Норвешка се пласираше во четвртфиналето на Светското првенство 2026 година откако во Њу Џерси го совлада Бразил со 2-0.

Херој на скандинавците беше Ерлинг Халанд, кој ги постигна двата гола. Првиот го реализираше со глава во 79-тата минута, а точка на натпреварот стави со одличен удар од далечина во финишот.

Кариоките имаа голема шанса да поведат во првото полувреме, но Бруно Гимараеш не реализираше пенал, односно голманот на Норвешка, Ниланд, успеа да одбрани. Ендрик можеше да го отвори резултатот веднаш по влегувањето во игра, но младиот напаѓач, иако излезе сам пред голот, биеше крај десната статива.

Норвешка во четвртфиналето ќе го чека победникот од дуелот меѓу Мексико и Англија.

The post Халанд го испрати Бразил дома, Норвешка продолжува меѓу најдобрите осум appeared first on telma.com.mk.

Пожарот кој пред неполн час избувна во објект кај „Рампа“, благодарение на брзата, храбра и професионална интервенција на Противпожарната бригада на Град Скопје, во рекордно време е ставен под контрола и локализиран, објави на Фејсбук скопскиот градоначалник Орце Ѓорѓиевски.

Со тоа, додаде градначалникот, беше спречено негово проширување кон околните објекти и избегната е поголема трагедија

Фала Му на Бога, жртви нема. За жал, еден пожарникар е повреден при интервенцијата и веднаш е пренесен на клиника. Му посакувам брзо закрепнување и изразувам огромна благодарност за неговата пожртвуваност – нагласи Ѓорѓиевски.

Тој додаде дека ова е уште еден доказ колку е важна Противпожарната бригада и колку секојдневно пожарникарите го ризикуваат сопствениот живот за да ги заштитат граѓаните.

Токму затоа, нашите заложби за модернизација на Бригадата, нова опрема, подобри услови и поголема безбедност за пожарникарите се наша обврска. Длабок поклон до сите пожарникари за брзата реакција, професионалноста, храброста и посветеноста. Скопје денес виде што значи пожртвуваност на дело – истакна скопскиот градоначалник.

The post Пожарот кај „Рампа“ ставен под контрола, еден пожарникар повреден во неговото гасење appeared first on telma.com.mk.

Поморската трговија помеѓу Иран и Катар е обновена по речиси петмесечна пауза, изјави денеска иранскиот трговски аташе во Доха, Абас Абдолхани.

Тој истакна дека бродскиот транспорт помеѓу иранското пристаниште Дајер и катарското пристаниште Ал Рувеис е обновен по координацијата меѓу Амбасадата на Иран во Доха и катарските власти.

Претходно, Министерството за транспорт на Катар објави дека земјата ги обновува сите поморски активности со непосреден ефект.

Со тоа се укинува привременото ограничување воведено на 29 јуни, со кое беа суспендирани едриличарските и рибарските бродови до понатамошно известување. Забраната не влијаеше на комерцијалниот транспорт.

Катарското Министерство за транспорт ги повика сите оператори и бродови да ги почитуваат важечките поморски правила и упатства за да се обезбеди безбедноста и сигурноста на морскиот сообраќај.

Катар не го образложи ограничувањата воведени кон крајот на јуни, но беше воведено еден ден откако властите соопштија дека катарски државјанин починал од повреди од шрапнели здобиени за време на „воените операции во регионот“.

The post Иран и Катар ја обновуваат поморската трговија по речиси петмесечна пауза appeared first on telma.com.mk.

Американскиот потпретседател, Џ.Д. Венс, изјави дека Велика Британија „долго време е разочарана од своето лидерство“, додавајќи дека се надева дека следниот премиер на земјата ќе може да ги спроведе структурните промени што ги бараа гласачите по години политички превирања.

Во интервју за весникот „Сандеј тајмс“, Венс рече дека честите промени на владата укажуваат на подлабоки проблеми во британската политика. Премиерот Кир Стармер минатиот месец објави дека ќе се повлече по две години на функцијата, отворајќи го патот за седмиот премиер на Велика Британија за една деценија.

Пратеникот Енди Бернам се очекува да го наследи Стармер, откако се појави како единствен кандидат што ќе го замени лидерот во заминување.

