Милосим Војнески кој се пријави како независен кандидат за градоначалничките избори во Македонски Брод се повлече од вториот круг каде влезе заедно со кандидатот на ВМРО-ДПМНЕ, Жарко Ристоски. Војнески во првиот круг освои 705 гласови и беше втор со само три гласа повеќе од Ивица Стојкоски од СДСМ. Денеска соопшти дека се откажува за да нема нови делби во Македонски Брод и потврди дека неговата матична партија е ВМРО-ДПМНЕ.

-По бројните разговори со вас, мои сограѓани, одлучив да ја повлечам својата кандидатура. Ги разбирам сите оние кои, поради различни причини, ги поделија своите гласови дури и во рамките на семејствата, и не би сакал дополнително да ги продлабочувам тие теми. ВМРО-ДПМНЕ е мојата матична партија — партија на која и го посветив поголемиот дел од својот живот, уште од времето на осамостојувањето па се до денес. Сметам дека најдобрата одлука, во интерес на моите сограѓани, е да се повлечам од оваа изборна трка, напиша Војнески на ФБ.

Милосим Војнески како кандидат на ВМРО-ДПМНЕ ја вршеше градоначалничката функција во Македонски Брод до 2017-та година. Војнески беше обвинет во случајот на СЈО, Моќник заедно со пратеникот Антонио Милошоски за злоупотреби при продажба на објект во селото Ижиште.

Случајот застаре по контроверзните измени на Кривичниот законик во 2023-та година во делот со намалувањето на казните за кривичното дело „Злоупотреба на службената положба“. Дополнително застаре и процесот за делото измама.

Војнески поради тоа можеше да се кандидира, а откако ВМРО-ДПМНЕ не го предложи, тој се кандидираше како независен и влезе во вториот круг.

Изборниот законик не препознава откажување на кандидат и неговото име повторно ќе се најде на гласачко ливче. Во вториот круг победува кандидатот кој освои повеќе гласови без разлика на излезноста.

The post Независниот Милосим Војнески се откажа од втор круг во Македонски Брод и борба против кандидатот од неговата матична ВМРО-ДПМНЕ, претходно беше обвинет со Антонио Милошоски во Моќник, но му застаре делото appeared first on telma.com.mk.

Пописот треба да донесе податоци за бројот на жители кои живеат во државата, а за првпат можеа да се попишат и припадниците на дијаспората кои таа можност ја исполнуваа сами преку електронска апликација.

Долги години Македонија се соочува и со голем и долг избирачки список, а на последните избори имаше вкупно 1.824.864 запишани избирачи со право на глас иако претходно неколкупати се прочистуваше избирачкиот список.

На денешното соопштување на резултатите од пописот беше соопштено дека во државата живеат само 12 илјади повеќе жители од запишаниот број на избирачи (1.836.713)

Државниот завод за статистика даде и податок по години на возраст на попишаните граѓани, а според прикажните бројки до 18 години имало вкупно 372.558 граѓани. Под 18 години немаат право на глас, а кога ќе се извадат овие малолетни граѓани во време на пописот кој речиси се поклопи со ланските локални избори, тогаш излегува дека од вкупно попишаните право на глас имале 1.464.155 граѓани.

Во бројката резидентно население спаѓаат оние што се попишале пред попишувач, но и оние над 132 илјади за кои се земени податоци од административните бази на податоци. ДЗС досега не ја објави старосната структура на попишаните во дијаспората каде се попишани над 258 илјади граѓани на Македонија.

Но доколку се следи процентот од околу 22 % малолетно насление како во татковината, тогаш меѓу отселените би требало да има има околу 57 илјади малолетни, односно уште 201 илјада избирачи.

И со таа бројка пак не се стига до бројот на запишани избирачи за локалните избори, заоа што вкупно би имало околу 1,464 милион гласачи во државата и 201 илјада во странство односно се на се околу 1.665.000 избирачи. Недостасуваат уште околу 160 илјади запишани избирачи.

Објаснувањето за избирачкиот список е тоа што според Изборниот законик право на глас има секој македонски државјанин постар од 18 години. А државјани има над 2,5 милиони низ целиот свет.

За да оствари право и да гласа треба да има важечка лична карта или пасош, затоа што во активниот избирачки список на гласачките места се ставени и фотографиите од личните документи.

