Грчките власти преземаат мерки за намалување на гужвите и забрзување на протокот на патници на копнените гранични премини, во услови на зголемен сообраќај и примена на новиот систем за влез-излез , кој вклучува и биометриска регистрација на државјани од трети земји.

На ова се осврна заменик-министерот за внатрешни работи на Грција, надлежен за регионите Македонија и Тракија, Константинос Гиулекас, кој на конференција за туризам истакна дека се разгледуваат привремени решенија за олеснување на преминувањето на границите, јави МИА.

Меѓу мерките е поставување модуларни контролни пунктови на граничниот премин Евзони, со што една сообраќајна лента се проширува во две, со цел да се намали времето на чекање. Воедно се најавуваат и активности за модернизација на инфраструктурата на преминот, која засега се спроведува во фази.

Во однос на системот за биометриска регистрација, тој нагласи дека европската регулатива овозможува привремено и делумно суспендирање на неговата примена во периоди на зголемен сообраќај, практика што, како што рече, веќе се применува.

The post Грција со мерки за намалување на гужвата на границата со Македонија appeared first on telma.com.mk.

Собраниската Комисија за политички систем и односи меѓу заедниците денеска одржува јавна расправа по Предлог-законот за судска служба и Предлог-законот за јавнообвинителска служба.

Расправата се одржува во рамки на законодавниот процес за уредување на статусот на вработените во правосудните институции.

Со Предлог-законот за судска служба се дефинира посебниот статус на вработените во судската администрација, вклучувајќи судски службеници, државни службеници, судска полиција и помошно-технички персонал.

Целта е појасно уредување на нивните права, обврски и организациска структура. Истиот пристап се применува и со Предлог-законот за јавнообвинителска служба, кој го уредува статусот на вработените во јавните обвинителства, вклучувајќи јавнообвинителски службеници, државни службеници и техничка и административна поддршка.

Со ова се настојува да се зајакне функционалноста и ефикасноста на правосудниот систем во земјава.

The post Јавна расправа за законите за судска и јавнообвинителска служба appeared first on telma.com.mk.

Државниот завод за ревизија изврши анализа на работењето на Врховниот суд на Република Македонија за 2024 година при што во делот на наодите се издвојуваат судски постапки со неизвесен исход, недостатоци во системот за оценување на одредени категории судски службеници и отсуство на судски администратор.

Дополнително, се констатира дека буџетските средства за судската власт не го достигнуваат законски утврдениот процент од БДП, што создава ризик за стабилно и независно финансирање на судството.

Извештајот укажува и на системски слабости, вклучително и нецелосно уредена правна рамка за платите на техничкиот и помошниот персонал во судовите.

Иако дел од препораките од претходната ревизија се спроведени, дел остануваат нереализирани, што укажува на потреба од понатамошни подобрувања во организациското и финансиското функционирање на институцијата.

The post Ревизија нотира системски слабости во судскиот систем appeared first on telma.com.mk.

Прометот од продажбата на услугите е намален за 1,8 отсто во првото тримесечје од 2026 година во однос на истото тримесечје претходната година, соопшти Државниот завод за статстика.

Во првото тримесечје од 2026 година, во однос на истото тримесечје од 2025 година, најголемо зголемување на прометот во услугите од 5,5 отсто има во секторот Објекти за сместување и сервисни дејности со храна, а најголемо намалување од 4,8 проценти во секторот Трговија на големо и трговија на мало; поправка на моторни возила и мотоцикли.

The post Намален прометот од продажба на услугите appeared first on telma.com.mk.

Во работна посета во Лондон престојува министерот за надворешни работи и надворешна трговија, Тимчо Муцунски.

Во британскиот Форин офис, Муцунски ќе оствари средба со својот хомолог, државниот секретар за надворешни работи, Комонвелт и развој на Обединетото Кралство на Велика Британија и Северна Ирска, Ивет Купер.

Муцунски претходно беше во работна посета на Северна Рајна-Вестфалија на покана министерот за федерални, европски, меѓународни работи и медиуми на оваа германската покраина покраината Северна Рајна-Вестфалија, Натанаел Лимински, а по Лондон заминува во Даблин на средба со министерката за надворешни работи и одбрана на Ирска, Хелен Мекенти.

The post Муцунски во Лондон на средба со шефицата на британската дипломатија Ивет Купер appeared first on telma.com.mk.

Гувернерот на Калифорнија, Демократот Гевин Њусом, го обвини министерството за правда дека покренало политички мотивирана истрага против него и неговата сопруга, велејќи дека администрацијата на Трамп го таргетира него додека тој размислува за претседателска кандидатура.

–Во последните денови, федералните агенти тропнаа на вратите на семејството, пријателите и поранешните вработени. Не затоа што пронајдоа кривично дело, туку затоа што едноставно се обидуваат да го пронајдат. Тие бараат евиденција. Тие ја злоупотребуваат постапката на големата порота, копајќи низ години и години случајни документи. Доналд Трамп не ме гони само поради моите злобни твитови. Тој ме гони затоа што размислувам да се кандидирам  за претседател, затоа што мрази  што постојано го критикувам одново и одново за неговите лаги и измами. Доналд Трамп е едноставно најкорумпираниот претседател во американската историја. Тој ги претвори лостовите на владата во свои лични министерства за моќ за да ги награди соработниците и да се обиде да ги затвори своите противници. изјави Њусом.

The post Њусом: Трамп покрена истрага против мене поради мојата најава за кандидат за претседател appeared first on telma.com.mk.

Американскиот потпретседател, Џеј Ди Венс, изјави денеска дека меморандумот за разбирање меѓу САД и Иран е „мошне општ документ“ и оти деталите за конечниот договор ќе бидат усогласени во текот на натамошните преговори.

