На грузискиот опозициски политичар Ника Гварамија му е одреден притвор до девет месеци, што претставува ново апсење на виден критичар на владата по немирите околу спорните избори во октомври и одлуката за прекин на евроинтегративниот процес.
Гварамија, лидер на прозападната коалиција „Коалиција за промена“, одби да сведочи пред парламентарна комисија која ги испитува наводните злоупотреби во времето на поранешниот претседател Михаил Саакашвили (2004–2012), кој веќе издржува казна затвор. Доколку биде осуден за непочитување на комисијата, му се заканува затворска казна до една година.
„Коалиција за промена“ освои второ место на изборите што опозицијата ги оцени како нерегуларни, додека владата ги отфрли обвинувањата. Но, две американски анкетни организации објавија дека има докази за изборни манипулации.
Уште двајца лидери од оваа коалиција, Зураб Џапариѕе и Ника Мелија, веќе се во затвор под слични обвиненија.
Гварамија, познат медиумски претприемач и поранешен министер во времето на Саакашвили, претходно беше осуден за злоупотреба на функција во процес што западните земји го оценија како политички мотивиран.
Грузија, која долго важеше за една од најпрозападно ориентираните постсоветски држави, во изминатите две години се движи во спротивна насока. Владата предводена од партијата „Грузиски сон“ усвои низа закони што предизвикаа жестоки реакции.
Милијардерот и поранешен премиер Биѕина Иванишвили, кој важи за најмоќниот човек во земјата, веќе изјави дека опозициските партии треба да бидат забранети. Под негово влијание се влошуваат односите со Западот и се обновуваат врските со Русија, оценуваат локални аналитичари.