ТРАДИЦИОНАЛНИОТ МАСКЕНБАЛ ГО ОДБЕЛЕЖА ПРАЗНИКОТ ВО ТЕТОВО

И годинава традиционално чествувањето на Бадник во Тетово, синоќа го започнаа децата. Тие маскирани одејќи по тетовските семејства од врата на врата во групa од неколкумина, ја пееја познатата песна Бдња Баба а за возврат од домаќинките добиваа пари, костени, ореви јаболко. Подоцна во предвечерието на Божик младите и повозрасните со духовити и инвентивни маски го продолжија ваквиот начин на празнување. Кловнови, филмски ликови ,војници, цела вечер поминуваа низ тетовски улици, а кафулињата беа претесни да ги примaт сите учесници на маскенбалот, дојдени од Македонија, но и надвор од нашата држава.


Ваквото празнување е продолжение на паганските обичаи. Пред дваесетина години се маскирале само децата, но оваа традиција ја презеле и повозрасните. Тие сметаат дека маскенбалот во иднина треба да биде поорганизиран, да има дефиле низ главните булевари или пак избор на најдобра маска. Сето ова треба да биде поддржано од локалната, но и од централната власт како што е случајот со другите маскенбали и карневали.

Синоќа во пресрет на Божик масовно и забавно беше и низ тетовксите маала каде се палеше бадникарскиот оган, а со посна трпеза се чекаше христовото рождевство.