Прво најавија дека ќе запрат со работа, денеска без застој возат по скопските улици. Приватните превозници велат дека проблемот го решиле зад затворени врати. Тврдат дека имале средба со градоначалничката и советници од градот и се договориле во текот на неделава да им биде исплатена поголема сума од долгот, во спротивно се заканија дека ќе престанат со работа. Иако првично приватниците им дадоа информација на медиумите дека се на состанок во градските бараки, сепак претставници кои тврдат дека биле на средбата не излегоа да дадат изјава пред камерите.
За тоа дали имало договор во градските бараки, поставивме прашање и до кабинетот на градоначалничката.
„Поврзано со информациите во јавност Град Скопје известува дека нема никакви обврски ни исплати кон приватни превозници. За договорни обврски и релации помеѓу ЈСП и приватните превозници одговори може да дадат од Јавното сообраќајно претпријатие. Денес превозниците сообраќаат редовно согласно утврдениот летен возен ред“,велат од град Скопје.
Само со информација дека нема застој во превозот, но без одговор за тоа дали ЈСП им должи пари на приватниците, денеска од претпријатието со соопштение до медиумите.
„Ве информираме дека јавниот превоз функционира непречено и сите возила сообраќаат согласно со важечкиот летен возен ред“, велат од ЈСП.
Ова не е прв пат приватните превозници да најавуваат и да запрат со работа. Пред повеќе од една година метрополата остана без јавен превоз откако приватниците неколку месеци не возеа, а нивните автобуси беа паркирани по булеварите.
Симона Петровска