Четириесет пати заѕвонел телефонот на Центарот за управување со кризи вчера по невремeто со обилни врнежи од дожд, град, силен ветер и грмотевици што ја зафатија Македонија. Во скопскиот регион најзафатени беа Бутел, Гази Баба, Кисела Вода, Аеродром и Студеничани каде граѓаните имаа поголеми штети на домовите.
-Во Скопје имаше голем број откорнати дрвја, паднати бандери, скинати жици и некои делови од кровови беа паднати, но ние сме особено задоволни што немаше повредени граѓани. Засега немаме ниту една пријава за повреда на граѓаните, вели Стојанче Ангелов, директор на Центар за управување со кризи.
Краткото невреме искрши дрвја и урна бандери. Невремето оштети и автомобили. Една од фотографиите е оваа, која стигна до нашата редакција.
Освен Скопје невремето зафати и градови на северо-истокот од земјата. Штетата е иста, паднати дрвја и откорнати бандери.
-Покрај Скопје невремето Куманово, Старо Нагоричане, Кратово, Пробиштиб, Карбинци и Струмица, но генерално штетите се слични. Проблем е што на некои места паѓаше град кој предизвика штета врз земјоделските површини, додаде Ангелов.
Во моментов голем дел од штетите се санирани. Според метеролозите, до среда се очекуваат високи температури и многу висок УВ индекс. А од четврток се најавува северен ветер и пад на температурите за околу десет степени.
Тамара Марковска