Почнува Самитот ЕУ – Западен балкан во Тирана на кој според најавите се очекува учество да земат 44 делегации. Една од темите ќе биде разгледување на опцијата за намалување на цените на роаминг услугите меѓу ЕУ и земјите од регионот за што се очекува и потпишување декларација.
На земјите од Западен Балкан ќе им биде претставен акциски план за миграција, а во фокусот ќе бидат и последиците од војната во Украина и надминување на енергетската криза. Политичката порака, како што велат европски дипломати, ќе биде јасна европска перспектива и повик за забрзување на проширувањето.
И покрај колебањето, српскиот претседател Александар Вучиќ најави дека сепак ќе дојде во Тирана, велејќи дека ако не присуствува, тоа ќе биде на штета на неговата земја. Во пресрет на самитот подигнати се безбедносните мерки, а ангажирани ќе бидат 1.500 припадници на полицијата за да се погрижат за редот особено откако Сали Бериша најави антивладин протест. Иако неговото барање за протест пред владата на Албанија беше одбиено тој сепак рече дека никој не може да го сопре да го одржи најавениот митинг за 12 часот. По Бериша и партијата на поранешниот претседател Илир Мета повика граѓаните масовно да излезат на протестот на опозицијата. Албанското министерство за внатрешни работи за денеска најави дека целосно ќе биде забрането движење пред владата, каде ќе се одржува самитот, а денешниот ден во Тирана е прогласен за неработен.