ВМРО-ДПМНЕ и Левица бараат од Основното јавно обвинителство итно да постапи по поднесените кривични пријави против Џафери и двајцата пратеници Стојчевска и Богдановски кои во скафандери дојдоа и гласаа во Собранието. Тврдат дека со ваквиот чин, тројцата со умисла и претходна координација, сториле кривични дела согласно членовите 205 и 206 од Кривичниот законик за „Непостапување според здраствените прописи за време на епидемија“ и „Пренесување на заразна болест“.
СДСМ не се плаши до кривичните пријави. Ако треба пак ќе го направат истото кога станува збор за интересите на граѓаните и кога се сигурни дека тоа што го прават е според утврден протокол за функционирање на Собранието во вакви ситуации. Опозицијата, не една, можат и 100 пријави да поднесат, за да прават театар и да се обидуваат да излезат од калта во која секој ден тонат, велат од владејачката партија.
Државниот здраствен инспекторат се прогласи за ненадлежен за мерките кои се однесуваат на заштита на работните места посочувајќи дека евентуалното прекршување од страна на двајцата пратеници ќе треба да го утврди Државниот инспекторат на труд. Но ова не беше случај и со градоначалникот на Куманово, Максим Димитриевски за кој тогаш експресно се произнесе директорката на Државниот здраствен и санитарен инспекторат Ирина Сотирова Бухова, објаснувајќи дека тој ги прекршил протоколите бидејќи излегол од дома со повик на 192 и се тестирал неколку пати.
Јулијана Пешевска
