Премиерот Христијан Мицкоски одговори дека е зачуден зошто има реакција од Грција по негова изјава дадена пред Македонците во Њу Џерси бидејќи „од каде тие се почувствувале повикани кога никој не беше споменат во таа моја изјава“.
Тој во интервју за МТВ даде коментар за последните грчки реакции и рече дека не ја разбира реакцијата на грчкото министерство за надворешни работи на неговата изјава од Њу Џерси, САД, дека „треба да победуваме и во Вашингтон, Брисел, Берлин, Лондон, Париз, Рим и други светски метрополи ако сакаме македонското прашање конечно да добие своја разврска, бидејќи тоа не е решено, тоа со векови тлее и трае и сè уште постои“.
Мицкоски додаде дека немало да бидат испровоцирани
„Мојата цел и мојата порака е јасна. Како претседател на Владата би било неодговорно и предавнички кон македонскиот народ, кон македонските граѓани, јас да кажам дека македонското прашање е затворено во услови кога ние не сме дел од европското семејство, а патот сме го почнале многу пред можеби некои земји членки кои се таму и тоа е прашање што стои отворено“, рече Мицкоски.
„Додека сум жив и се занимавам со оваа работа ќе се борам овие неправди да бидат исправени во 21. век. Кога мене ќе ме нема и нема да ја вршам оваа работа, тогаш останува на генерациите по мене. Но мора да имаме институционална трага дека сме се бореле, не сме го напуштиле бојното поле и не сме биле предавници на македонскиот народ и на македонскиот идентитет“, изјави во интервјуто.
Грција изјавата на Мицкоски дека македонското прашање не е решено го смета за провокација