„Барањата на Бугарија се променливи. Она што ние честопати го предупредуваме дека нивните барања се цел која се поместува. Ако ги погледнете денешните изјави на Радев, вели дека не бараме статус на малцинство туку уставнотворен народ. Кај нас на пописот има 3.500 граѓани кои се декларираат како Бугари. Преку внесувањето на бугарската заедница во Уставот, ќе се доведе до тоа Бугарија да им биде матична земја на тие граѓани, во случајот како што е со Хрватска и Србија во БиХ“, изјави во вечерашното издание на Топ тема директорката на Институтот за европска политика – Скопје, Симонида Кацарска.
Кацарска смета дека вклучувањето на правата на малцинствата, со дополнителен акциски план за малцинства, по измена на Уставот во делот на малцинствата, не се во доменот на Европската унија, и има ризик да го комплицира пристапот на земјата во Унијата.
Директорката на Институтот за европска политика – Скопје, Симонида Кацарска смета дека во преговарачката рамка има акомодирање на дел од бугарските барања.
„Имаме одредена форма на документот кој што излезе во медиумите и тоа е она што го имаме пред нас. Се споменува билатералниот договор како дел од преговарачката рамка. Ние веќе имаме неколку форми на преседани, во секој случај вклучувањето на билатералниот договор во преговарачката рамка ќе има имликација односно ќе биде преседан кој што ќе го успори процесот, и мислам има земји членки кои се свесни за тоа и прашање е како тие ќе се постават во одонос на ова прашање. Но, не можеме да очекуваме дека тие ќе не спасат“, вели Кацарска.