Русија уапси новинар на „Волстрит Журнал“ под обвинение за шпионажа, објави „Гардијан“. Федералната служба за безбедност (ФСБ) соопшти дека во Екатеринбург е приведен Еван Гершкович додека, наводно, се обидувал да добие доверливи информации.
Од ФСБ наведуваат дека тој „собирал доверливи информации за активности на една од компаниите на рускиот воено-индустриски комплекс“, но без детали кога е рфеализирано апсењето.
Како што пренесува „Гардијан“, Гершкович би можел да се соочи со затворска казна од 20 години, доколку биде обвинет за шпионажа.
Тој е прв репортер на една американска новинска куќа од Студената војна кој е уапсен под обвинение за шпионажа во Русија.
Руската федерална служба наведува дека „Гершкович постапувал по наредба на САД да прибира информации за активности на една од компаниите на рускиот воено-индустриски комплекс кои претставуваат државна тајна“.
Гершкович ја покрива Русија и Украина како дописник на „Волстрит Журнал“ од Москва и според руските власти, тој имал акредитација од руското министерство за надворешни работи да работи како новинар.
Последниот негов извештај од Москва, кој е објавен во текот на оваа недела, беше фокусиран на забавување на руската економија поради западните санкции по влегувањето на руските трупи во Украина на 24 февруари минатата година.