„Она што го гледам се шест премиери во последните неколку години“, изјави Венс за весникот. „Тоа ми кажува дека многу нешто не е во ред со британската политика и дека луѓето навистина бараат значајни структурни промени“. „Се надевам дека Енди Барнам – а ако не Енди Барнам, некој друг – ќе може да го спроведе тоа“, рече американскиот потпретседател, додавајќи дека „кој и да е премиер, нека смисли како да ја врати Британија на вистинскиот пат“.

Венс, чија сопруга Уша студирала на Универзитетот во Кембриџ и кој често зборувал за својата наклонетост кон Велика Британија, ја опишал земјата како „неверојатно место“ со „најневеројатните луѓе во светот“ надвор од САД, пишуваат британските медиуми.

Неговите коментари доаѓаат по понекогаш немирниот, но претежно функционален однос меѓу Стармер и американскиот претседател Доналд Трамп. Двајцата лидери постојано ја нагласуваат важноста на „специјалниот однос“ меѓу САД и Велика Британија и покрај несогласувањата околу прашањата поврзани со Иран, Газа и Украина, додека обезбедуваат трговски и инвестициски договори меѓу двата сојузници.

Реагирајќи на оставката на Стармер минатиот месец, Трамп го опиша како „прекрасен човек“ и „некаков мој пријател“, но рече дека не успеал во политиката за имиграција и енергетика.

Во интервју за „Сандеј тајмс“, Венс рече дека не знае многу за Бернам, но додаде дека Велика Британија останува еден од најблиските сојузници на Вашингтон.

„Кој и да е премиер, ние ќе соработуваме со него што е можно поуспешно“, рече тој.

The post Венс: Британците ги разочара водството, на земјата и се потребни големи промени appeared first on telma.com.mk.

Премиерот Христијан Мицкоски очекува од утре да има ново зголемување на цените на горивата, но конечните пресметки треба да ги соопшти Регулаторната комисија за енергетика.

Одговарајќи на новинарско прашање, Мицкоски рече дека според владините калкулации, минатата седмица имало раст на цената на нафтата на светските берзи за околу 5 до 6 отсто, а кај бензините зголемување од 2 до 3 отсто.

Според неговите очекувања, дизел горивото би можело да поскапи за околу 2 до 2,5 денари по литар, додека бензините би се зголемиле за околу еден денар.

„Очекувам да имаме зголемување околу 2 до 2,5 денари по литар за дизел горивото и околу денар за бензините, но сепак да почекаме утре Регулаторната комисија да ги каже последните бројки“, изјави Мицкоски.

Тој додаде дека и покрај можниот раст, државата, според него, останува меѓу земјите со најниски цени на дизелот и бензините.

Новите малопродажни цени ќе бидат познати по одлуката на Регулаторната комисија за енергетика.

The post Мицкоски очекува да се покачат цените на горивата – дизелот да поскапе од 2 до 2,5 денари за литар, а бензините 1 денар appeared first on telma.com.mk.

Унгарскиот премиер Петер Маѓар вчера предложи пратениците да имаат ограничен мандат од максимум 12 години како дел од поширокиот пакет уставни реформи.

Маѓар оваа идеја ја објави на Фејсбук, велејќи дека е дел од амандман што го доставил до парламентот.

Во средината на јуни, партијата Тиса на премиерот Маѓар, која има двотретинско мнозинство во парламентот, одобри уставен амандман со кој се ограничува мандатот на премиерот на два четиригодишни мандати. Таа промена го спречува десничарскиот премиер Виктор Орбан, кој на изборите во април ја изгуби премиерската функција, да се врати на власт.

Орбан беше премиер од 1998 до 2002 година и повторно од 2010 година до неговиот изборен пораз. Според новите правила, реизборот на Маѓар, исто така, би бил ограничен.

Маѓар првпат ги откри плановите за ограничување на парламентарниот мандат на 12 години пред две недели. За разлика од ограничувањето на мандатот на премиерот, мерката не е дел од неговиот изборен манифест и привлече критики од некои делови од општеството.

Премиерот, сепак, рече дека предлогот наишол на силна поддршка, при што десетици луѓе излегле со коментари и предлози преку интернет. Според него, новите ограничувања на парламентарната должност ќе стапат во сила по следните парламентарни избори во 2030 година, што значи дека мерката нема да влијае на сегашниот состав на парламентот.