Бројката на попишани во државата и во дијаспората покажува сепак големи разлики на избирачкиот список со широкото законски пропишано право на глас во споредба со реалниот број на жители во државата. Поради тоа често се случува, луѓе од дијаспората да одлучуваат локални избори во општини од по 5-6 илјади жители иако таму живеат по максимум неколку недели годишно и воопшто немаат исти потреби за локални патишта, водоводи и образовни услови како постојаните жители на тие општини.

Од друга страна пак за парламентарните избори е можно, иселеници да се пријавуваат за гласање во амбасадите и конзулатите на Македонија, но последните два циклуси по промената на изборниот модел, дијаспората не успева да обезбеди ниту по еден пратеник иако според бројките од пописот би требало да има над 15 пратеници.

Миомир Серафиновиќ

2.097.319 попишани граѓани во Пописот во 2021 година

The post Според пописот во државата има помалку од 1,5 милион гласачи додека во избирачкиот список има над 1,8 милион. Еве зошто? appeared first on telma.com.mk.

СДСМ му прости на Максим Димитриевски за независната кандидатура за градоначалник на Куманово. Тоа може да се заклучи од изјавата на генералниот секретар Љупчо Николовски, кој во телевизиско интервју најави дека партијата ќе се обиде да го врати Димитриевски во своите редови.

СДСМ ќе влезе во постапка, во која верувам врз база на сите дискусии кои сме ги имале по изборите – ќе извлечеме поуки, ќе донесеме многу одлуки. Ние сме единствената инклузивна отворена коалиција во која на позиции се и луѓе кои не се партиски членови, а добиле чест и одговорност да се носат со тие позиции. СДСМ се менува и победува со отстранување на детектираните слабости, вели Љупчо Николовски, генерален секретар на СДСМ.

Градоначалникот на Куманово веднаш одговори дека никој не може да го враќа во партија од која никогаш не излегол. Посочи дека врз него имало притисоци токму од луѓе што се нарекувале негови сопартијци и дека нема простор за договор со такви кои излегле од начелата на СДСМ и користеле „груевистички методи“.

На СДСМ му се неопходни радикални промени и трансформации по вертикала и хоризонтала и начинот на практикување на власта, елиминација на лукративно-клиентелистичкиот пристап, кои треба да бидат заменети со вистински државотворни политики базирани на идеологија во која граѓанскиот ќе биде пред партиско-личниот интерес, смета Максим Димитриевски, градоначалник на Куманово на Фејсбук.

Димитриевски и СДСМ се разијдоа кога тој објави независна кандидатура за градоначалник. Според партискиот статут, тоа е основа за исклучување. Партиското раководство објави дека тоа ќе биде спроведено, но Централниот одбор никогаш не донесе таква одлука. Со тоа, и покрај тешките зборови упатени во кампањата, Димитриевски се уште е член на партијата. Новата понуда на СДСМ е – помирување наместо исклучување.

Соња Николовска

The post Максим Димитриевски останува член на СДСМ appeared first on telma.com.mk.

Свечените изјави со уставното име ќе ги потпишат, но ќе се жалат и на второстепената комисија на Решението со кое претходните изјави е забележано дека не им се уставни, а одлуките кои ги донесоа на седниците им се неважечки, ова е ставот на мнозинството советници од ВМРО ДПМНЕ, кое денеска се појави на третата седница на Советот на Општина Штип.

Опозициските советници од СДСМ и коалиџионите партнери дојдоа до вратата, но откако пред салата ги слушнаа изјавите на мнозинството кои ги дадоа на новинарите  и беа информирани оти нема да им се дадат свечени изјави со уставното име не влегоа да бидат дел од расправата.

Во салата остана само опозицискиот советник Зорна Костовски, на кого не му беше верификуван мандатот, но службите за потпис му ја понудија свечената изјава без придавката Северна.

Додека се чекаат роковите за советничките свечени изјави, денеска мнозинството си го изгласа ребалнсот на буџетот, но и се разрешија старите и се именуваа нови членови на управните одбори на јавните претпријатија, како и на училиштата, со што почнува постапката за смена на директорите, иако дел имаат мандати и до крајот на учебната година.

Викторија Јовановска

The post Советниците од општина Штип ќе потпишан нови изјави, но ќе се жалат и на второстепена комисија appeared first on telma.com.mk.

