Нова телевизија од забавно општ карактер ќе зрачи локално во скопскиот регион. Агенцијата за аудио и аудиовизуелни медиумски услуги, на седницата одржана во понеделникот, и даде дозвола на компанијата „Преобразба“, чиј основач, сопственик и управител е теологот Петар Каревски, кое е световно име Преспанско пелагонискиот владика Петар.
„Советот на Агенцијата донесе Одлука за доделување дозвола за телевизиско емитување на програмски сервис со претежно забавен општ формат, на македонски јазик, на подрачје на регионално ниво Скопје, на правното лице Друштво за производство туризам промет и услуги ПРЕОБРАЗБА ДООЕЛ Скопје. Телевизискиот програмски сервис ќе се емитува преку јавна електронска комуникациска мрежа што не користи ограничен ресурс“, се наведува во одлуката на АВМУ ТЕЛОП
Компанијата „Преобразба“ е основана на 25 август 2021 година, со основачки влог од 300.000 денари. Владиката Петар не одговори на телефонските повици и пораки на Телма, да каже зошто одлучил да влезе во медиумскиот бизнис, каков е неговиот план со телевизијата која ќе зрачи во Скопје, а не во Битолскиот регион каде е неговата Епархија, потоа колку пари ќе чини овој проект и дали ќе има и информативна програма, што сепак е исклучително значаен сегмент со оглед на неговата улога во општеството како владика на една епархија.
Неофицијално, како што дознава Телма, зад проектот стои Македонската православна црква, а овој формат ќе наликува на форматот на регионалните и националните телевизии, кој опфаќа програма од забавен карактер, од јавниот живот, музичка програма, и секако може да содржи и информативна програма. Според информации на Телма, опремата за телевизијата на компанијата „Преобразба“ чиј сопственик е Владиката Петар е од поранешната скопска локална ТВ Амазон.
Емилија Мисирлиевски