Заев: Железни опинци ќе облечам, просечна плата од 500 евра во Македонија ќе има

Со разрешени бариери, проблеми и пречки, без ниту едно отворено билатерално прашање, Македонија конечно може да прави крупни чекори напред за развој на економијата. Сега мора да работиме. Сите. И Владата, и Парламентот, и граѓаните и бизнимените. Прогресот ќе зависи само од нас. Железни опинци ќе облечам, просечна плата од 500 евра во Македонија ќе има, порача премиерот Зоран Заев од денешната трибина во Велес.

Доста е политика и политиканство, потенцира Заев. Мора да ги засукаме ракавите. Државата ќе ја биде, само ако народот има пари, а во таа насока се фокусирани и владините политики.

Според него, Македонија има капацитет и тоа мора да го искористи, да овозможи луѓето достоинствено да заработуваат и да живеат, младите да не си одат.

Економската перспектива тој ја гледа и преку зголемување на потрошувачката и куповната моќ што, пак, оцени, зависи од инвестициите во државата.

-Со безбедност и стабилност, со членство на земјава во ЕУ и НАТО, и тоа како очекуваме и домашни и странски инвестиции, подвлече Заев.

Можноста за развој на економијата, предочи, најмногу се отвори со решавањето на прашањето со Грција.

-Заради огромната желба да донесеме благосотојба, се зафативме со решавање на големите прашања. Тешки биле, болни, со многу пречки. Но, моравме да ги решиме, да го надминеме понижувачкиот однос. Не викаа ФИРОМ, не ни беше дозволено да зборуваме на нашиот јазик додека светот одеше напред во сите области. За да го решиме проблемот со Грција, моравме претходно да го решиме проблемот со Бугарија. Од незвоможното направивме возможно. Покажавме дека со европски манири и овде на Балканот негуваме европски вредности, нагласи Заев, укажувајќи дека земјава досега 27 години одеше назад.

Премиерот уште еднаш потенцира дека Договорот со Грција е модел на градење пријателство кој го почитува минатото и гледа во иднината.

Објавено на
© 2020 Телевизија Телма. Сите права се задржани.
Текстов не смее да се печати или емитува, во целина или во делови, без договор со Телевизија Телма.

СЛИЧНИ ТЕКСТОВИ