Министерот за здравство Фатмир Меџити изјави дека веќе е формирана комисија која треба да работи на новиот правилник за ставање лекови на позитивната листа односно кои ќе паднат на товар на Фондот за здравствено осигурување.
Тој рече дека нема временски период до кога треба да биде ажурирана листата, бидејќи тоа ќе се случува етапно.
Правилникот е во согласност со ЕУ стандардите, а новитет е тоа што предвид се земаат не само клиничките и економските аспекти од употребата на лекот или интервенцијата, туку и хуманистичките аспекти.
Комисијата е составена од експерти, односно претставници од Министерството за здравство, Фондот за здравствено осигурување, Агенцијата за лекови и медицински средства, Институтот за претклиничка и клиничка фармакологија со токсикологија, како и од универзитетските клиники, кои се доктори-специјалисти од различни области на медицината и фармацијата.