Пратеничката група на ВМРО-ДПМНЕ и коалицијата денеска достави барање до Собранието за одржување на итна седница на која ќе се разгледува Предлог законот кој го поднеле и се однесува на Законот за енергетика.
Тие по вчерашната прес конференција согледале дека Владата ги препишала предлог мерките што ги понудиле ВМРО-ДМПНЕ и сметаат дека само тоа не е доволно.
Ковачевски презентираше дека ќе добиваат поевтина електрична енергија образовните и јавните здравствени установи, но ги изостави водостопанските и комуналните претпријатија кои што поради високите цени на електрична енергија имаат проблеми со ликвидноста што во следниот период може да доведе до повисоки сметки за домаќинствата и стопанството.
Од ВМРО-ДПМНЕ бараат целосно да се прифати нивниот предлог каде тие ги имаат опфатено и водоводните и комунални претпријатија кои што имаат огромни трошоци за електрична енергија.
Од опозицијата посочија дека доколку СДСМ и Ковачевски навистина се грижат за граѓаните и стопанството да го поддржат нивниот Закон за енергетика, а со тоа ќе им се олесни на граѓаните и стопанството да не доаѓа до поскапување на услугите поврзани со водоснабдувањето.
Нивното решение е прво да се изгласаат нивните предлог мерки, а потоа да се разговара за тие предлог мерки што ги слушнале во текот на вчерашниот ден.