Во Дебар се одржа вториот круг на изборите за градоначалник на општината. Хекуран Дука од ДУИ и Беким Поцеста од Алијанса за Албанците и Алтернатива, според пребројаните гласови на ДИК се уште водат мртва трка. Но штабот на Дука прогласи победа.

До 18:30 часот излезноста на гласачите изнесува 44, 46.

The post ДУИ прогласи победа на прегласувањето во Дебар appeared first on telma.com.mk.

Денеска во Дебар се одржува вториот круг од локалните избори. Жителите кои живеат во другите градови не може да гласаат поради тоа што патот од Маврово кон Дебар е затворен.

Од АМСМ за Телма изјавија дека од 24.08.2021 година во период од 10:00 до 16:00 часот, во времетраење од 90 дена ќе важи времена измена на режимот на сообраќај, поради грaдежни активности – асфалтирање, со комплетно затворање на делницата Маврови Анови – Жировница (од браната).

За затворањето на патот реагираа и од една политичка партија чиј кандидат е на изборното ливче.

„Во недела, на денот на гласањето, од утринските часови се изведуваат работите на асфалтирање на патот Маврово-Дебар и следствено овој патен правец се држи блокиран. Ваквата состојба ги спречи многу жители на Дебар кои се привремено вработени во други градови да дојдат и да го остварат своето избирачко право. Апелираме надлежните итно да го деблокираат патот и да побараат одговорност од оние кои наредиле вакво сценарио“, се вели во партиското соопштение.

Од СВР-Охрид велат дека не е присутна полиција на овој патен правец, туку приватно обезбедување кое е ангажирано од фирмата изведувач.

Од агенцијата за обезбедување „Вардар обезбедување“,  пак за Телма изјавија дека сите граѓани кои патуваат по овој патен правец по проверка на податоци дали се жители на општина Дебар се пропуштаат.

Мартин Николовски

The post Изборен ден во Дебар, ама патот кон градот затворен поради градежни работи на делницата Маврови Анови–Жировница appeared first on telma.com.mk.

Денеска во Дебар се одржува вториот круг на изборите за градоначалник на општината.

На 27 избирачки места право на глас имаат вкупно 19211 гласачи.

Од пристигнатите податоци од 65.99% од избирачките места, до 11 часот излезноста на гласачите изнесува 8.16 %, информираат од Државната изборна комисија.

На https://rezultati.sec.mk/mk/mayr/t1/2 можете да ги следите податоците за излезноста во живо.

Од ДИК информираат дека до 11 часот поднесени се и два приговора за заштита на личното избирачко право и истите биле прифатени.

The post Излезноста до 11 часот на изборите во Дебар е 8.16% appeared first on telma.com.mk.

Во Дебар денеска се одржува вториот круг од изборите за градоначалник, на кои право на глас имаат 19.211 лица, кои своето гласачко право ќе можат да го остварат на 27 избирачки места.

Во првиот круг одѕивот на гласачите во Дебар беше околу 42 отсто.

Вчера во Дебар гласаа болните и изнемоштени лица. Правото на глас го остварија 60 лица, две не гласаа, додека едно не бело запишано во избирачкиот список.

Според потпретседателка на Општинската изборна комисија – Дебар, вчера гласале 40 лица повеќе отколку во првиот изборен круг, кога своето гласачко право го остварија 20 болни и изнемоштени граѓани.

Јосифовска синоќа информираше дека изборниот материјал за денешното гласање е веќе распределен, избирачките одбори се обучени за начинот на гласање и се е подготвено за спроведување на изборите.

The post Втор круг од изборите за градоначалник на Дебар appeared first on telma.com.mk.

Два дена по изборите, МВР соопшти дека полицајци биле нападнати од поголема група луѓе на избирачко место во Скопје-Север во општина Чаир.

Еден од групата ги нападнал физички полициските службеници, додека друг направил посериозно и потешко дело, извадил пиштол и им се заканувал.

Инцидентот се случил околу 17:30 часот во недела во Центарот за рехабилитација во населба Скопје Север каде се наоѓале 4 избирачки места. Досега нема кривични пријави, а МВР најавува расчистување на случајот.

Еве го соопштението на МВР:

На 31.10.2021 во 23.30 часот во СВР Скопје било пријавено дека околу 17.30 часот на избирачко место бр.2955, 2955/1, 2956, 2956/1 во Центар за рехабилитација во нас.Скопје – Север, додека полициски службеници вршеле обезбедување на избирачкото место, биле нападнати од И.Т.(42) од Скопје, заедно со повеќе лица, меѓу кои и И.Љ(39) од Скопје, кој со пиштол им упатувал закани. Се преземаат мерки за расчистување на случајот.

