје, во Шутка. Апелациониот суд во Скопје во вторникот соопшти дека ја потврдил едногодишната затворска казна на Јакимовски за кривично дело бесправно градење кое се однесува на бараката во која до лани во септември беше сместена општина Карпош. Јакимовски има речиси 5 месеци издржано мерка притвор поради што му преостануваат уште 7 месеци од казната. Смета дека правосилноста на пресудата е за да биде спречен да се кандидира за нов мандат во општината бидејќи тој смета дека ќе има нови избори поради боледувањето и отсуството на актуелниот прв човек на скопската општина, Сотир Лукровски.

Инаку Јакимовски поднел и барање за одложување на извршување на казната поради здравствени проблеми. Тој е осуден за бесправно градење, додека Апелација му ја поништи казната од три години затвор за злоупотреба при издавањето на уверенија за општинската барака.

Второстепениот суд утврдил дека во описот на делото на обвинението не се содржани битните елементи на кривичното дело за кое се гони. Од друга страна делот од обвинението кое според кривичниот суд застарело повторно ќе се врати на судење бидејки апелација ја поништи првичната одлука па Јакимовски ке биде обвинет за друга постапка но за исто дело, злоупотреба на службена положба. Тој денеска рече дека ова е прв единствен слуичај во сите судови низ земјава некој да оди во затвор за дивоградба. Побарта врховниот суд да не подлегне под притисоците.

Билјана Николовска

The post Јакимовски бара да ја добие пресудата, но и одложување на рокот за да се јави во затвор appeared first on telma.com.mk.

Допир што создава мелодија и покажува дека понекогаш не се потребни зборови за да се искаже љубов. „Тивки дружби“ беше само една од активностите на Фестивалот на инклузија „Инфјужн“, во организација на здружението „Икуалити“, кое веќе петта година по ред ја става уметноста во фокусот како дел од процесот на инклузија.

„Ова е нашиот мал, но голем јубилеј. Фестивалот на инклузија започна како фестивал што требаше да биде маалски, а прераснавме во голем фестивал кој нуди прекрасна енергија и ги поврзува луѓето преку различни типови активности, вклучително и од областа на културата, како што се театарот, перформансите и уметноста, а потоа, секако, и музиката и спортот “, вели Гере Трпков, претседател на здружението „Икуалити“.

Гере Трпков, претседател на здружението, ни раскажа дека посетеноста на ваквите настани најчесто е мала поради нивната необичност. Тој додава дека еден од главните фокуси на здружението е и едукацијата на сите граѓани.

„Поддршката е голема, меѓутоа на хартија. Обично за тоа станува збор секогаш кога зборуваме за фестивали од ваков карактер. Темата е необична и некои луѓе најверојатно не ја разбираат целосно. Меѓутоа, работиме и на тој дел од едукацијата на јавноста преку различни кампањи“, додава Трпков.

Дел од фестивалот беше и Државното училиште за деца и младинци со оштетен вид „Димитар Влахов“. Тие преку Брајовиот дисплеј и говорниот програм објаснуваа како се работи во нивното училиште со лица со оштетен вид.

„Секако дека ваквите настани се важни, затоа што луѓето имаат можност да се запознаат со сè што ние го имаме како училиште, од тимски игри до асистивни помагала. Многу е поубаво и појасно кога ние, како лица со оштетен вид, ќе објасниме или прикажеме како работиме со нашите ученици и како ги користиме Брајовиот програм и говорниот дисплеј“, вели Беира Слифоска.

Фестивалот „Инфјужн“ започна на 4 јуни и ќе трае до 20 јуни. Досега беа реализирани работилницата за креативно везење и шиење, како и „Маршот на исклучените“. Во текот на наредните денови следуваат концерти на македонски изведувачи, како и театарски претстави.

Софија Бислимоски

The post Фестивалот „Инфјужн“ ги поврзува луѓето преку инклузијата и уметноста appeared first on telma.com.mk.

Триесет и шест годишен се сомничи дека во повеќе наврати извршил силување на 12-годишно детете. Основното јавно обвинителство Битола донесе Наредба за спроведување истражна постапка против него. Според обвинителството  од јануари до јуни годинава во неколку наврати вршел полов однос врз 12 – годишно девојче, со што извршил продолжено дело – Силување на дете кое не наполнило 15 години од член 188 став 1 од Кривичниот законик.

„Со девојчето родено 2014 година контактирале и се допишувале на социјалните мрежи, а покрај тоа што сексуално го злоупотребил, осомничен е и за кривично дело – Прикажување на порнографски материјал на дете од член 193 став 4 во врска со став 3 од Кривичниот законик“, стои во соопштението на обвинителството. 

Поради можност за повторување на делото, опасност од бегство и влијание врз оштетената и нејзиниот исказ, но и врз други сведоци, јавниот обвинител до судијата на претходна постапка достави предлог за определување мерка притвор.

The post Притвор за 36-годишник кој се сомничи дека во повеќе наврати извршил силување на 12-годишно дете appeared first on telma.com.mk.

Биста со лик на починато лице била украдена од гробно место на Градските гробишта Бутел во Скопје, информира Министерството за внатрешни работи.

„На 29 јули 2025 година во 10:30 часот во СВР Скопје, 45-годишната Е.С. од Скопје пријавила дека во периодот од септември 2024 година до денот на пријавувањето, од гробното место на нејзиниот починат вујко била одземена биста со неговиот лик“, стои во соопштението на МВР.

Оттаму соопштуваат дека се преземаат мерки за расчистување на случајот и пронаоѓање на сторителот.

The post Украдена биста од гробно место на градските гробишта Бутел appeared first on telma.com.mk.

Граѓанската иницијатива „Зелен хуман град“ изрази загриженост поради најавите за изградба на дата-центри во земјава, оценувајќи дека ваквите капацитети ќе имаат големи потреби од електрична енергија и вода.

Во реакција објавена на социјалните мрежи, од иницијативата се повикуваат на изјава на министерот за дигитална трансформација Стефан Андоновски, во која, според нив, како едно од можните решенија за обезбедување дополнителна електрична енергија било посочено производство преку согорување отпад, односно биомаса.

„Малку ни е што Цементара согорува отпад во своите производствени капацитети и го загадува Скопје, Владата планира дополнително производство на електрична енергија преку палење отпад за потребите на дата-центрите“, наведуваат од „Зелен хуман град“.

Од иницијативата тврдат дека при согорување биомаса се ослободуваат штетни материи како ПМ10 и ПМ2,5 честички, азотни оксиди, јаглерод моноксид, сулфур диоксид, јаглерод диоксид, озон, диоксини, фурани и тешки метали.

Според нив, изложеноста на овие загадувачи може да биде поврзана со зголемен ризик од респираторни заболувања, астма, бронхитис, кардиоваскуларни заболувања, мозочен удар, оштетување на нервниот систем, како и одредени видови рак.

„Токму затоа не смееме да дозволиме уште поголемо и посмртоносно загадување и уништување на природните ресурси. Тоа што е за некого економски поисплатливо, за природата и живите организми може да има сериозни последици“, наведуваат од „Зелен хуман град“.

Иницијативата повикува на поголема транспарентност околу проектите за дата-центри и нивното влијание врз животната средина, како и на јавна дебата за можните еколошки последици од обезбедувањето енергија за нивното функционирање.

The post „Зелен хуман град“ предупредува декa најавените дата-центри може да донесат дополнително загадување преку согорување отпад appeared first on telma.com.mk.