Уставниот пакет, што би можел да биде одобрен од парламентот во наредните недели, предвидува и разрешување на претседателот Томас Суљок, кој беше назначен за време на владеењето на Орбан. Дополнително, ограничувањата за возраста и мандатот за уставните судии и членовите на Врховниот суд треба да го подмладат и деполитизираат судството, за кое критичарите тврдат дека е исполнето со лојални луѓе на Орбан.

The post Унгарскиот премиер Маѓар предлага ограничување на мандатите на пратениците на 12 години appeared first on telma.com.mk.

Пожарот кај „Рампа“ е ставен под контрола. Во гаснење на огнот кој изби пред еден час, интервенираше Противпожарната бригада на Град Скопје.

The post Пожарот кај „Рампа“ кој се ширеше кон околните објекти е локализиран appeared first on telma.com.mk.

Портпаролот на Кремљ, Дмитриј Песков, денеска изјави дека Русија планира да воспостави безбедносна или тампон зона долж  границата со Украина, наведувајќи дека овој потег е условен, како што рече, од „агресивната природа на киевскиот режим“.

Почнувајќи од агресивната природа на киевскиот режим, за да ја гарантираме безбедноста на нашите граѓани, ќе мора да воспоставиме безбедносна или тампон зона. Таа се формира според планот. Нашите сили веќе постигнаа значителен напредок и никој не треба да се сомнева дека оваа зона ќе биде воспоставена до степен потребен за да се обезбеди нашата безбедност, изјави Песков за телевизијата „Вести“.

Тој додаде дека руските сили продолжуваат да напредуваат и дека резултатите од тој процес, како што изјави, се видливи на терен.

Песков го наведе „ослободувањето на Констјантинивка“ како еден од примерите, оценувајќи дека тоа е „многу значајна линија“ и важен чекор кон преземање контрола врз, како што рече, утврдената област Краматорск и Славјанск.

The post Песков: Русија ќе воспостави тампон зона долж границата со Украина appeared first on telma.com.mk.

Моментот на вистината за лидерката на француската крајнодесничарска партија Национален фронт, Марин Ле Пен е на дофат, по неколку годишните судски процеси, конечната одлука, дали ќе може да се кандидира на претседателските избори до година, таа ќе ја дознае во вторник.

Апелациониот суд, по завршните зборови во февруари и четиримесечното разгледување, конечно ќе ја соопшти својата пресуда, дали Ле Пен е виновна за проневера на средства од Европскиот парламент за сметка на нејзината партија.

Клучниот елемент овде е дека оваа исклучителна одлука на првостепениот суд, оригиналната пресуда, која во основа и забрани да се кандидира на избори во следните пет години, потсетува Виктор Малет, новинар на Financial Times и автор на книгата „Десничарска Франција“.

Ова би бил нејзиниот четврти обид да се искачи на најмоќната извршна функција во Франција, откако потроши две децении ребрендирајќи ја партијата основана од нејзиниот татко, во тој процес трансформирајќи го Националниот фронт од маргинална партија, обвинувана за пропагирање фашизам, во најголемата мејнстрим политичка сила во Франција.

Мислам дека тоа е од огромно значење, затоа што таа долг период е еден од водечките кандидати на француските претседателски избори следната година. Ако ѝ дозволат да се кандидира постои голема веројатност дека ќе победи на тие избори. Значи тоа е неверојатно значително, смета малет.

Но, додека ја очекуваа пресудата Ле Пен и партијата не седеа со скрстени раце, охрабрени од историскиот резултат на парламентарните избори пред две години, и постојано високата поддршка во анкетите од тогаш наваму, Националниот фронт претседателските избори следната година ги гледа како досега најдобрата шанса да ја освои власта во Франција.

Една од интересните работи за Националниот фронт, крајнодесничарската партија која таа ја претставува и води многу години, е тоа што имаат двајца кандидати кои може да се кандидираат за претседател. Значи, ако таа е спречена, ако судот пресуди дека таа не може да се кандидира, тогаш тие го имаат нејзиното младо протеже, Жордан Бардела, кој може да се кандидира место неа. Всушност, тој е дури и попопуларен од неа во анкетите, вели малет.

Без разлика какава ќе биде пресудата, крајот на оваа француска политичка сага има и еден позитивен фактор, а тоа е што Националниот фронт конечно ќе се ослободи од овој процес кој последниве две години како облак виси над партијата.