The post Со пиштол им се заканувал на полицајци на избирачко место appeared first on telma.com.mk.

Се врати како градоначалник на Карпош, но се враќа и на обвинителна клупа каде стигна поради сомнежи за злоупотреба во претходните мандати.

Од скопскиот кривичен суд ни одговорија дека за предметот со обвинетиот градоначалник на Карпош, наредното рочиште е закажано за 05-ти ноември во 10 часот.

Последното рочиште било закажано пред изборите во последната недела пред првиот круг од изборите, но по барање на кандидатот Стевче Јакимовски, рочиштето било одложено и закажано постизборно во ноември.

Всушност, предизборното рочиште било прво откако судењето тргнало од почеток. Претходниот судечки судија Горан Бошевски беша разрешен по што процесот се врати на почеток. Во првиот обид за судење на Јакимовски биле дадени воведни говори и е стигнато до доказна постапка. Но, разрешувањето на судијата го враќа целиот процес на почеток и сега предметот е пред судечки совет воден од судијата Осман Шабани.

Јакимовски за две години успеа да направи круг од цели 360 степени, на 31-ви октомври 2019.-та беше обвинет за злоупотреби во вршењето на функцијата, а на истиот ден но после две години триумфираше во скопски Карпош.

Јакимовски беше обвинет заедно со уште десетмина, но поголем дел од нив признаа вина и добија условни казни од една година затвор доколку во наредните две години сторат ново кривично дело.

Јакимовски меѓу другото е обвинет и за новата административна општинска зграда која без одобрение е изградена, а отпосле е барана легализација на објектот иако објектот е граден после крајниот рок на градба од 2011-та година.

-Првообвинетиот како градоначалник, во име и за сметка на правното лице – општината, во својство на инвеститор спротивно на чл.56 и 57 ст.2 и чл.63 од Законот за градење, без Одобрение за градење, изградил деловен административен објект на локалната самоуправа со што сторил кривично дело Бесправно градење. За објектот во 2016 година поднел Барање за утврдување на правен статус на бесправни објекти од локално значење, стои во обвинителниот акт објавен точно две години пред новата победа на Јакимовски во истата општина.

Кога првично беше донесен законот за легализација, со кој дополнително се продолжува рокот за легализирање на дивоградби иако веќе таквите активности станаа кривично дело, се толкуваше дека законот ќе го декриминализира Јакимовски бидејќи меѓу другото беше обвинет и за дело бесправно градење.

Законот не беше потпишан од претседателот Пендаровски и не стапи во сила, во тек е процедура за носење на уште едно слично законско решение.

Јакимовски според обвинението како градоначалник ја злоупотребил својата положба и при легализација на други бесправно изградени објекти , како и при продажба на државно земјиште во рамките на општина Карпош за пониска цена од пазарната. Обвинителството тврдеше дека со тие кривични дела, во кои првообвинет е Јакимовски, направена е штета на буџетот на општина Карпош од над 14,6 милиони денари (околу 238 илјади евра) и штета на државниот буџет во висина од над 31 милиони денари (околу половина милион евра).

Но, Јакимовски имаше своја верзија односно ја обвини власта дека преку обвинението му се одмаздува политички и дека одлуките за кои е обвинет не се кривични дела, туку го подобриле условите за граѓаните. Меѓу проектите за кои е гонет е и паркот-игралиште спроти студентскиот дом Гоце Делчев.

Јакимовски успеа да биде побрз од правдата и на избори повторно да победи и да се врати на чело на општината каде со две различни партии го освојува градоначалничкото место. Во првиот круг се бореше за второ место, во вториот триумфираше со илјадници гласови разлика.

Јакимовски се враќа во истата општина, која според обвинителството е „место на злосторот“, но жителите на Карпош веќе му пресудија дека „не е виновен“ што тој го прослави во себе својствен стил, со алегоричен филмски сонг на тема претседател, но и со пеење на стихови со кои старо-новиот градоначaлник понуди полови органи за политичките ривали.

Миомир Серафиновиќ

The post По судската ферија, во петок продолжува судењето на Стевче Јакимовски сега како градоначалник на Карпош appeared first on telma.com.mk.