Татко и две деца преживеаја пад на авион, откако по 12-часовна потрага беа пронајдени во пустелија во Алјаска. Спасувачите го лоцираа леталото на замрзнато езеро на полуостровот Кенаи, на југоисточниот брег на Алјаска и безбедно го превезоа пилотот и неговите две деца.
По падот на авионот, несреќните татко и деца се сместиле на крилото и чекале помош, а случајот локалните медиуми го опишаа како „чудо“. Со часови беа опкружени со мраз, без засолниште од ветрот или студот, а навистина е неверојатно што преживеале во такви услови, се вели во дел од написите. Објавените фотографии откриваат дека авионот бил делумно потопен во езерото.
Таткото Морис е многу активен на социјалните мрежи и често споделува видеа со своите деца додека се подготвуваат за лет. Очигледно, неговиот авион се урнал во неделата навечер додека биле на обиколка на замрзнатата област. Морис и неговите деца се пренесени во локална болница на полуостровот Кенаи, а нивните повреди не се опасни по живот. Причината за падот на авионот се уште не е утврдена, а властите започнаа истрага.