Синдикатот на работниците од управата, правосудните органи и здруженијата на граѓани (УПОЗ), остро реагира на новите предлог-закони за судска служба и јавно-обвинителска служба, кои се доставени во Собранието без согласност од овој гранков синдикат и спротивно на текстовите кои биле заеднички подготвувани со синдикатите и објавени јавно на ЕНЕР.
„Џабе две и пол години работа, состаноци и усогласувања, ако на крај во Собранието се достават текстови на закони кои немаат никаква врска со она што беше договорено! Наместо подобри решенија и повисоки плати за вработените во судовите и јавните обвинителства, повторно се нудат решенија со кои платите остануваат заглавени во место, а во законите се внесуваат и прашања кои воопшто не треба да бидат дел од нив“ – реагираат од Синдикатот на УПОЗ.
Од оваа синдикална организација порачуваат дека нема да дадат поддршка на законските решенија кои се носат зад грбот на вработените и без вистински социјален дијалог, предупредувајќи дека доколку споменатите законски решенија продолжат во собраниска постапка, незадоволството ќе биде огромно а одговорноста за последиците ќе ја сносат, како што велат, „оние што одлучиле да ги игнорираат ставовите на вработените“.