Ричард Карапаз е победник на 20-тата и претпоследна етапа на „Тур де Франс“, додека Тадеј Погачар е на чекор до освојување на петтата титула на најпрестижната велосипедска трка во светот.

Еквадорецот беше најдобар на исклучително тешката делница долга 170,9 километри од Ле Бур д’Оазан до Алп д’Ез.

Карапаз ја забележа втората етапна победа во последните три дена и воедно го обезбеди признанието за најдобар планински велосипедист.

Ремко Евенепул заврши втор со 26 секунди заостанување, додека Сеп Кус го освои третото место.

Лидерот во генералниот пласман Тадеј Погачар заврши четврти, но наместо да се обиде да дојде до втора последователна победа, во најголем дел од етапата му помагаше на својот тимски колега Исак дел Торо. Мексиканецот финишираше веднаш зад него и го зацврсти третото место во генералниот пласман.

Погачар ја задржа жолтата маичка и пред последната етапа има шест минути и 26 секунди предност пред Евенепул. Словенецот е на чекор до петтата титула на „Тур де Франс“.

Најпрестижната велосипедска трка завршува утре на Елисејските Полиња во Париз.

The post Карапаз ја освои 20-тата етапа, Погачар пред петта титула на „Тур де Франс“ appeared first on telma.com.mk.