Каков и да биде исходот, самиот крај ќе ѝ дозволи на партијата сама да го диктира јавниот наратив околу неа, и да го насочи кон темите кои досега и донесоа голем успех, миграцијата, безбедноста и високите трошоци на живот.

Игор Трајков

The post Ле Пен во вторник ќе дознае дали ќе може да се кандидира на избори appeared first on telma.com.mk.

Во текот на изминатото деноноќие полицијата лиши од слобда пет лица и со тројца извршен службен разговор во вкупно девет пријави за семејно насилство во Скопје, Куманово, Тетово, Велес и Штип информираат од Министерството за внатрешни работи.

Полициски службеници од СВР Куманово вчера во 22:40 часот го лишија од слобода Ф.С. (32) од Куманово, по претходна пријава дека во семејниот дом физички ја нападнал неговата мајка. Тој бил приведен во полициска станица и по целосно документирање на случајот, против него ќе следува соодветна пријава.

Полициски службеници од ПС Тетово вчера во 23:00 часот го лишиja од слобода В.С. (62) од Тетово, постапувајќи по пријава од неговите два сина дека околу 21:00 часот во семејниот двор, нивниот татко В.С., кој бил под дејство на алкохол, агресивно се однесувал и физички ги нападнал, а се заканувал и со остар предмет. Тој е задржан во полициска станица и по документирање на случајот, против него ќе следува соодветен поднесок.

Вчера во 22:10 часот во Чашка, полициски службеници од Полициското одделение Чашка го лишија од слобода Н.Д.(28) од Чашка, постапувајќи по претходна пријава дека во домот физички ја нападнал неговата 26-годишна вонбрачна партнерка, при што употребил и тврд предмет. По извршени проверки било констатирано дека Н.Д. бил под дејство на алкохол, односно му биле измерени 0,94 промили алкохол во крвта. Тој бил задржан во полициска станица, известен бил јавен обвинител и по документирање на настанот против него ќе биде поднесена соодветна пријава.

Во Велес, полициски службеници од СВР Велес вчера во 20:40 часот го лишија од слобода Д.Ш.(24) од Велес, постапувајќи по претходна пријава дека во угостителски објект во Велес и се заканувал на неговата 22-годишна поранешна партнерка и физички нападнал нејзин пријател. Тој бил приведен во полициска станица, известен бил јавен обвинител и по документирање на настанот, против него ќе биде поднесена соодветна пријава.

Полициски службеници од СВР Велес вчера и денеска извршија службени разговори со Б.А.(60), Е.А.(22) и 20-годишната Ш.Р., сите од Велес. Претходно, во СВР Велес било пријавено дека во домот, Б.А.(32) од Велес бил физички нападнат од неговиот брат Е.А. кој употребил и дрвен предмет, а потоа и од неговата снаа Ш.Р. и неговиот татко Б.А.. Известен бил јавен обвинител и по целосно расчистување и документирање на настанот ќе бидат поднесени соодветни пријави.

Во СВР Скопје, денеска во 00:10 часот 41-годишна жена од Скопје пријави дека на 04.07.2026 околу 20:00 часот во семејниот дом на подрачјето на Бит Пазар била физички нападната од нејзиниот сопруг З.Ј.(47) од Скопје. Се преземаат мерки за расчистување на случајот.

Во Скопје, 21-годишна девојка од скопско, вчера во 20:20 часот пријавила дека добивала закани од нејзиниот 24-годишен партнер. Се преземаат мерки за расчистување на случајот.

Во Штип, полициски службеници од СВР Штип вчера во 18:15 часот го лишија од слобода Р.С.(39) од Штип, по претходна пријава дека на 04.07.2026 околу 14:15 часот во семејниот дом на неговата 35-годишна поранешна сопруга и упатувал закани и ја прекршил судската одлука со која е изречена мерка за заштита од семејно насилство. По целосно документирање на случајот ќе следува соодветен поднесок.

Во Полициската канцеларија Пехчево, вчера во 23:30 часот 46-годишна жена од Пехчево пријави дека околу 21:00 часот пред угостителски објект во Пехчево била физички нападната од нејзиниот сопруг И.К. За настанот е известен јавен обвинител од ОЈО Берово. Се преземаат мерки за расчистување на случајот.

The post Вкупно девет пријави за семејно насилство во изминатото деноноќие, пет лица лишени од слобода, со тројца извршен службен разговор appeared first on telma.com.mk.