-Меморандумот за разбирање има околу една и пол страница и е многу општ документ, изјави Венс во разговор за „Си-Ен-Ен“. Тој додаде дека за повеќе прашања ќе биде потребно решение да се бара во фазата на техничките преговори.

Во интервју за телевизијата „Ен-Би-Си“, Венс истакна дека на инспекторите на Меѓународната агенција за атомска енергија „безусловно“ ќе треба да им биде дозволено да се вратат во Иран, како дел од евентуалниот иден договор.

Според него, еден од клучните елементи на договорот е МААЕ и САД да му помогнат на Иран да ги уништи своите резерви на високо збогатен ураниум што, како што рече, е јасно наведено во меморандумот за разбирање што двете страни веќе го усогласиле.

The post Венс: Меморандумот за разбирање меѓу САД и Иран е „мошне општ документ“, деталите допрва ќе се договараат appeared first on telma.com.mk.

Сите осум лица кои се наоѓаа во американскиот бомбардер Б-52 загинаа кога авионот се урна кратко по полетувањето од воздухопловната база Едвардс во американската сојузна држава Калифорнија во понеделникот, потврдија Воздухопловните сили на САД.

– Денеска воздухопловната база Едвардс доживеа страшна трагедија и загубивме осум извонредни Американци – изјави полковникот Џејмс Хејс на прес-конференција.

Тој посочи дека надлежните се во процес на известување на семејствата на жртвите и дека дополнителни информации за загинатите ќе бидат објавени по завршувањето на таа постапка.

Американскиот производител на авиони „Боинг“ соопшти дека двајца од загинатите биле вработени во компанијата.

Хејс изјави дека летот, кој полетал доцна претпладнето во понеделникот (по локално време), бил наменет за тестирање на нов радарски систем. Според него, авионот се урнал само неколку моменти по полетувањето, а потоа се запалил.

– Во овој момент немаме никакви индикации за причините за несреќата. Не можеме да објавиме такви информации и нема да можеме да дојдеме до нив во скоро време – рече Хејс.

Претходно, Воздухопловните сили соопштија дека првичните информации укажуваат оти несреќата не оставила можност за преживување, додавајќи дека екипите за итна интервенција веднаш биле испратени на местото на падот.

BREAKING: A U.S. Air Force B-52 bomber crashed shortly after takeoff at Edwards Air Force Base, triggering an emergency response.

Emergency crews rushed to the scene as thick black smoke billowed from the wreckage scattered across the desert airfield.

More details, including… pic.twitter.com/JRx3R4ElJW

— Fox News (@FoxNews) June 15, 2026

The post (Видео) Осум луѓе загинаа при тест-лет на американски стратешки бомбардер Б-52 appeared first on telma.com.mk.

Иранскиот министер за надворешни работи Абас Арагчи изјави дека Техеран продолжува да гради разбирање со САД, иако недовербата кон Вашингтон сè уште е силна поради претходните искуства со неисполнети договори.

-Неисполнувањето на обврските, едностраното повлекување од договори и сето тоа е сè уште свежо во нашите сеќавања, изјави Арагчи во интервју за иранската државна телевизија.

Тој нагласи дека овие искуства остануваат важен фактор во пристапот на Иран кон новите преговори.

Сепак, шефот на иранската дипломатија истакна дека властите се обидуваат да создадат што повеќе економски можности за земјата преку процесот на дијалог и потенцијалните договори со САД, со цел намалување на економскиот притисок врз Иран.

The post Иран: Недовербата кон САД останува и покрај новите договори appeared first on telma.com.mk.

Украинскиот претседател Володимир Зеленски изјави дека „разговарал со САД и Франција за можноста за состанок со Русија на Г7.

„Доколку Русија ја одбие и оваа шанса, ќе биде потребен дополнителен притисок“, рече Зеленски во видео обраќање до учесниците на меѓувладината конференција на ЕУ.

Тoj синоќа пристигна во Женева за да им се придружи на лидерите на земјите од Г7. Светските лидери се собраа во францускиот град Евиан-Ле-Бен на самитот на клубот на моќни демократии од групата седум.

–Му понудивме на Путин да се сретне било каде каде што би можеле да се донесат вистински одлуки за завршување на војната. Тој не го сака тоа. Разговаравме со САД и Франција за можноста за состанок со Русија околу Г7, со претставници на сите демократски нации. Путин не го сака тоа. Вчера разговаравме со претседателот Трамп дека таков состанок би можел да се организира во САД – во формат каде што на Путин би му било многу потешко да одбие, барем на претседателот Трамп. И ќе видиме што ќе произлезе од тоа. Ако Русија ја одбие и оваа шанса, ќе биде потребен дополнителен притисок, изјави Зеленски.

Францускиот претседател Емануел Макрон најави дека ќе се обиде да го убеди американскиот претседател Доналд Трамп да продолжи со поддршката за Украина и да изврши поголем притисок врз Русија со цел постигнување мировен договор.

Зеленски денеска ќе има низа билатерални средби со лидерите на земјите учеснички. Покрај членките на Г7 – Франција, САД, Канада, Германија, Италија, Јапонија и Обединетото Кралство – на самитот присуствуваат и лидери од Бразил, Египет, Индија, Кенија, Јужна Кореја, Катар, Украина и Обединетите Арапски Емирати. Главни теми на разговорите се глобалната безбедност, состојбата во Украина и последиците од кризата на Блискиот Исток.

The post Зеленски бара од САД и Франција да овозможат средба со Путин appeared first on telma.com.mk.